Rayon Sports yamaze kumvikana n’ikipe yo mu Misiri yifuza Muhire Kevin

Yanditswe na Ngabo Roben
Kuya 16 Ugushyingo 2018 saa 08:54
Yasuwe :
0 0

Umukinnyi wo hagati wa Rayon Sports, Muhire Kevin, agiye kwerekeza muri Misr lel-Makkasa Sporting Club, ikipe iri ku mwanya wa kane muri shampiyona ya Misiri.

Ubuyobozi bw’ikipe ya Rayon Sports bwamaze kwemerera uyu mukinnyi kwerekeza muri iyi kipe, aho yashimwe kubera uko yitwaye mu matsinda na ¼ cya CAF Confederations Cup 2018 by’umwihariko ku mikino ya USM Alger, Gor Mahia FC na Enyimba FC.

Misr lel-Makkasa Sporting Club itozwa n’Umunya-Misiri Talaat Youssef, yifuje Muhire kuva mu Ukwakira ariko ntiyemererwa kwerekeza muri iyi kipe nkuko IGIHE yabitangarijwe na Visi Perezida wa Rayon Sports, Muhirwa Freddy.

Ati “Twavuganye n’ikipe yo mu Misiri yifuza Kevin n’umukinnyi yavuganye nayo kandi arabishaka. Twamwemereye kujyayo kuko bifuza kumugerageza ibyumweru bibiri. Ibijyanye n’amafaranga bazaduha nibamushima twamaze kuyumvikanaho kandi twizeye ko bizagenda neza.”

Tariki 22 Ugushyingo 2018 nibwo Muhire Kevin asabwa kuba yageze mu Mujyi wa Cairo agatangira imyitozo n’igeragezwa rizasozwa tariki 6 Ukuboza 2018.

Amakuru agera kuri IGIHE yemeza ko ubuyobozi bwa Misr lel-Makkasa Sporting Club bwemeye ko umukinnyi nibamushima bazishyura ibihumbi 45 by’amadolari muri Rayon Sports, yari afitiye amasezerano y’umwaka umwe.

Iyi kipe iri ku mwanya wa kane muri shampiyona y’icyiciro cya mbere mu Misiri igeze ku munsi 14, aho ifite amanota 20 irushwa na Zamalek SC iyoboye urutonde amanota atandatu.

Ni ikipe yakinnye CAF Champions League uyu mwaka yakirira imikino yayo kuri ‘Al-Fayoum Stadium’ yakira abantu ibihumbi 20.

Imwe mu mikino yatumye Muhire Kevin ashimwa harimo uwo bahanganyemo na USM Alger
Muhire Kevin agiye kwerekeza mu igeragezwa mu Misiri
Ibaruwa ya Misr lel-Makkasa isaba Muhire Kevin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza