Rayon Sports yanyagiye Espoir FC, igabanya amanota yarushwaga na APR FC (Amafoto)

Yanditswe na Eric Tony Ukurikiyimfura
Kuya 18 Mutarama 2020 saa 07:25
Yasuwe :
0 0

Ibitego bibiri byatsinzwe na Bizimana Yannick n’ikindi cya Mugisha Gilbert byafashije Rayon Sports gutsinda Espoir FC 3-0 mu mukino w’umunsi wa Shampiyona wabereye kuri Stade ya Kigali i Nyamirambo kuri uyu wa Gatandatu.

Rayon Sports yaburaga benshi mu bakinnyi babanza mu kibuga uhereye mu izamu ryarimo Mazimpaka André, yabanjemo myugariro w’iburyo Iradukunda Axel w’imyaka 17 nyuma y’uko Radu afite amakarita atatu y’umuhondo.

Ku munota wa gatatu w’umukino, iyi kipe yambara ubururu n’umweru yafunguye amazamu ku gitego cyatsinzwe na Bizimana Yannick ku mupira yahawe na Oumar Sidibé.

Bizimana Yannick yatsinze ikindi gitego cya kabiri ku munota wa 25, ku mupira wahinduwe na Sekamana Maxime, aroba umunyezamu Ndikuriyo Patient wahise ugira ikibazo gikomeye, asimburwa nyuma y’iminota irindwi yamaze yitabwaho n’abaganga.

Mugisha Gilbert wari umaze iminsi yaravunitse na Rugwiro Hervé utaherukaga mu kibuga kuva aho arekuwe n’urukiko, bombi binjiye basimbura mu gice cya kabiri, mu mwanya wa Ciza Hussein na Iradukunda Axel.

Habura iminota itanu ngo umukino urangire, Mugisha Gilbert yatsindiye Rayon Sports igitego cya gatatu ku ishoti rikomeye yatereye muri metero nka 25.

Gutsinda uyu mukino byatumye Rayon Sports igira amanota 38 ku mwanya wa kabiri, irushwa amanota ane gusa na APR FC ya mbere.

Indi mikino yabaye uyu munsi yasize Etincelles FC inganyije na APR FC igitego 1-1 mu gihe Heroes FC yanganyije na Marines FC ubusa ku busa.

Ejo ku Cyumweru, Sunrise izakira Kiyovu Sports, Gasogi United yakire AS Muhanga, Musanze FC yakire Mukura VS ni mu gihe Gicumbi FC izakira Police FC.

Abakinnyi ba Rayon Sports babanje mu kibuga
Abakinnyi ba Espoir FC babanjemo
Umukino wayobowe na Ruzindana Nsoro
Bizimana Yannick hagati y'abakinnyi ba Espoir FC
Myugariro Habiman Hussein yari yongeye kubanza mu kibuga
Ciza Hussein na we yari yahawe umwanya ubanzamo
Bizimana Yannick nyuma yo gufungura amazamu i Nyamirambo
Abakinnyi ba Rayon Sports bishimira igitego cya mbere
Mugheni Fabrice agerageza gutsindisha umutwe umupira wari uhise kuri Wilonja Jacques
Abakinnyi ba Rayon Sports bishimira igitego cya kabiri
Umunyezamu wa Espoir FC, Ndikuriyo Patient, yakomerekeye muri uyu mukino ajyanwa kwa muganga
Rayon Sports yakiniraga cyane ku izamu rya Espoir FC
Umutoza wa Espoir FC, Rukundo Jean de Dieu abaza bagenzi be niba hari ibyo bahindura
Iraduunda Axel w'imyaka 17 yakinnye umukino wa mbere muri Rayon Sports
Mugisha Gilbert yatsinze igitego ku mupira yatereye inyuma y'urubuga rw'amahina
Mugisha Gilbert ajya kwishimira igitego imbere y'abafana be
Abakinnyi ba Espoir FC basa n'abacitse intege nyuma yo gutsindwa igitego cya gatatu
Habimana Hussein na Mugisha Gilbert bashimirwa n'abafana
Rugwiro Herve yahushije uburyo bwiza muri uyu mukino
Abafana ba Rayon Sports bishimira igitego cyo kwishyura Etincelles FC yatsinze APR FC
Abafana ba Rayon Sports bashimishijwe n'intsinzi yabo ndetse no kunganya kwa APR FC i Rubavu

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .