Pyramids yageze ku kibuga cy’indege cya Kigali ahagana saa Tatu z’umugoroba, yakirwa n’umwe mu bakozi ba APR FC, Kabanda Tony, ndetse na babiri mu bo yari yohereje ngo bayitegurire urugendo rwo kuza mu Rwanda.

Aba bakaba bari bayishakiye imodoka ebyiri, zirimo imwe itatse amabara n’ibirango by’iyi kipe, aho izi ziherekejwe na Polisi y’u Rwanda zahise zifata umuhanda zerekeza kuri Kigali Convention Centre dore ko iyi kipe izaba icumbitse muri Radison Blu Hotel.

Ni ikipe imaze iminsi yitwara neza, aho nta gihe gishize itwaye igikombe cy’igihugu. Mu bakinnyi yitwaje harimo Mahmoud Saber na Ibrahim Adel bari kumwe n’ikipe y’igihugu ya Misiri yakuye umwanya wa kane mu mikino Olempike.

Ubwo bageraga i Kanombe, abatoza b’iyi kipe banze kugira icyo batangaza mbere y’ikiganiro n’abanyamakuru cyo ku wa Gatanu, gusa umwe mu bayiherekeje yavuze ko bizeye kwitwara neza bagasezerera APR FC muri iyi mikino.

Aya makipe yombi yari yahuye mu cyiciro nk’iki umwaka ushize, aho nyuma yo kunganyiriza i Kigali ubusa ku busa, Pyramids yaje kunyagirira APR FC mu Misiri ibitego 6-1.

Umukinnyi utazanye n’iyi kipe ni Umunya-Maroc Walid El Karti watsinze igitego cya kabiri, mu gihe Fiston Mayele azahurira na bagenzi be i Kigali nyuma yo gufasha Congo Kinshasa gutsindira Ethiopia muri Tanzania.

Mostafa Fathi (uri imbere)watsinze ibitego bine mu mukino amakipe aheruka guhuriramo na we yasesekaye i Kigali.

Pyramids yazanye abakinnyi 24 i Kigali gusa harimo abazahurira na yo mu Rwanda kubera bari mu makipe y'ibihugu byabo

Abatoza b'iyi kipe birinze kugira icyo batangaza mbere yo ku wa Gatanu

Iyi kipe yari yohereje itsinda ry'abantu batanu bo kuyiharurira inzira

Pyramids yari yateguye bisi itatse amabara yayo

Iyi bisi yahise itwara iyi kipe aho icumbitse kuri Radisson Blu Hotel

Amafoto: Remy Moses