Prince washimwe na David Luiz yatumye ikipe ye ifashwa na Kamoso ukina mu Bushinwa

Yanditswe na Eric Tony Ukurikiyimfura
Kuya 20 Ugushyingo 2019 saa 09:19
Yasuwe :
0 0

Ikipe y’abana ya Agaciro Football Academy yatangiye gufashwa na Nsengiyaremye Sylvestre ‘Kamoso’ ukina mu Bushinwa nyuma y’aho abonye amashusho ya Ishimwe Alonso Prince uyikinamo, wemeje David Luiz ubwo yerekanaga ubuhanga afite muri ruhago mu kwezi gushize, ubwo uyu mukinnyi wa Arsenal yari mu Rwanda.

Agaciro F.A ikinamo abana bakiri bato ikorera ku kibuga giherereye mu Murenge wa Kimironko, kuri Kigali Parents School muri Gakinjiro, nyuma yo kwimuka ivuye ahahoze ikibuga cya FERWAFA.

Rwibutso Claver utoza abana bo mu ‘Agaciro F.A’ yabwiye IGIHE ko igitekerezo cyo gushyiraho iyi kipe cyaje kigamije kuzamura umwana w’umunyarwanda ufite impano yo gukina umupira w’amaguru, aho afatanya n’ababyeyi b’abana.

Avuga ko iyo abana bamaze kugera ku rwego rwiza cyangwa abakuru bageze mu myaka 18, batangwa mu yandi makipe kugira ngo batangire kugera mu byiciro by’abakina umupira bashaka kubigira umwuga.

Ati” Hari abana dufite bavuye hano, muri ASPOR hari uwari uhamaze imyaka ibiri, namukuyemo mujyana muri Academie ya Rayon Sports, hari uri muri SEC Academy ndetse hari n’abo twohereza hanze bakajya kugerageza amahirwe.”

Rwibutso yabwiye IGIHE ko kugeza ubu zimwe mu mbogamizi iyi kipe ifite harimo ikibuga bakoreraho kuko usanga kigora abana kigatuma badashobora kwerekana ubuhanga bwabo.

Ati “Mu mbogamizi dufite, harimo n’ikibuga nk’iyo umwana ari gucenga biramugora, aranyerera cyangwa agahura n’umukuku. Tukiva ku kibuga cyiza hari abana bahise bareka umupira. Usanga ibura ry’ibikoresho n’ibibuga bituma abana batagaragaza impano zabo. Nk’uriya mwana washimwe na David Luiz ni umwana ufite impano, aramutse akurikiranwe yazagirira igihugu akamaro.”

Uyu mutoza yakomeje avuga ko kuri ubu ibikoresho birimo imipira bifashisha babihawe na Nsengiyaremye Sylvestre ‘Kamoso’ ukina mu Bushinwa, wishimiye ubuhanga bwa Ishimwe Alonso Prince nyuma yo kubona amashusho ye ubwo yerekanaga ibyo azi, anobagiza umupira imbere ya David Luiz ukinira Arsenal.

Ati" Mbere twafatanyaga n’ababyeyi gushaka ibikoresho. Ibyo nari mfite mbere nari nabihawe n’umutoza wo mu Budage, ariko ibi uburyo twabibonye ni umusore bita Kamoso ukina mu Bushinwa wabiduhaye nyuma y’uko tumenyanye biturutse kuri uriya mwana washimishije David Luiz.”

“ Yaravuze ngo kubera uburyo uyu mwana yahesheje igihugu agaciro, nanjye ikipe yabo nyemereye ibikoresho n’uwo mwana mwemereye inkweto zo gukinisha. Nta nkweto yari afite kuko ubwo bushobozi ababyeyi ntabwo bafite, n’imyenda akoresha ni iyo David Luiz yamuhaye. Prince yaje ari nk’umugisha mu Agaciro F.A”

Nsengiyaremye Sylvestre ‘Kamoso’ ukina mu cyiciro cya kabiri mu Bushinwa, yahuje kandi Agaciro F.A n’ikipe ya Jiangsu Sunning yo mu cyiciro cya mbere mu Bushinwa, inafite ikipe y’abato. Uyu mukinnyi yahaye iri shuri rizamura abana mu Rwanda imyambaro yo gukinisha, imipira yo gukina n’ibindi.

Aganira na IGIHE, Kamoso yavuze ko bitewe n’uko azi inzira yanyuzemo mu rugendo rwe akina umupira w’amaguru, byamuteye gufata iya mbere agashyigikira Agaciro Football Academy.

Ati” Urebye igitekerezo cyo kuguma gufasha aba babana nakigize kubera imbogamizi nahuye nazo mu mupira w’amaguru. Urumva buri gihe iteka numvaga hari abavuga ngo bafite imishinga ifasha abana ariko ugasanga umwana nta mupira afite, nta mwambaro wo gukinisha afite, nta muntu umufasha kuba yabyaza impano yifitemo umusaruro.”

“Nafatanyije na Claver nk’umuntu nasanze abifitiye ubumenyi muha inshingano zo kudacika intege no gukomeza kwita kuri abo bana kandi mwemerera ko ubushobozi buhari ntacyo abana bazabura.”

Rwibutso Claver utoza aba bana yize ibijyanye na Siporo muri Kaminuza mbere yo kuba umutoza, aho yari yungirije Kayiranga Baptiste muri Pépinière FC yakinnye icyiciro cya mbere. Nyuma y’aho yagiye gukora amahugurwa y’ubutoza mu Budage.

Uyu mutoza yasabye ababyeyi kureka abana bakabyaza umusaruro impano zabo ndetse asaba abana kubaha ababyeyi babo, bakaba inshuti nabo kugira ngo babahe ibyo babakeneyeho.

Ishimwe Alonso Prince yabwiye IGIHE ko ikimufasha kwitwara neza mu bana bakinana kugeza aho yemeje David Luiz wa Arsenal imbere y’abari muri Stade ya Kigali i Nyamirambo, ari uko ashyigikiwe n’ababyeyi be bamuha umwanya uhagije wo gukora ibyo ashaka ku mupira.

Ati” Mu rugo mfite umupira ndawuhorana, ndabyitoza. Papa abimfashamo akanyereka abakinnyi, haba hari umupira tukajyana kuwureba. Mu rugo bampa umwanya nkakora icyo nshaka ku mupira.”

Uyu mwana w’imyaka 11, avuga ko afite inzozi zo kuzakinira Arsenal akunda.

Ati” Nashakaga kwereka David Luiz ko nshoboye kuko numvaga yanjyana gukinira Academy ya Arsenal. Ndashaka kuzakinira Arsenal kuko ndayifana. Nkunda Aubameyang bitewe n’uburyo acenga akanatsinda.”

Kimwe na bagenzi be, ngo zimwe mu mbogamizi bahura na zo harimo kuba ikibuga bakorera kitameze neza ndetse na bimwe mu bikoresho bifashisha birimo imipira bikaba bishaje.

Ishimwe avuga ko mu bakinnyi b’Amavubi akunda Kagere Meddie kuko bakina ku mwanya umwe ndetse akaba amubonamo rutahizamu wujuje byose.

Abana bakorera mu Agaciro Football Academy ni abavuye mu bice bitandukanye byegereye aho yitoreza, bakaba bafite hagati y’imyaka itandatu na 18, aho abakuru bashakirwa amakipe mu cyiciro cya kabiri cyangwa hakagira aboherezwa hanze.

Rwibutso Claver utoza Agaciro Football Academy hamwe na Ishimwe Alonso Prince wahawe umwenda wa Arsenal na David Luiz, ubu akaba yohererejwe inkweto na Kamoso ukina mu Bushinwa
Aho abana bo mu Agaciro F.A bakinira haba hanyerera iyo imvura yaguye
Ni ikibuga kigizwe n'igice kinini kitarimo ubwatsi
Ikibuga usanga kitameze neza ku buryo abana bahakinira uko babishaka
Ishimwe Alonso Prince (wambaye umwenda wa Arsenal) akinana na bagenzi be
Isonga Football Academy ibamo ibyiciro by'abana batandukanye uhereye ku myaka itandatu
Harimo abakiri bato cyane
Umutoza Rwibutso Claver yereka abana uko bakina
Iyi kipe yabato yatangiye guhabwa ubufasha na Nsengiyaremye Sylvestre 'Kamoso' ukina mu Bushinwa
Imipira Agaciro Football Academy yahawe na Kamoso
Agaciro Fooball Academy izagira ubufatanye na academy y'ikipe ya Jiangsu Sunning yo mu Bushinwa
Nsengiyaremye Sylvestre bita Kamoso, akina mu cyiciro cya kabiri mu Bushinwa
Rwibutso Claver utoza Agaciro Football Academy ubwo yari asoje amahugurwa y'ubutoza yakoreye mu Budage mu myaka ibiri ishize

Amafoto: Mucyo Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza