Ni imikino y’Umunsi wa 18 wa Shampiyona y’u Bwongereza yabaye ku wa Kane, tariki ya 26 Ukuboza 2024.

Nk’uko biri mu muco w’Abongereza, bishimira iminsi mikuru bareba ruhago yabo. Uyu munsi uzwi nka Boxing Day, uba uteganyijwemo imikino myinshi iba ihanzwe amaso cyane ko ikunze kugaragaramo gutungurana kwinshi.

Mu mukino wabimburiye indi, Manchester City yanganyije na Everton igitego 1-1, iyi kipe ikomeza kubura intsinzi kuko mu mikino 13 iheruka yatsinzemo umwe gusa, inganya itatu itsindwa umunani.

Muri rusange, mu Mujyi wa Manchester abafana bizihije Noheli nabi kuko na Manchester United yatsinzwe na Wolverhampton Wanderers ibitego 2-0, uba umukino wa gatatu wikurikiranya itsinzwe.

Undi mukino wari uhanzwe amaso, ni uwo Chelsea yatsinzwe na Fulham ibitego 2-1, ihagarika The Blues yari imaze iminsi idatakaza amanota.

Indi kipe yari ihanzwe amaso ni Liverpool ya mbere yagiye gukina ibizi ko abakeba bose batakaje. Nta kosa yakoze kuko yatsinze Leicester City ibitego 3-1 ikomeza gushimangira umwanya wa mbere no kwiyongerera amahirwe yo kwegukana Igikombe cya Shampiyona.

Indi mikino yabaye, Newcastle yatsinze Aston Villa ibitego 3-0, Nottingham Forest itsinda Tottenham igitego 1-0 na West Ham United yatsinze Southampton igitego 1-0, mu gihe Bournemouth yanganyije na Crystal Palace ubusa ku busa.

Iyi mikino irakomeza ku wa Gatanu, tariki ya 27 Ukuboza 2024, aho Arsenal yakira Ipswich Town saa 22:15, Brighton & Hove Albion ikine na Brentford saa 21:30.

Liverpool ikomeje kuyobora urutonde rwa shampiyona n’amanota 42, ikurikiwe na Chelsea ifite 35, Nottingham Forest ifite 34 ku mwanya wa gatatu na Arsenal ya kane ifite 33.

Manchester City iri ku mwanya wa karindwi n’amanota 28, mu gihe Manchester United yageze ku wa 14 n’amanota 22.

Salah yafashije Liverpool kwitwara neza

Mohamed Salah udasiba gutsinda amaze kugira ibitego 16

Cody Gakpo yishimira igitego

Erling Haaland yahushije penaliti, bityo amaze gutsinda igitego kimwe mu mikino irindwi iheruka

Manchester City yanganyije na Everton

Umutoza wa Man City, Pep Guardiola akomeje kubura intsinzi

Fulham yahagaritse Chelsea

Wolves yatsinze Manchester United ikomeza kujya ahabi

Manchester United yatsinzwe umukino wa gatatu wikurikiranya

Nottingham Forest ikomeje gutungurana yageze ku mwanya wa gatatu