00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports ‘yakebuye’ Ferwafa ku mwanzuro w’abakinnyi ikipe yemerewe kwandikisha

Yanditswe na Iradukunda Olivier
Kuya 30 Ukuboza 2022 saa 10:26
Yasuwe :

Inkundura y’isoko ry’igura n’igurisha mu Rwanda yatangiye, amakipe amwe n’amwe atangira kugongwa n’umwanzuro wo kutarenza umubare w’abakinnyi 30. Iyi ni yo mpamvu ubuyobozi bwa Rayon Sports bwibukije Ishyirahamwe Nyarwanda rya Ruhago, FERWAFA, ko uwo mwanzuro unyuranye n’ibyemeranyijweho.

Tariki ya 23 Ukuboza 2022 ni bwo abanyamuryango ba FERWAFA barimo na Rayon Sports babonye ubutumwa bubamenyesha ko nta kipe yemerewe kurenza abakinnyi 30 igomba gukoresha mu mwaka w’imikino wa 2022/2023.

Ibi FERWAFA yabyanditse ishingiye ku ngingo ya 34 mu mategeko agenga amarushanwa yayo.

Iyi baruwa yanditswe ahanini igambiriye kumenyesha amakipe ibirebana n’ingengabihe y’igice cya kabiri cya Shampiyona, ariko hiyongeramo igika kiyibutsa kutarenza umubare wemewe wo kwandikisha abakinnyi.

Rayon Sports ihagarariwe na Perezida Uwayezu Jean Fidèle yanditse ibaruwa igaragariza FERWAFA ko uwo mwanzuro bamenyeshejwe utakurikije amategeko.

Mu ibaruwa yanditse mu izina ry’ikipe ku wa 28 Ukuboza 2022, yagize ati “Dushingiye kuri iyo baruwa, dusanga Umunyamabanga mukuru ataributse ko ibiri muri iyi baruwa binyuranye n’itegeko No 033/FERWAFA/2022.”

“Aho muri iri tegeko Umunyamabanga Mukuru wa Ferwafa, yamenyesheje abanyamuryango ko ashingiye ku myanzuro y’inama y’abagize Inteko Rusange ya FERWAFA yo ku wa 5 Mutarama 2022, ubusabe bwa bamwe mu banyamuryango bwo kongera umubare w’abakinnyi buri kipe yemerewe kwandikisha, bakava kuri 30 bakiyongeraho batatu bakaba 33.”

Perezida Uwayezu yakomeje asaba ko amabwiriza asanzwe ariho bagenderagaho, ariyo yakomeza kubahirizwa kugeza igihe hazasohoka andi ayasimbura.

Umuvugizi wungirije wa FERWAFA, Jules Karangwa, yabwiye IGIHE ko uyu mwanzuro wari warafashwe ugamije guhangana n’ingaruka za COVID- 19.

Yagize ati “Mu nama abanyamuryango bagiranye n’ubuyobozi, bemeranyijwe ko hongerwaho abo bakinnyi kuko twari turi guhangana na Covid-19.’’

“Ubu biratandukanye kandi n’amakipe twayamenyesheje ko dusubira ku biteganywa n’amabwiriza. Ni ikibazo cyo gusobanura amabwiriza, ayo bavuga [Rayon Sports] ni ay’umwaka ushize. Umwaka ushize twari muri COVID-19. Byari bisanzwe ko abakinnyi ari 33 ariko byakozwe bamaze kubisaba.’’

Karangwa yavuze ko bazasubiza Rayon Sports ariko “Umwanzuro wo ni uko umeze.’’

Ikibazo cyo kutarenza umubare mu bakinnyi cyaje nyuma yo gusanga Rayon Sports yemerewe kwinjiza abakinnyi batatu gusa biyongera kuri 27 isanganywe.

Benshi mu bo isanganywe bari ku rwego rwo hasi, abandi bibasiwe n’imvune ku buryo kwinjizamo abashya ari bwo buryo bwashoboraga kuyifasha kongera kwinjira mu makipe ahanganiye Igikombe cya Shampiyona.

Rayon Sports iheruka kwakira Umunye-Congo Héritier Luvumbu Nzinga wayihozemo, witegura gusinya amasezerano y’amezi atandatu. Iyi kipe iranatekereza ku kwinjiza abandi nka Ismaila Moro ukinira Etincelles FC n’Umunya-Maroc Youssef Rhab wigeze kuyikinira nk’intizanyo ya Raja Casablanca.

Perezida wa Rayon Sports, Uwayezu Jean Fidèle, yavuguruje FERWAFA ku mwanzuro wayo wo kutarenza abakinnyi 30
Rayon Sports yemerewe kongera abakinnyi batatu mu bo yamuritse mu ntangiriro z'umwaka w'imikino wa 2022/2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .