Rayon Sports yatsindiye Gor Mahia muri Kenya, yigarurira icyizere cyo kurenga amatsinda

Yanditswe na Ishimwe Israel
Kuya 19 Kanama 2018 saa 09:43
Yasuwe :
2 1

Rayon Sports yatsinze Gor Mahia yo muri Kenya ibitego 2-1 mu mukino wa gatanu w’amatsinda ya CAF Confederation Cup wabereye 2018 kuri i Nairobi kuri iki Cyumweru, tariki 19 Kanama 2018.

Umukino w’aya makipe yombi warangiye Rayon Sports yiyongereye amahirwe yo kurenga mu matsinda, wabereye kuri Moi International Sports Center.

Rayon Sports yagiye muri Kenya idahabwa amahirwe, yahagurutse i Kigali idafite abakinnyi bakomeye barimo n’abashya iheruka kugura nk’Umunye-Ghana ukina hagati mu kibuga Donkor Prosper na rutahizamu Kouame Brou Gerard Stephane ukomoka muri Côte d’Ivoire.

Iyi kipe itozwa n’Umunya-Brazil, Roberto Oliveira Goncalves, yakinnye idafite abakinnyi barindwi bagaragaye mu mukino ubanza wabereye i Kigali aho amakipe yombi yanganyije 1-1.

Gor Mahia yatsindiwe na Kagere Meddie werekeje muri Simba SC yo muri Tanzania, Rayon Sports itsindirwa na Rutanga Eric.

Rayon Sports yinjiye mu mukino mbere kuko ku munota wa gatatu yafunguye amazamu ku gitego cyatsinzwe na Bimenyimana BonFils Caleb, ahawe umupira mwiza na Manishimwe Djabel.

Iyi kipe yokeje igitutu Gor Mahia yakiniraga iwayo ariko iza kuyica mu rihumye irayishyura ibifashijwemo na rutahizamu Francis Mustapha wahoze akinira Kiyovu Sports muri Shampiyona y’umwaka ushize.

Abakinnyi ba Gor Mahia itozwa na Dylan Kerr babuze uburyo bwinshi bwari bwabazwe, icyizere cyabo cyasojwe na Rutanga Eric watsindiye Rayon Sports igitego cy’intsinzi ku munota wa 53 cyavuye kuri coup franc.

Mu wundi mukino wo mu Itsinda D, Yanga Africans yihereranye USM Alger iyitsindira muri Tanzania ibitego 2-1.

Ibi byongereye Rayon Sports amahirwe kuko isabwa gutsinda Yanga igategereza ibizava mu mukino wa Gor Mahia izaba yasuye USM Alger muri Algeria.

Rayon Sports iri ku mwanya wa gatatu muri iri tsinda mu gihe hasigaye umukino umwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza