Uyu mukino w’Umunsi wa 15 wa Shampiyona, wabaye ku wa Gatanu, tariki ya 27 Ukuboza 2024 kuri Kigali Pelé Stadium.

Ni umukino wari witezwe cyane kuko Police FC yari yasabye ko wimurwa kubera abakinnyi ifite mu Ikipe y’Igihugu ariko irabyangirwa.

Watangiye ugenda gake cyane, ukinirwa cyane mu kibuga hagati bityo uburyo bw’ibitego bukaba buke.

Mu minota 30, Gasogi United yatangiye gusatira cyane ariko uburyo bw’ibitego bwabonwaga na Muderi Akbar na Ndikumana Danny ntibubyare umusaruro.

Mu minota ya nyuma y’igice cya mbere, Police FC yatangiye gusatira Ani Elijah na Bigirimana Abedi ntibabyaze umusaruro amahirwe babonaga.

Igice cya mbere cyarangiye amakipe yombi anganya ubusa ku busa.

Igice cya kabiri cyatangiranye imbaraga, amakipe yombi asatirana bikomeye ari nako umukino uryoha.

Police FC yakomeje gusatira, ku munota wa 68, Henry Msanga yatsinze igitego cyiza ku mupira ab’inyuma ba Gasogi bakuyeho usanga ahagaze wenyine atera ishoti rikomeye ari hanze y’urubuga rw’amahina.

Mu minota 75, Ikipe ya Polisi y’Igihugu yakomeje gusatira ishaka igitego cya kabiri ariko imipira myinshi Elijah yayiteraga hanze.

Ku munota wa 81, Gasogi yazamutse yihuta cyane Hakizimana Adolphe atera ishoti umupira ukubita umutambiko w’izamu uvamo.

Nyuma y’iminota itatu gusa, Police FC yazamutse neza Ani Elijah wari wahushije cyane, yatsinze igitego cya kabiri ku munota wa 84.

Umukino warangiye Police FC yatsinze Gasogi United ibitego 2-0 ifata umwanya wa gatatu n’amanota 23, mu gihe indi yagumye ku wa gatandatu na 20.

Police FC izasoza imikino ibanza ya shampiyona ikina na Rayon Sports, umukino w’ikirarane cy’umunsi wa 14, tariki ya 4 Mutarama 2025.

11 ba Police FC babanje mu kibuga

Abakinnyi 11 Gasogi United yabanje mu kibuga

Muhadjiri ahanganye na Mugisha Joseph

Myugariro Hakizimana Adolphe azamukana umupira

Abakinnyi ba Police FC bishimira igitego cya mbere

Nsabimana Eric na Msanga Henry bishimira igitego cya mbere

Elijah yahushije ibitego byinshi

Ani Elijah yishimiye igitego mu buryo budasanzwe

Msanga na Elijah bishimira igitego

Ani Elijah ashima Imana nyuma yo gutsinda igitego cya kabiri

Abafana ba Police FC batashye banezerewe

Izi nkumi zafanaga cyane

Hakizimana Muhadjiri ashaka uko atanga umupira

Perezida wa Gasogi United, Kakooza Nkuriza Charles akurikiye umukino

Amafoto: Kwizera Herve