Rayon Sports yasubije Manzi na Djabel ku gahimbazamusyi bemereye bagenzi babo bakinanye

Yanditswe na Thamimu Hakizimana
Kuya 13 Nzeri 2019 saa 12:20
Yasuwe :
0 0

Rayon Sports yavuze ku bijyanye n’agahimbazamusyi Manzi Thierry na Manishimwe Djabel bashaka guha abakinnyi bagenzi babo bahoze bakinana ubwo bari muri iyi kipe, bakayifasha kwegukana igikombe cya Shampiyona mu mwaka ushize w’imikino.

Aba bakinnyi bombi, Manzi Thiery na Manishimwe Djabel ubu bari muri APR FC, batangaje ko bemereye agahimbazamusyi ka $250 bagenzi babo bakinanaga muri Rayon Sports nyuma y’aho iyi kipe ivuze ko nta mukinnyi wayivuyemo nabi izaha ayo mafaranga (ibihumbi 500 Frw) yari yarabemereye nibatwara igikombe.

Manzi Thierry na Manishimwe Djabel nk’abari bayoboye abandi muri Rayon Sports, bahise biyemeza kwikora mu mufuka bakazihera bagenzi babo batakibarizwa muri iyi kipe ariko batwaranye igikombe, ako gahimbazamusyi.

Manishimwe yagize ati "Ntabwo ari ibintu bidasanzwe. Hari bagenzi bacu twaruhanye dutwara igikombe umwaka ushize ariko ntitwabona agahimbazamusyi twemerewe. Hari bamwe twagize amahirwe tubona umusaruro w’imbaraga twataye tubona amakipe ariko hari n’abandi bitagenze neza."

“Twe twafashe umwanzuro wo gushimira bagenzi bacu batugejeje kuri byose dufite ubu. Abo tuzaha amafaranga ni abatari muri Rayon Sports ubu kuko abandi bo wasanga ikipe izagera aho ikabishyura. Twafashe umwanzuro wo kubaha $250 buri umwe.”

Nyuma y’aya magambo, IGIHE yaganiriye n’Umuvugizi wa Rayon Sports, Nkurunziza Jean Paul agira icyo avuga ku bijyanye n’uko bakiriye iki cyemezo cy’aba bakinnyi.

Umuvugizi wa Rayon Sports yavuze ko kuba abakinnyi bavuye muri iyi kipe batazahabwa aka gahimbazamusyi ari umwanzuro wafashwe nyuma yo kugirana ibiganiro na Komite yayoboraga ikipe mu mwaka ushize w’imikino.

Ati“ Rayon Sports ifite uburyo iyoborwa n’uko ikora. Abakinnyi batwaye shampiyona bemerewe agahimbazamushyi n’ubuyobozi twasimbuye kandi natwe turabyemera. Ntawe ufite imyitwarire mibi uzayahabwa.”

“Hanyuma niba Manzi na Djabel bafite ibya mirenge ku ntenyo, rwose nibwira ko ari umuco mwiza gusangira n’abo bafatanyije kuko wa mugani ntabwo icyo gikombe bagitwaye bonyine cyangwa ntabwo bakinaga bonyine kugira ngo babe aribo bakinnyi beza.”

Nkurunziza avuga ko kuba aba bakinnyi bombi bariyemeje gukora iki gikorwa ntacyo bitwaye Rayon Sports ndetse nta kibazo na kimwe ibibonamo.

Ati “ Niba koko bavuga ko bashaka guha bagenzi babo basohokanye muri Rayon Sports agahimbazamusyi ni bakabahe. Nk’ubuyobozi bwa Rayon Sports turabibemereye niba ari uruhushya badusabaga ariko ntakuduca amazi tubibonamo nibakabahe ni igikorwa cyiza ariko bive mu magambo.”

Aya mafaranga aba bakinnyi bemeye guha bagenzi babo ni asaga ibihumbi 230 Frw, bitandukanye n’ibihumbi 500 Frw bari bemerewe.

Biteganyijwe ko abakinnyi bazagenerwa aka gahimbazamusyi barimo Ndayisenga Kassim, Bikorimana Gérard, Mutsinzi Ange, Mugisha François, Bukuru Christophe, Donkor Prosper, Niyonzima Olivier ‘Sefu’, Rafael Jonathan Da Silva, Mudeyi Suleyman na Tuyishime Eric ‘Congolais’.

Manzi Thierry wari kapiteni wa Rayon Sports na Manishimwe Djabel wari umwungirije, bageneye agahimbazamusyi bagenzi babo batakiyirimo ariko baratwaranye Igikombe cya Shampiyona
Manishimwe Djabel na Manzi Thierry bagiye muri APR FC ubwo umwaka w'imikino wa 2018/19 mu Rwanda wari urangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza