PSG vs Bayern Munich: Amakuru avugwa mu makipe yombi mbere y’umukino wa nyuma wa Champions League

Yanditswe na Eric Tony Ukurikiyimfura
Kuya 23 Kanama 2020 saa 08:27
Yasuwe :
0 0

Nyuma y’iminsi 12 muri Portugal hatangiye kubera imikino isoza irushanwa rya UEFA Champions League ry’uyu mwaka, rirashyirwaho akadomo kuri iki Cyumweru haba umukino wa nyuma uhuza Bayern Munich na Paris Saint-Germain kuri Estádio da Luz y’i Lisbon, guhera saa tatu z’ijoro.

Imikino isoza amarushanwa y’umupira w’amaguru i Burayi yabereye hamwe kubera icyorezo cya Coronavirus cyibasiye Isi.

Kuri iki Cyumweru, Bayern Munich irahatanira kwegukana igikombe cya Champions League ku nshuro ya gatandatu mu gihe Paris Saint-Germain aribwo bwa mbere igeze ku mukino wa nyuma.

Umutoza w’iyi kipe yo mu Budage iheruka kwegukana iri rushanwa mu 2013, Hansi Flick, yavuze ko nyuma yo gutsinda imikino 10 yose bakinnye muri Champions League y’uyu mwaka, bashaka kwegukana igikombe.

Ati “Ni umukino wihariye, twateye intambwe igana imbere mu buryo bwo kwiyubaka ndetse ikipe yiteguye gutanga buri kimwe no kugerageza kwegukana irushanwa.”

Thomas Tuchel utoza Paris Saint-Germain, we yavuze ko ari umukino ugoranye, ariko bifitiye icyizere.

Ati “Ntabwo biza kutworohera ariko dufite icyizere. Turiyumvamo ko twageze ku mukino wa nyuma tubikwiye. Twiteguye guhangana.”

Bayern Munich iraza kubanza gusuzuma niba myugariro wayo wo hagati, Jérôme Boateng w’imyaka 31, ameze neza nyuma yo gusimburwa mu mukino wa ½ batsinzemo Lyon, aho yagize ikibazo cy’imitsi.

Umufansa w’imyaka 24, Benjamin Pavard, ashobora kongera guhabwa iminota yo gukina nyuma yo gusimbura ku mukino wa Lyon yakinnye bwa mbere kuva avunitse tariki ya 4 Nyakanga.

Ku ruhande rwa Paris Saint-Germain, amakuru meza ahari ni uko ishobora kugarura umunyezamu wayo wa mbere, Keylor Navas, wavunikiye muri ¼ mu gihe Idrissa Gana Gueye na Marco Verratti nabo bashobora kwitabazwa.

Hansi Flick utoza Bayern Munich, yavuze ko kandi nubwo ikipe ye yitwaye neza muri iri rushanwa igatsinda ibitego byinshi birimo 8-2 yatsinze FC Barcelone muri ¼, iraza kwitondera ubusatirizi bwa Paris Saint-Germain burimo Neymar, Kylian Mbappé na Angel Di Maria.

Rutahizamu wa Bayern Munich, Robert Lewandowski umaze gutsinda ibitego 55 muri uyu mwaka w’imikino wa 2019/20, arabura ibitego bibiri kugira ngo agere ku gahigo ka Cristiano Ronaldo watsinze ibitego 17 mu mwaka umwe wa Champions League mu 2013/14.

Kylian Mbappé w’imyaka 21, watwaranye Igikombe cy’Isi n’u Bufaransa mu 2018, yavuze ko imwe mu ntego zatumye yerekeza muri Paris Saint-Germain harimo gutwara Champions League.

Ati “Buri gihe nahoze mvuga ko nshaka kwandika amateka mu mupira w’u Bufaransa. Mfite andi mahirwe yo kubikora ku Cyumweru. Iyo niyo mpamvu nyayo yatumye nza muri iyi kipe.”

Hashize imyaka 27 nta kipe yo mu Bufaransa itwara UEFA Champions League kuva Olympique Marseille ibigezeho mu 1993.

Bayern Munich na Paris St. Germain zahuye inshuro umunani mu matsinda y’iri rushanwa, PSG itsinda imikino itanu mu gihe Bayern yatsinze itatu irimo uheruka wo mu Ukuboza 2017.

Ni ku nshuro ya mbere PSG igiye gukina umukino wa nyuma wa Champions League, ikaba ikipe ya 41 ibigezeho. Amakipe atandatu aheruka kuwugeraho bwa mbere yaratsinzwe mu gihe iheruka kwegukana igikombe ku nshuro yayo ya mbere ikina umukino wa nyuma ari Borussia Dortmund yatsinze Juventus mu 1997.

Ni ku nshuro ya 11 Bayern Munich igeze ku mukino wa nyuma w’igikombe cy’irushanwa rikomeye i Burayi mu gihe Real Madrid ariyo yonyine yawukinnye kenshi kuyirusha (16). Bayern yaritwaye inshuro eshanu, Real Madrid (13), AC Milan (7) na Liverpool (6).

Umutoza wa Bayern Munich, Hansi Flick, ni umuntu wa gatandatu ubashije kugeza ikipe ku mukino wa nyuma nk’umutoza kandi na we yarawukinnye, abandi babikoze ni Miguel Munoz (Real Madrid), Vicente del Bosque (Real Madrid), Carlo Ancelotti (AC Milan), Pep Guardiola (Barcelona) na Zinedine Zidane (Real Madrid).

Flick yari muri Bayern Munich yatsinzwe ibitego 2-1 na Porto mu 1987, ndetse yaba ari we wa mbere utakaje iki gikombe nk’umukinnyi n’umutoza ari mu ikipe imwe.

Paris Saint Germain igiye gukina umukino wa nyuma wa UEFA Champions League ku nshuro ya mbere
Bayern Munich imaze kwegukana iri rushanwa inshuro eshanu mu nshuro 10 imaze gukina umukino wa nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .