Premier League: Liverpool na Manchester United zitwaye neza, Arsenal na Tottenham zongera gutsindwa

Yanditswe na Eric Tony Ukurikiyimfura
Kuya 21 Ukuboza 2020 saa 07:39
Yasuwe :
0 0

Shampiyona y’Icyiciro cya Mbere mu Bwongereza (Premier League) yakomeje mu mpera z’icyumweru gishize hakinwa umunsi wa 14 wasize Liverpool igumye ku mwanya wa mbere nyuma yo kunyagira Crystal Palace ibitego 7-0.

Muri uyu mukino wabimburiye indi ku wa Gatandatu, kuri Selhurst Park, Liverpool yafunguye amazamu hakiri kare ku gitego cyatsinzwe na Takumi Minamino ku munota wa gatatu mbere y’uko Sadio Mané atsinda icya kabiri mu gihe Roberto Firmino na Mohamed Salah batsinze bibiri kuri buri umwe, ikindi gitsindwa na Jordan Henderson.

Kuri St Mary’s Stadium, igitego cya Raheem Sterling cyo mu gice cya mbere, cyafashije Manchester City gutsinda Southampton 1-0 mu gihe Newcastle United yanganyije na Fulham y’abakinnyi 10 igitego 1-1.

Umukino w’umunsi wari uwahuje Everton na Arsenal kuri Goodison Park, warangiye ikipe y’umutoza Carlo Ancelotti itsinze ibitego 2-1. Ibitego bya Everton byatsinzwe na Rob Holding witsinze ku munota wa 22 na Yerry Mina ku munota wa 45 mu gihe Nicolas Pépé yari yishyuriye Arsenal kuri penaliti penaliti yabonetse ku munota 35.

Gutsindwa uyu mukino kuri Arsenal byatumye ikomeza kugira intangiriro mbi za Shampiyona, aho mu mukino 10 iheruka gukina yatsinzwemo irindwi, inganya ibiri, itsinda umwe wayihuje na Manchester United. Imaze kandi imikino irindwi yikurikiranya idatsinda.

Ku Cyumweru, Tottenham yatsinzwe umukino wa kabiri wikurikiranya ubwo yari yakiriye Leicester City ikayitsinda ibitego 2-0 ndetse ikayikura ku mwanya wa kabiri. Jamie Vardy yafunguye amazamu kuri penaliti yo mu gice cya mbere mu gihe Toby Alderweireld yitsinze mu gice cya kabiri.

Manchester United ibifashijwemo n’ibitego bibiri bya Bruno Fernandes, bibiri bya Scott McTominay, kimwe cya Daniel James ndetse n’ikindi cyatsinzwe na Victor Lindelof, yanyagiye abakeba bayo ba kera, Leeds United ibitego 6-2, biyihesha gufata umwanya wa gatatu. Liam Copoper na Stuart Dallas ni bo batsindiye ikipe y’umutoza Marcelo Bielsa.

Kuri uyu wa Mbere hateganyijwe imikino ibiri, aho Burnley yakira Wolves guhera saa moya n’iminota 30 mu gihe Chelsea ikina na West Ham United guhera saa Yine z’ijoro.

Uko amakipe yatsindanye ku munsi wa 14 wa Premier League:

Ku wa Gatandatu tariki ya 19 Ukuboza 2020

  • Crystal Palace 0-7 Liverpool
  • Southampton 0-1 Manchester City
  • Everton 2-1 Arsenal
  • Newcastle 1-1 Fulham

Ku Cyumweru tariki 20 Ukuboza 2020

  • Brighton&Hove Albion 1-1 Sheffield United
  • Tottenham 0-2 Leicester City
  • Manchester United 6-2 Leeds United
  • West Bromwich Albion 3-0 Aston Villa

Ku wa Mbere tariki 21 Ukuboza 2020

  • 19:30 Bunrley vs Wolverhampton Wanderers
  • 22:00 Chelsea vs West Ham United

Uko amakipe akurikirana

  1. Liverpool, amanota 31
  2. Leicester City, amanota 27
  3. Manchester United, amanota 26 (imikino 13)
  4. Everton, amanota 26
  5. Tottenham, amanota 25
  6. Southampton, amanota 24
  7. Manchester City, amanota 23 (imikino 13)
  8. Chelsea, amanota 22 (imikino 13)
  9. Aston Villa, amanota 22 (imikino 12)
  10. West Ham United, amanota 21 (imikino 13)
  11. Wolves, amanota 20 (imikino 13)
  12. Newcastle United, amanota 18 (imikino 13)
  13. Crystal Palace, amanota 18
  14. Leeds United, amanota 17
  15. Arsenal, amanota 14
  16. Brighton &Hove Albion, amanota 12
  17. Fulham, amanota 10
  18. Burnley, amanota 10 (imikino 12)
  19. West Bromwich Albion, amanota arindwi
  20. Sheffield United, amanota abiri
Scott McTominay yishimira igitego cya mbere cya Manchester United
Marcus Rashford, Daniel James na Fred bashimira McTominay nyuma yo gutsinda ibitego bibiri mu minota itatu ya mbere
Leeds United ntiyahiriwe mu mukino yahuyemo na Manchester United nyuma y'imyaka 16 idakina Premier League
Stuart Dallas yatsinze igitego cyiza ku ishoti yatereye kure
Umunyezamu Illan Meslier ufatira Leeds United afite imyaka 20
Daniel James atsinda igitego cya gatanu cya Manchester United
Bruno Fernandes yatsinze ibitego bibiri birimo icya penaliti yo mu gice cya kabiri
Umutoza wa Leeds United, Marcelo Bielsa, asa n'uwacitse intege nyuma yo gutsindwa ibitego 4-0 mu minota 37 ya mbere
Manchester United yafashe umwanya wa gatatu nyuma yo gutsinda Leeds United

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .