00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yacubije Bugesera FC, Police FC itsinda Gasogi United mu mikino ya gicuti

Yanditswe na Bukuru JC
Kuya 19 Ukwakira 2021 saa 09:21
Yasuwe :
0 0

Rayon Sports yatsinze Bugesera FC igitego 1-0 mu gihe Police FC yihanije Gasogi United iyitsinda ibitego 3-1 mu mikino ya gicuti yabereye kuri Stade ya Kigali kuri uyu wa Kabiri.

Amakipe yombi yakinnye uyu mukino mu rwego rwo kwitegura Shampiyona ya 2021/22 izatangira ku wa 30 Ukwakira 2021.

Bugesera FC yari itaratsindwa mu mikino ine ya gicuti yakinnye, yari hejuru mu minota ya mbere ariko nta buryo bukomeye yabonye bugana mu izamu.

Byasabye gutegereza umupira w’umuterekano watewe na Mugisha Didier ubwo Niyongira Danny yari akiniwe nabi na Mutatu Manace Mbedi, ariko Rayon Sports itabarwa n’Umunyezamu Hategekimana Bonheur.

Ikipe y’umutoza Masudi Djuma na yo yatangiye gusatira ndetse ihusha uburyo bwiza ku mupira Chrismar Malta Soares yahawe na Youssef Rharb.

Umunyezamu wa Bugesera FC, Nsabimana Jean de Dieu ’Shaulin’ yakoze ikosa ryo kudakomeza umupira wari uvuye mu ruhande, ariko ku bw’amahirwe atabarwa na Mucyo Junior Didier wawuteranye Malta Soares.

Nyuma y’iminota itatu igice cya kabiri gitangiye ni bwo Rayon Sports yabonye igitego kuri koruneri yatewe na Iranzi Jean Claude, Ekele Samuel David wa Bugesera FC aritsinda.

Rayon Sports yashoboraga kubona igitego cya kabiri ku mupira wazamukanywe na Chrismar Malta Soares, ariko agorwa no kuroba umunyezamu Nsabimana wahise awumukuraho.

Sadick Sulley na Baransananiye Jackson bafashije Bugesera FC gusatira mu minota ya nyuma, bagorwa n’ubwugarizi bwarimo Niyigena Clément, Ndizeye Samuel, Iranzi Jean Claude na Nizigiyimana Karim Mackenzie.

Undi mukino wa gicuti wabaye uyu munsi kuri Stade ya Kigali, warangiye Police FC itsinze Gasogi United ibitego 3-1.

Ndayishimiye Antoine Dominique yatsinze ibitego bibiri mu minota ine ibanza mbere y’uko Sibomana Patrick atsinda icya gatatu ku munota wa 27.

Igitego rukumbi cya Gasogi United cyinjiye ku munota wa nyuma w’inyongera ku mupira uteretse watsinzwe na Bugingo Hakim nyuma y’ikosa Rwabugiri Umar yakoreye kuri Hassan Djibrine, ahabwa ikarita itukura.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .