Uyu mukino watangiriye mu mvura nyinshi cyane ndetse byahise biba ngombwa ko abari bishyuye mu myanya isanzwe bahita birukira ahatwikiriye.

Ku munota wa karindwi, Moussa Camara yacomekewe umupira mwiza na Iraguha Hadji ariko uyu Munya-Mali ananirwa kuroba Umunyezamu Kimenyi Yves ngo afungure amazamu ku ruhande rwa Rayon Sports.

Gikundiro yatangiye kwiharira umupira, gusa umukino ugakomeza gukinirwa hagati mu kibuga cyane.

Ku munota wa 18, Héritier Luvumbu yateye ishoti rikomeye ari hanze y’urubuga rw’amahina ariko umupira ujya hejuru gato y’izamu.

Rayon Sports yari hejuru muri iyi minota yongeye guhusha uburyo bukomeye ku mupira Luvumbu yacomekeye Joackiam Ojera, ariko awuhinduye imbere y’izamu habura uwukoraho ngo atsinde igitego.

Ku munota wa 30, Raphael Osaluwe yagize imvune ndetse asohoka mu kibuga arira, Umutoza Haringingo Francis amusimbuza Kanamugire Roger.

Ikipe yambara Ubururu n’Umweru yongeye guhusha igitego cyari cyabazwe, ku mupira Luvumbu yateye kuri coup franc Mucyo Didier Junior awutera yigaramye uca hanze gato y’izamu.

Umukino wakomeje gukinirwa hagati mu kibuga, habura ikipe ireba mu izamu ry’indi. Igice cya mbere cyarangiye amakipe yombi anganya 0-0.

Kiyovu Sports yatangiranye imbaraga nyinshi igice cya kabiri cyane ko mu minota itanu yacyo ya mbere yari imaze guhusha uburyo bubiri bwashoboraga kuvamo igitego.

Ku munota wa 61, Nkurunziza Félicien yasimbuye Ganijuru Elie, Mussa Esenu afata umwanya wa Moussa Camara.

Rayon Sports yongeye kuyobora umukino ariko uburyo bwinshi yageragezaga ku bakinnyi bayo nka Ojera, Luvumbu na Esenu ntibubyare umusaruro.

Mu minota ya nyuma Kiyovu yasatiriye bikomeye ariko uburyo bwinshi yabonaga ntibugire icyo bubyara.

Umukino warangiye amakipe yombi anganya 0-0, uba uwa munani Rayon Sports imaze idatsinda Kiyovu Sports, ndetse ni uwa kabiri wikurikiranya inaniwe kubonamo amanota atatu mbere yo gusura APR FC, tariki 12 Gashyantare 2023 mu mukino uzabera kuri Stade Mpuzamahanga ya Huye.

Indi mikino yabaye uyu munsi, Marines FC yatsinze Rwamagana City ibitego 3-2, Espoir FC yanganyije na Bugesera FC igitego 1-1, Musanze FC inganya na Etincelles 0-0.

Umunsi wa 18 wa shampiyona wasojwe APR FC ikomeje kuyobora n’amanota 37, Gasogi United iri ku mwanya wa kabiri n’amanota 35, AS Kigali na Rayon Sports zifite 33 na Kiyovu ku mwanya wa gatanu n’amanota 32.

Inkuru wasoma: Rayon Sports yanganyije na Kiyovu Sports mbere yo guhura na APR FC- Uko umukino wagenze (Amafoto)

Kapiteni wa Kiyovu Sports, Kimenyi Yves yahawe icyapa cyanditseho ubutumwa bwa 'Gerayo Amahoro' bwa Polisi y'Igihugu bukumira impanuka zo mu muhanda

Na Kapiteni wa Rayon Sports, Mugisha François 'Master' na we yahawe ubu butumwa

Abayobozi b'amakipe batangiye basuhuza abakinnyi ku mpande zombi. Aha Perezida wa Rayon Sports, Uwayezu Jean Fidèle yaramukanyaga na Mussa Camara

Umukinnyi mushya wa Rayon Sports, Joackiam Ojera akora mu kiganza cya Perezida w'iyi Kipe, Uwayezu Jean Fidèle

Perezida wa Rayon Sports, Uwayezu Jean Fidèle asuhuza Kapiteni w Kiyovu Sports, Kimenyi Yves

Perezida wa Kiyovu Sports Limited, Mvukiyehe Juvénal asuhuza abakinnyi mbere y'uko umukino utangira

Aha yari ageze kuri Bigirimana Abeddy aramwongorera mbere y'uko agenda

Ifoto y'urwibutso hamwe n'abanyacyubahiro

Abakinnyi 11 babanjemo ku ruhande rwa Kiyovu Sports

Abakinnyi 11 babanjemo ku ruhande rwa Rayon Sports

Umunya-Nigeria ukina hagati ha Rayon Sports, Rafael Osalue witwaye neza mu gice cya mbere

Abafana imitima yari ihagaze

Umunyezamu wa Rayon Sports, Hategekimana Bonheur ni uku yifashe nyuma y'uko Ikipe ye ihushije uburyo bwari bwabazwe

Uruganda rwenga ibinyobwa rwa Skol rwari rwateye ihema kuri Stade ya Muhanga ku buryo ntwa wishwe n'icyaka

Umurundi Bigirimana Abeddy ahanganye na Kapiteni wa Rayon Sports, Mugisha François n'Umunye-Congo, Luvumbu Nzinga

Umugande, Rayon Sports yatijwe na URA, Joachiam Ojera yitwaye neza mu mukino we wa mbere ahura n'Ikigugu Kiyovu Sports

Umuyobozi w'amarushanwa muri FERWAFA, Karangwa Jules akurikirana uyu mukino

Nyiri Skol ku Isi, Thibault Relecom ubwo yari ageze kuri Stade ya Muhanga gukurikirana umukino wahuzaga Kiyovu Sports na Rayon Sports nk'Umufatanyabikorwa w'Uruganda abereye Umuyobozi

Umunye-Congo, Héritier Luvumbu Nzinga ahanganye n'abakinnyi ba Kiyovu Sports

Nyuma y'uko igice cya mbere kirangiye, abakinnyi ba Kiyovu Sports babanje gukora inama mbere yo kujya mu rwambariro

Ivi rya Raphael Olise Osalue ryongeye kugira ikibazo asimburwa mu gice cya mbere

Yagiye mu rwambariro asindagizwa na Muvandimwe Jean Marie Vianney

Yagarutse igice cya kabiri gitangiye yicara mu myanya y'icyubahiro ababara cyane

Nyiri Skol ku Isi, Thibault Relecom yakurikiye uyu mukino hamwe n'umuryango we

Visi Perezida wa mbere wa Kiyovu Sports, Mbonyumuvunyi Abdul Karim yakurikiye uyu mukino ari kumwe n'umufasha we Mushambokazi Jordan wari mu bakobwa bitabiriye irushanwa rya Nyampinga w'u Rwanda 2018

Kayitaba Jean Bosco ukinira Police FC yakurikiye uyu mukino

Ushinzwe igura n'igurisha ry'abakinnyi n'abatoza muri APR FC, Mupenzi Eto yarebye uyu mukino

Abatoza b'Ikipe y'Igihugu Amavubi, Umukuru Carlos Alos Ferrer n'Umwungiriza Jacint Magriña Clemente barebye uyu mukino

Perezida wa Kiyovu Sports Limited, Mvukiyehe Juvenal na Perezida wa Kiyovu Sports Association, Ndorimana Jean François Régis bari bicaranye bareba uko Ikipe yabo iri kwitwara

Umuvugizi wa Rayon Sporta, Nkurunziza Jean Paul areba uko Ikipe ye ikina

Perezida wa Gasogi United, Kakooza Nkuriza Charles 'KNC' ari kumwe n'Umusifuzi mpuzamahanga Uwikunda Samuel bakurikiye umukino

Perezida wa Rayon Sports, Uwayezu Jean Fidèle ntiyari yishimye Ikipe ye itarabona igitego

Uwayezu yari yicaranye n'Uwahoze ari Minisitiri w'Intebe, Makuza Bernard

Umuyobozi ushinzwe Itangazamakuru n'Itumanaho muri AS Kigali, Kankindi Anne-Lise Alida yajyanaga n'umukino

Abafana bakoze iyo bwabaga ariko igitego kirabura

Ingoma bavugijwe ku bwinshi

Skol yegereje abafana icyo kunywa

Abafana ba Kiyovu n'ubwo bari bake ariko bafannye biratinda

Rutahizamu w'Umunya-Mali, Moussa Camara akaraba mu maso nyuma yo gusimburwa

Umutoza wa Rayon Sports, Haringongo Francis acungana n'iminota ngo arebe ko yabona igitego

Myugariro Rwatubyaye Abdul yagaruraga umupira uko warengaga ngo arebe ko Rayon Sports yabona igitego

Wari umukino urimo ishyaka ryinshi

Amafoto: Ntare Julius

Video: Mugisha Dua