00:00:00 IGIHE NETWORK KN KINYARWANDA EN ENGLISH FR FRANCAIS

Rafael Benitez yirukanywe muri Everton

Yanditswe na IGIHE
Kuya 16 January 2022 saa 07:09
Yasuwe :

Everton yirukanye Umutoza Rafael Benitez nyuma y’ibihe bisharira iyi kipe imazemo iminsi byatumye ibona intsinzi imwe muri Shampiyona y’u Bwongereza kuva muri Nzeri 2021.

Iyi kipe yo mu Bwongereza yafashe icyemezo cyo kwirukana Rafael Benitez nyuma y’amezi atandatu n’igice yari amaze ayitoza.

Iki cyemezo cyatangajwe nyuma y’umukino wabaye ku wa Gatandatu warangiye Everton itsinzwe na Norwich ibitego 2-1.

Sky Sports News yanditse ko Ikipe ya Everton izwi nka ‘The Toffees’ yatsinze umukino umwe muri Shampiyona y’u Bwongereza [Premier League] kuva muri Nzeri 2021. Kuri ubu iri ku mwanya wa 15.

Benitez wahoze atoza Liverpool yagizwe Umutoza wa Everton mu mpeshyi z’umwaka ushize ariko uyu Munya-Espagne ntiyagiriye ibihe byiza ku kibuga cya Goodison Park.

Mu mikino 22 Rafael Benitez yatoje, yatsinze irindwi ari umutoza mukuru wa Everton.

Everton yirukanye Benitez nyuma y’uko abafana bari bamaze iminsi basaba ko yirukanwa kubera umusaruro nkene.

Abafana ba Everton baheruka kwitwaza icyapa ku kibuga basaba ko yirukanwa nyuma yo gutsindwa umukino wahuje iyi kipe na Norwich kuri Carrow Road.

Everton yatsinzwe imikino icyenda muri 13 ya Shampiyona irimo uwo yatakaje imbere y’umukeba w’ibihe byose, Liverpool muri derby izwi nka Merseyside, warangiye inyagiwe 4-1. Uyu wiyongereye ku wo yatsinzwe na Watford irwana no kutamanuka ibitego 5-2.

Everton yatangaje ko umutoza mushya uzahabwa ikipe azatangazwa mu minsi iri imbere.

Itangazo ry’ikipe rigira riti “Amakuru ku musimbura uhoraho azatangazwa mu gihe gikwiye.’’

Abahabwa amahirwe yo gusimbura Rafael Benitez barimo Wayne Rooney na Frank Lampard. Uru rutonde ruriho Roberto Martinez wahoze muri Everton, Graham Potter utoza Brighton, Rudi Garcia na Duncan Ferguson bazavamo ushobora guhabwa iyi kipe kugeza ku mpera za shampiyona.

Rafael Benitez yirukanywe muri Everton nyuma yo kuyitoza imikino 22, agatsinda irindwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .