Rayon Sports na Kiyovu SC mu makipe yahawe igihe ntarengwa cyo gushaka abandi batoza

Yanditswe na Eric Tony Ukurikiyimfura
Kuya 19 Gashyantare 2020 saa 08:58
Yasuwe :
0 0

Ishyirahamwe Nyarwanda ry’Umupira w’Amaguru (FERWAFA) ryasabye amakipe amaze iminsi atozwa n’abatoza batabifitiye ubushobozi ko afite igihe kingana n’ukwezi kumwe akaba yashyizeho abafite ibyangombwa bisabwa.

Mbere y’uko uyu mwaka w’imikino wa 2019/20 utangira, FERWAFA yasobanuriye amakipe gahunda ya “Club Licensing” iyafasha kubaho kinyamwuga, akaba ari na yo yagendeweho hatangwa uruhushya rwo kwitabira amarushanwa.

Iyi gahunda ikubiyemo no gutozwa n’abatoza babifitiye ubushobozi, aho amakipe yo mu cyiciro cya mbere agomba gutozwa n’abafite ibyangombwa by’ubutoza bya CAF, Licence A cyangwa B.

Shampiyona yatangiye mu Ukwakira buri kipe ifite umutoza wujuje ibisabwa, ariko nyuma y’ukwezi kumwe, amakipe atandukanye yahise atangira kwirukana abatoza bakuru kuva kuri Mukura Victory Sports kugera kuri Etincelles, yagiye atandukana n’abatoza bakuru, asigarana abungirije badafite ibyangombwa bisabwa.

Kuri uyu wa Gatatu tariki ya 19 Gashyantare 2019, FERWAFA yongeye kwibutsa amakipe ko agomba gutozwa n’ababifitiye ubushobozi.

Yagize iti “Komite Nyobozi ya FERWAFA yemeje ko igihe ntarengwa umutoza utujuje ibisabwa azajya amara atoza ikipe yatandukanye n’umutoza wari ubyujuje kubera impamvu zinyuranye ari ukwezi kumwe (iminsi 30) kubarwa uhereye igihe ikipe yatandukaniye n’uwo mutoza.”

FERWAFA ivuga ko amakipe atazashyira mu bikorwa ibi yasabwe uhereye igihe yabimenyesherejwe, ahabwa ibihano birimo no kwamburwa uruhushya yahawe rwo kwitabira amarushanwa.

Kugeza ubu amakipe atozwa n’abatoza batabifitiye ibyangombwa bisabwa ni: Rayon Sports, Kiyovu Sports, Etincelles FC, Espoir FC (bivugwa ko yirukanye Rukundo Jean De Dieu mu ibanga) na Gicumbi FC.

Rayon Sports igomba gushaka umutoza mukuru nyuma y'uko Kirasa Alain wayisigaranye nyuma yo gutandukana na Javier Martinez Espinoza, adafite ibyangombwa byemewe byo gutoza mu cyiciro cya mbere
Ruremesha Emmanuel wasigaranye Kiyovu Sports na we ntabwo yemerewe gutoza mu cyiciro cya mbere
Umutoza wa Gicumbi FC, Banamwana Camarade yasigaranye ikipe nyuma yo kwirukanwa kwa Nduwantare Jean Marie Vianney ukomoka mu Burundi, mu Ugushyingo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza