Ni umukino abafana ba Rayon sports bari bagerageje kwitabira kubera amasura mashya iyi kipe yaherukaga kwibikaho, nka Héritier Luvumbu na Mindeke Jean Pierre Fikiani uri mu igeragezwa.

Rayon sports yatangiye isatira ariko yagize ibyago byo kuvukinisha Tuyisenge Arsène ku munota wa gatatu, asimburwa na Boubacar Traoré.

Ku munota wa gatanu, Rayon Sports yabonye coup-franc, Luvumbu Héritier ayitera neza imbere y’izamu, umupira usanga Mucyo Didier Junior atsinda igitego cya mbere.

Umukino wakomeje gukinirwa hagati mu kibuga ari na ko Rayon Sports yakomezaga kwiharira umupira. Ku munota wa 24, Mucyo yahinduye umupira imbere y’izamu ariko Mindeke Jean Pierre awuteye umunyezamu awukuraho.

Gikundiro yagumye imbere y’izamu maze ku munota wa 27, Muvandimwe Jean Marie Vianney ahindura umupira usanga Mucyo Didier ahagaze wenyine, atsinda igitego cya kabiri.

Heroes FC yabonye uburyo bwa mbere imbere y’izamu ku mutwe abakinnyi bayo bateye ariko umunyezamu Twagirumukiza Amani umupira awushyira muri koruneri.

Heroes FC yagumye hafi y’izamu, bahindura umupira usanga Ngabonziza Dieudonné ahagaze neza atsinda igitego cya mbere cya ku munota wa 34. Igice cya mbere cyarangiye Rayon Sports itsinze Heroes ibitego 2-1.

Igice cya kabiri cyaranzwe n’impinduka nyinshi ku ruhande rwa Rayon Sports. Ibi byatumye ikomeza gusatira ndetse ku munota wa 67, Ndekwe Félix yateye coup-franc nziza, Mucyo Didier atsinda igitego cya gatatu cya Rayon Sports ari na cyo cye cya gatatu muri uyu mukino.

Bidatinze, Moussa Camara wari winjiye mu kibuga asimbuye Mindeke Jean Pierre wavugirijwe induru n’abafana ndetse akaba yamaze gusezererwa n’iyi kipe, yazamukanye umupira wenyine yihuta, atera ishoti rikomeye cyane atsinda igitego cya kane ku munota wa 72.

Umukino warangiye Rayon Sports itsinze Heroes FC ibitego 4-1 birimo bitatu bya Mucyo Didier Junior na Moussa Camara.

Murera izongera gukina umukino wa gicuti na Police FC ku wa Gatandatu, tariki 14 Mutarama 2023, kuri Stade ya Muhanga.

Abakinnyi 11 Rayon Sports yabanje mu kibuga

Abakinnyi 11 Heroes FC yabanje mu kibuga

Tuyisenge Arsène yavunitse ku munota wa gatatu gusa w'umukino ahita asimburwa n'Umunya-Mali, Boubacar Traoré

Yahise yitabwaho n'abaganga ariko ku bw'amahirwe make ntiyakomeza umukino

Muganga wa Rayon Sports, Mugemana Charles, akora ikimenyetso cyo gusimbuza Tuyisenge Arsène

Yasindagijwe n'abaganga

Umunye-Congo Héritier Nzinga Luvumbu ahagaze ku mupira mbere y'uko arema uburyo bw'igitego cya mbere

Yateye Coup-franc ku kirenge cya Mucyo Didier Junior na we wahise ashyira umupira mu rushundura

Mucyo Didier Junior ukina inyuma iburyo bwa Rayon Sports yahise afungura amazamu ku munota wa gatanu

Héritier Nzinga Luvumbu yishimana na Mucyo Didier wamufashije gutsinda igitego cya mbere

Rutahizamu Mindeke Fukiani uri mu igeragezwa muri Rayon Sports yavugirijwe induru nyuma yo guhusha uburyo bwinshi bwabaga bwabazwe

Myugariro Muvandimwe Jean Marie Vianney ni we wari Kapiteni wa Rayon Sports muri uyu mukino

Umunye-Congo Héritier Nzinga Luvumbu arekura rimwe mu mashoti yamuranze muri uyu mukino

Rutahizamu Mindeke Fukiani yahushije ibitego birimo n'icyo yasigaranye n'umunyezamu wa Heroes akananirwa kumuroba

Myugariro Mucyo Didier Junior yishimira igitego cya kabiri ku munota wa 27

Iraguha Hadji ni umwe mu bakinnyi bitwaye neza muri uyu mukino

Heroes FC yabonye igitego kimwe rukumbi cyatsinzwe na Ngabonziza Dieudonné ku munota wa 34

Abakinnyi ba Heroes FC bishimira igitego cyabo rukumbi cyabonetse muri uyu mukino

Umutoza wa Heroes FC, Nkeshimana Vianney, atanga amabwiriza ku bakinnyi be

Rutahizamu Mindeke Jean-Pierre Fukiani yari amaze iminsi mu igeragezwa muri Rayon Sports

Umutoza wa Rayon Sports, Haringingo Francis, abwira Ndekwe Félix amayeri y'umukino mbere y'uko yinjira mu kibuga

Yahise amujyana ku rubaho kumwereka uburyo ari bukine

Icyo kunywa cyari gihari ku bwinshi. Skol yahacanye umucyo

Abafana ntibigeze bicwa n'inyota

Rutahizamu Mindeke Jean-Pierre Fukiani ntiyasoje umukino yageragerejwemo. Yayasimbuwe na Moussa Camara

Rutahizamu Mindeke ashimira Aba-Rayon bakurikiye umukino w'ikipe yabo na Heroes FC. Ni we wa nyuma yagaragayemo yambaye amabara yayo y'Ubururu n'Umweru

Myugariro Mucyo Didier Junior yatsinze igitego cya gatatu muri uyu mukino gisa neza n'icya mbere

Umunyezamu wa Heroes FC yirambuye biba iby'ubusa

Abakinnyi ba Rayon Sports bishimira igitego cya gatatu

Rutahizamu w'Umunya-Mali Moussa Camara yarekuye ishoti riremereye ryabyaye igitego cya kane

Umunyezamu wa Heroes FC ntiyigeze akurikira

Byari ibyishimo kuri uyu musore winjiye mu kibuga asimbuye

Umufana ukomeye wa Rayon Sports, Rwarutabura yaje kwishimana na Moussa Camara wari umaze gutsinda igitego cya kane

Rutahizamu w'Umunya-Cameroun, Willy Essomba Onana na Kapiteni Ndizeye Samuel barebeye uyu mukino ku ibaraza ry'amacumbi ya Rayon Sports

Abafana bashimishijwe no kugaruka ku kibuga nyuma y'igihe batareba Ikipe yabo

Amafoto: Ntare Julius