00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports na Kiyovu SC zasabye kwakirira imikino yazo i Muhanga

Yanditswe na Byiringiro Osée Elvis
Kuya 4 Mutarama 2023 saa 06:18
Yasuwe :

Ikipe ya Rayon Sports n’iya Kiyovu Sports zamaze kwandikira Akarere ka Muhanga zigasaba kuzakirira imikino yo kwishyura ya Shampiyona kuri Stade ya Muhanga.

Amakuru IGIHE yamenye ni uko Rayon Sports yanditse ibaruwa mu mpera z’icyumweru gishize, mu gihe Kiyovu Sports yo yanditse muri iki cyumweru.

Ibi bibaye nyuma y’uko mu mpera z’umwaka ushize wa 2022, FERWAFA yamenyesheje amakipe yari asanzwe yakirira imikino yayo kuri Stade ya Kigali ko igiye guterwamo ubwatsi bushya, bityo akaba agomba gushaka ahandi azerekeza.

Amakipe arebwa n’iki cyemezo arimo Police FC, AS Kigali, Kiyovu Sports, Rayon Sports, Gasogi United FC, Gorilla FC, APR FC ndetse n’Ikipe y’Igihugu "Amavubi".

Umuyobozi w’Akarere ka Muhanga wungirije ushinzwe Imibereho myiza y’Abaturage, Mugabo Gilbert, yemeje ko amakipe abiri yanditse asaba kuzakirira imikino yayo i Muhanga.

Yagize ati "Yego Rayon Sports na Kiyovu zasabye kuzakirira imikino yazo hano. Ntabwo twabangira, tuzabasubiza bitarenze ejo.”

Biteganyijwe ko Akarere ka Muhanga kazasubiza aya makipe ku wa Kane, tariki 5 Mutarama 2023, mbere ya saa Sita.

Stade ya Kigali yafunzwe kugira ngo ivugururwe ndetse byitezwe ko iyo mirimo izihutishwa ku buryo bukomeye kugira ngo izakire umukino uzahuza abakanyujijeho bazitabira Inama ya FIFA izabera mu Rwanda muri Werurwe 2023.

Andi makipe nka Gasogi United na AS Kigali azajya yakirira kuri Stade y’Akarere ka Bugesera.

Kiyovu Sports na Rayon Sports zasabye kwakirira imikino yo kwishyura i Muhanga
Stade ya Muhanga isanzwe ikoreshwa na AS Muhanga kuri ubu iri mu Cyiciro cya Kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .