Premier League: Tottenham na Liverpool zikomeje kugaragaza itandukaniro, Arsenal yo irasumbirijwe (Amafoto)

Yanditswe na Eric Tony Ukurikiyimfura
Kuya 7 Ukuboza 2020 saa 07:05
Yasuwe :
0 0

Umunsi wa 11 wa Shampiyona y’Icyiciro cya Mbere mu Bwongereza (Premier League) wakinwe mu mpera z’icyumweru, wasize Tottenham itsinze Arsenal ibitego 2-0, ikomeza kuyobora urutonde ikurikiwe na Liverpool yanyagiye Wolves 4-0.

Umukino wari kubimburira iyindi ku wa Gatanu tariki ya 4 Ukuboza, ugahuza Aston Villa na Newcastle United, ntiwabaye kubera ubwandu bwa COVID-19 bwagaragaye muri iyi kipe yo mu Mujyi wa Newcastle.

Kuwa Gatandatu tariki 5 Ukuboza 2020, ikipe ya Manchester City yatsinze Fulham ibitego 2-0, byatsinzwe na Raheem Sterling na Kevin de Bruyne, byayifashije gukomeza gusatira imyanya y’imbere ku rutonde.

Manchester United ibifashijwemo na Paul Pogba, Mason Greenwood na Marcus Rashford, yatsinze ibitego bitatu byo mu gice cya kabiri, imbere ya West Ham United yari yasoje igice cya mbere iyoboye umukino n’igitego 1-0 cyinjijwe na Tomas Soucek.

Chelsea yongeye kwitwara neza, itsinda Leeds United iyiturutse inyuma ku bitego 3-1, ibifashijwemo na Olivier Giroud, Kurt Zouma na Christian Pulisic mu gihe Leeds United yo yatsindiwe na Patrick Bamford.

Undi mukino wabaye ku wa Gatandatu, wasize Everton yongeye gutakaza amaota ubwo yanganyirizaga kwa Burnley igitego 1-1 nyuma yo gutsindirwa na Dominic Calvert-Lewin wishyuraga igitego cyatsinzwe na Robert Brady mu minota ya mbere.

Ku Cyumweru, tariki 6 Ukuboza 2020, Tottenham Hotspurs y’umutoza José Mourinho yongeye gushimangira ko ari ikipe yo kwitega muri uyu mwaka w’imikino, aho yatsinze Arsenal ibitego 2-0 bya Heung- Min Son na Harry Kane mu gice cya mbere.

Tottenham yakomeje kuba ku mwanya wa mbere n’amanota 24 inganya na Liverpool mu gihe Arsenal ifite amanota 13 mu mikino 11 ndetse ni bwo bwa mbere igize intangiriro mbi za Shampiyona kuva mu 1981/82 ubwo yagiraga amanota 12 mu mikino 11 ibanza.

Leicester City yisubije umwanya wa kane itsinze Sheffield United ibitego 2-1 mu gihe Crystal Palace yihereranye Westbromwich Albion iyisanze ku kibuga cyayo, iyinyagira ibitego 5-1.

Umukino waherutse iyindi mu mpera z’icyumweru, wahuje ikipe ya Liverpool na Wolverhampton Wanderers.

Liverpool imaza imikino 65 idatsindirwa mu rugo, yongeye kwerekana ko kuba yugarijwe n’imvune ntacyo byahinduye, inyagira Wolves ibitego 4-0.

Mohamed Salah yatsinze igitego kimwe cyabonetse mu gice cya mbere ku munota wa 24, Georginio Wijnaldum atsinda igitego cya kabiri ku munota wa 59 mu gihe ibindi byatsinzwe na Joel Matip ku munota wa 67 na Nelson Semedo witsinze ku munota wa 78.

Kuri uyu wa Mbere tariki 7 Ukuboza 2020, Brighton& Hove Albion irakira Southampton mu mukino utangira saa yine z’ijoro.

Uko amakipe yatsindanye ku munsi wa 11 wa Premier League

Ku wa Gatanu:

  • Aston Villa vs Newcastle United (Wasubitswe kubera COVID-19)

Ku wa Gatandatu:

  • Burnley 1-1 Everton
  • Manchester City 2-0 Fulham
  • West Ham United 1-3 Manchester United
  • Chelsea 3-1 Leeds United

Ku Cyumweru:

  • West BromwichAlbion 1-5 Crystal Palace
  • Sheffield United 1-2 Leicester City
  • Tottenham 2-0 Arsenal
  • Liverpool 4-0 Wolverhampton Wanderes

Ku wa Mbere:

  • 22:00 Brighton& Hove Albion vs Southampton

Uko amakipe akurikirana kugeza ubu:

  1. Tottenham, 24 pts (ibitego 14)
  2. Liverpool, 24 pts (ibitego icyenda)
  3. Chelsea, 22 pts
  4. Leicester City 21 pts
  5. Manchester United 19 pts (imikino 10)
  6. Manchester City 18 pts (imikino 10)
  7. West Ham United, 17 pts
  8. Southampton, 17 pts (imikino 10)
  9. Everton, 17 pts
  10. Wolves, 17 pts
  11. Crystal Palace, 16 pts
  12. Aston Villa, 15 pts (imikino icyenda)
  13. Newcastle United, 14 pts (imikino 10)
  14. Leeds United, 13 pts
  15. Arsenal, 13 pts
  16. Brighton &Hove Albion, 10 pts (imikino 10)
  17. Fulham, 7 pts
  18. Bunrley, 6 pts (imikino 10)
  19. West Bromwich Albion, 6 pts
  20. Sheffield United, 1 pt
Heung-Min Son atsinda igitego cya mbere cya Tottenham ku ishoti yatereye inyuma y'urubuga rw'amahina
Abafana ba Tottenham bishimira igitego nyuma yo kongera gusubira ku kibuga
Harry Kane yishimira igitego cya kabiri cya Tottenham
Harry Kane na Son Heung-Min bishimira igitego cya kabiri cya Tottenham
José Mourinho yishimira intsinzi y'ikipe ye imbere ya Arsenal
Arsenal y'umutoza Mikel Arteta ikomeje kwitwara nabi muri Premier League
Arsenal yasatiriye igice cya kabiri, ariko yananiwe gutsinda igitego
Thomas Partey yavuye mu kibuga nyuma yo kuvunika
Granit Xhaka ashaka inzira hagati y'abakinnyi ba Tottenham
Steven Bergwijn agerageza gucika Kieran Tierney wa Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .