00:00:00 IGIHE NETWORK KN KINYARWANDA EN ENGLISH FR FRANCAIS

PSG ya Messi yatsinze Riyadh All Star ya Ronaldo mu mukino w’ubusabane (Amafoto)

Yanditswe na IGIHE
Kuya 19 Mutarama 2023 saa 11:42
Yasuwe :

Paris Saint Germain ya Lionel Messi yatsinze Ikipe y’Intoranywa muri Shampiyona ya Arabie Saoudite iyobowe na Cristiano Ronaldo, ibitego 5-4 mu mukino wa gicuti.

Uyu mukino wagereranya n’uw’ubusabane wabereye kuri King Fahd International Stadium muri Arabie Saoudite ku mugoroba wo kuri uyu wa Kane, tariki ya 19 Mutarama 2023.

Ikipe yari iyobowe na Cristiano yari igizwe n’abakinnyi barimo aba Al Nassr ya Cristiano ndetse n’aba Al Hilal.

Uyu mukino warebwe n’abafana 68.000; ugitangira PSG yo mu Bufaransa yahise ifungura amazamu ibifashijwemo na Lionel Messi.

Riyadh Allstar yari iyobowe na Cristiano yakomeje gukomanga kugeza ku munota wa 34 ubwo uyu rutahizamu ukomoka muri Portugal yayiboneye igitego cyo kwishyura; cyabonetse kuri penaliti.

PSG yahabwaga amahirwe na mbere y’umukino yakomeje kuwiharira ndetse ku munota wa 42 ibifashijwemo na myugariro wayo Marcos Aoás Corrêa [Marquinhos] yatsinze igitego cya kabiri.

Igice cya mbere kigana ku musozo, mu minota ine y’inyongera ni bwo Cristiano Ronaldo yatsinze igitego cya kabiri cya Riyadh Allstars nyuma y’amakosa yakozwe na Sergio Ramos, wananiwe gukuramo umupira uyu mukinnyi yari amaze gutera n’umutwe, akananirwa kuwukuramo ukamugarukira agahita atera ishoti riremereye.

PSG yamaze igihe kinini ikina ituzuye nyuma y’uko Juan Bernat yari amaze guhabwa ikarita itukura. Yayibonye ku munota wa 38 akiniye nabi Salem al-Dawsari.

Igice cya mbere cyarangiye PSG inganya na Riyadh Allstar 2-2. Ni iminota yaranzwe no kwiyerekana kwa Messi na Ronaldo.

Muri uyu mukino kandi Neymar yahushije penaliti yakuwemo neza na Mohammed al Owais.

Sergio Ramos yatsindiye Paris Saint Germain igitego cya gatatu ku munota wa 53 mbere y’uko ku wa 56 Riyadh Allstar yishyurirwa na Jang Hyun-soo.

Kylian Mbappé yatsindiye PSG igitego cya kane cyabonetse kuri penaliti ku munota wa 60.

Abakinnyi bakomeye barimo Cristiano Ronaldo wa Riyadh Allstar ndetse na Messi na Mbappé ba PSG basimbuwe umukino ugeze mu minota ya nyuma.

Mu gihe Riyadh Allstar yisuganyaga ishaka kwishyura, PSG yayitsinze igitego cya gatanu cyinjijwe na Hugo Ekitike ku munota wa 78.

Anderson Talisca yagabanyirije Riyadh Allstar ikinyuranyo, atsinda igitego cya kane cyabonetse mu minota y’inyongera. Umukino warangiye PSG itsinze Riyadh Allstar ibitego 5-4.

Uyu mukino ni wo wa mbere Cristiano yakinnye muri Arabie Saoudite kuva yasinyira Al Nassr avuye muri Manchester United. Yaherukaga guhurira mu kibuga na Messi ubwo Juventus uyu Munya-Portugal yakiniraga yatsindaga FC Barcelona 3-0 mu Ukuboza 2020.

Mbere y’uyu mukino, Lionel Messi na Cristiano Ronaldo bahuriye mu kibuga inshuro 36 zirimo 16 zatsinzwe na Messi na 11 za Ronaldo.

Cristiano Ronaldo watsinze ibitego bibiri muri uyu mukino ni we watowe nk’umukinnyi mwiza mu gihe PSG yatsinze umukino yahawe igikombe cyiswe “Riyadh Season Cup”.

Messi ni we wafunguye amazamu ku ruhande rwa PSG
Cristiano Ronaldo asuhuzanya na Messi
Cristiano Ronaldo yatsinze ibitego bibiri muri uyu mukino
Yishimiraga ibitego muri bwa buryo bwe amenyereweho
Cristiano Ronaldo watsinze ibitego bibiri muri uyu mukino ni we watowe nk’umukinnyi mwiza
Abakinnyi ba PSG bishimira igikombe cyiswe “Riyadh Season Cup” bahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .