Premier League ishobora guhagarikwa kubera ubwiyongere bukabije bwa COVID-19

Yanditswe na Bukuru JC
Kuya 29 Ukuboza 2020 saa 05:20
Yasuwe :
0 0

Shampiyona y’Icyiciro cya Mbere mu Bwongereza, Premier League, yatangaje ko mu bipimo bishya bya COVID-19 biheruka gufatwa amakipe yose, byabonetsemo abarwayi 18, akaba ari nabo benshi babonetse kuva mu mpera za Kanama uyu mwaka.

Ibi bipimo byafashwe abakinnyi 1479 n’abandi bakozi, ni byo byagaragaje ko hari abandi bantu bane bo muri Manchester City banduye COVID-19 bituma umukino wari kuyihuza na Everton ku wa Mbere usubikwa.

Inararibonye zitandukanye zirimo Umuganga w’Ikipe ya Rochdale, Wesley Tensel, zasabye ko hakwiye gusuzumwa ko umupira w’amaguru waba uhagaritswe kubera ubwandu bukomeje kwiyongera.

Aganira na BBC Radio Five, Tensel yagize ati “Abakinnyi bashyirwa ku gitutu cyo gukina kandi bafite ibibazo bitandukanye- bafite abana bato, abantu bakuze mu miryango, mbese bahangayitse. Na bo ni abantu nk’abandi, ese uyu mwaka w’imikino wakomeza gukinwa? “

“Ku bwanjye ndabona umubare w’ubwandu ukomeje gutumbagira, kuba abakinnyi bakomeza gutaha mu miryango ntabwo bikwiye.”

Kugeza ubu, mu byiciro bine byo hejuru mu mupira w’amaguru mu Bwongereza, hamaze gusubikwa imikino icyenda biturutse ku cyorezo cya Coronavirus.

Mu Cyiciro cya Gatatu mu Bwongereza, League One, Ikipe ya Rochdale yatangaje ko imikino yayo ibiri iri imbere izasubikwa mu gihe Doncaster yatangaje ko imikino yayo yasubitswe ari itatu.

Mu Cyiciro cya Kane, League Two, Ikipe ya Morecombe na yo yatangaje ko imikino yayo ibiri yasubitswe.

Umuganga w’Ikipe ya Ipswich yo mu Cyiciro cya Kabiri, Matt Byard, yasabye ko imikino yayo isubikwa nyuma y’uko umutoza Paul Lambert yanduye COVID-19 kimwe n’Umuyobozi wayo Lee O’Neill.

Amategeko ya Premier League avuga ko imikino igomba kuba mu gihe ikipe ifite abakinnyi 14 bashobora kwitabira umukino barimo umunyezamu nubwo ibyemezo bisuzumwa bitewe n’uko ikibazo giteye.

Umukino Manchester City yari gusuramo Everton wabaye uwa kabiri wa Premier League usubitswe muri Premier League kubera COVID-19 kuva imikino isubukuwe muri Kamena. Undi wasubitswe n’uwari guhuza Newcastle United na Aston Villa mu ntangiriro z’Ukuboza.

Manchester City iri mu makipe yibasiwe na COVID-19 muri Premier League
Dr Wesley Tensel yibaza niba ari ngombwa gukomeza gukina mu gihe ubwandu bwa COVID-19 bukomeje kwiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .