Uyu mutoza bigarutseho nyuma yo kwegukana Igikombe cy’Amahoro anyagiye Indahangarwa WFC ibitego 4-0.

Aganira n’itangazamakuru, Rwaka yatangaje ko Rayon Sports ari ikipe nziza ariko ikeneye abakinnyi nka batanu bashya kugira ngo izabashe kwitwara neza mu Mikino Nyafurika.

Yagize ati “Dufite ikipe nziza ariko turacyakeneye abakinnyi kugira ngo ikipe yitware neza. Navuga ko hakenewe nk’abakinnyi batanu cyangwa batandatu kuko hakenewe imbaraga nyinshi kugira ngo tuzabashe guhatana ku ruhando mpuzamahanga.”

Umwaka wa mbere mu Cyiciro cya Mbere wagendekeye neza cyane Rayon Sports dore ko yawutwaye Igikombe cya Shampiyona ndetse n’icy’Amahoro.

Ibi biyihesha itike yo kuzitabira Amarushanwa Nyafurika. Iyi kipe izaserukira u Rwanda mu mikino ya TOTAL Energies CAF Women’s Champions League Zonal Qualifiers iteganyijwe muri Kanama 2024.

Ikipe izasoza iyi mikino iri ku mwanya wa mbere (Zonal Winners) niyo yitabira Imikino ya Champions League nyirizina (TOTAL Energies CAF Women’s Champions League).

Rayon Sports WFC yegukanye ibikombe byose bikinwa mu mwaka muri Ruhago y'Abagore

Umutoza wa Rayon Sports y’Abagore, Rwaka Claude yavuze ko iyi kipe ikeneye abakinnyi batari munsi ya batanu kugira ngo izabashe kwitwara neza mu Mikino Nyafurika