Rayon Sports yatsinze Bugesera FC ikomeza gukubana na APR FC (Amafoto)

Yanditswe na Eric Tony Ukurikiyimfura
Kuya 22 Ukwakira 2019 saa 09:52
Yasuwe :
0 0

Rayon Sports ikomeje kunganya amanota na APR FC ya mbere, ni nyuma yo gutsinda Bugesera FC ibitego 2-1 mu mukino w’umunsi wa kane wa Shampiyona wabereye kuri Stade ya Kigali i Nyamirambo ku mugoroba wo kuri uyu wa Kabiri.

Ni umukino wabanje kuvugwaho byinshi nyuma y’uko Bugesera FC yari yanze ko washyirwa saa 18:00 ariko nyuma yo guhuzwa na FERWAFA, amakipe yombi abasha kumvikana.

Rayon Sports yawukinnye idafite abarimo Iradukunda Eric, Nyandwi Saddam, Nshimiyimana Amran na Mugheni Kakule Fabrice bafite ibibazo bitandukanye.

Iyi kipe yari imbere y’abafana bayo, yihariye umupira mu minota myinshi y’igice cya mbere ariko kubona uburyo bushobora kuvamo igitego bikayigora.

Uburyo bwa mbere bukomeye muri uyu mukino, bwabonetse ku munota wa 31, aho Ngarambe Ibrahim yananiwe gufunga umupira wahise ufatwa na Mugisha Gilbert, awuhinduye mu rubuga rw’amahina usanga Michael Sarpong wateye ishoti ryaciye ku ruhande rw’izamu rya Bugesera FC.

Bugesera FC yashoboraga gufungura amazamu ku ikosa ryahanwe Mustafa Francis, umupira wakozweho na Kibengo Jimmy ugarurwa n’igiti cy’izamu.

Mu minota y’inyongera y’iki gice cya mbere, Rayon Sorts yabuze amahirwe akomeye yo gutsinda igitego ubwo Michael Sarpong yateraga ishoti ryagaruwe n’igiti cy’izamu ubwo Rutanga Eric yahanaga ikosa.

Bugesera FC yaatangiye igice cya kabiri ikora impinduka, umunyezamu Kwizera Janvier ‘Rihungu’ wagize imvune, asimburwa na Twagirimana Pacifique.

Byasabye gutegereza umunota wa 56, Rayon Sports ifungura amazamu ku gitego cyatsinzwe na Mugisha Gilbert wari umaze guherezwa na Rutanga Eric.

Nyuma y’iminota 10, Oumar Sidibé yacomekeye umupira Michael Sarpong asiga ba myugariro ba Bugesera FC maze aroba umunyezamu Twagirimana, atsinda igitego cya kabiri cyahaye icyizere abakunzi ba Rayon Sports.

Bugesera FC yakoze impinduka zirimo iya Rucogoza Djihad wasimbuye Ishimwe Issa Zappy, yabonye igitego cy’impozamarira ku munota wa 88, gitsinzwe n’uyu mukinnyi winjiye asimbura.

Gutsinda uyu mukino byafashije Rayin Sports kugira amanota 10 izigamye ibitego bine. Ikaba irushwa igitego kimwe na APR FC ya mbere zinganya amanota.

APR FC yo yatsindiye Marines FC i Rubavu ibitego 2-1 mu gihe Police FC yanganyije amanota umunani na Mukura Victory Sports ya gatatu, nyuma yo kunganya na Gasogi United ubusa ku busa mu mukino wabereye ku Mumena.

Abakinnyi bitabajwe ku mpande zombi:

Rayon Sports: Kimenyi Yves, Irambona Eric, Rutanga Eric (c), Saidi Iragire, Rugwiro Hervé, Commodore Olokwei, Nizeyimana Mirafa, Sidibé Oumar, Gilbert Mugisha, Iranzi Jean Claude, Michael Sarpong.

Bugesera FC: Kwizera Janvier, Ishimwe Zappy, Ngarambe Jimmy, Wilondja Jacques , Bizimana Joe, Francis Moustapha, Shaban Hussein Tchabalala, Nzabanita David (c), Kibengo Jimmy, Murengezi Rodrigue, Peter Otema.

Uko amakipe yatsindanye ku munsi wa kane wa Shampiyona

Ku Cyumweru tariki ya 20 Ukwakira

  • Heroes FC 2-1 AS Muhanga
  • Sunrise FC 4-1 Espoir FC
  • Musanze Fc 1-1 SC Kiyovu
  • Gicumbi FC 1-3 Mukura VS

Ku wa Kabiri tariki ya 22 Ukwakira

  • Rayon Sports FC 2-1 Bugesera FC
  • Gasogi United 0-0 Police FC
  • Marines FC 1-2 APR FC

Ku wa Gatatu tariki ya 23 Ukwakira

  • Etincelles FC vs AS Kigali (Stade Umuganda, 15h00)
Abakinnyi ba Rayon Sports babanje mu kibuga
Abakinnyi ba Bugesera FC babanje mu kibuga
Rayon Sports yasatiriye Bugesera FC mu minota myinshi y'umukino
Murengezi Rodrigue ahanganiye umupira na Nizeyimana Mirafa
Kwizera Janvier 'Rihungu' yari yagoye Rayon Sports
Ngarambe Ibrahim asubizayo umupira ubwo yari asatiriwe na Mirafa
Bugesera FC yahushije uburyo bwiza ku mupira wagaruwe n'umutambiko w'izamu
Mugisha Gilbert agerageza gucenga Wilondja Jacques
Abafana bari babukereye, bitwaje ibikoresho bibafasha gufana
Irambona Eric yahawe umwanya nyuma yo kubura kwa Iradukunda Eric wavunitse
Michael Sarpong acenga Bizimana Joe wa Bugesera FC
Bugesera FC na yo yari ishyigikiwe
Peter Otema wahuraga na Rayon Sports yakiniye, aterana umupira Commodore Olokwei
Mugisha Gilbert na Michael Sarpong bafashije Rayon Sports gutsinda Bugesera FC
Michael Sarpong yishimira igitego cya kabiri yatsinze muri uyu mwaka w'imikino
Abakinnyi ba Rayon Sports bishimira igitego cya kabiri
Abafana ba Rayon Sports batahanye akanyamuneza

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza