Kiyovu Sports ikomeje kugorwa n’ibibazo by’ibyangombwa by’abakinnyi yaguze, ni yo yatangiye neza kuri Kigali Pele Stadium, ariko kwiharira umupira mu minota 10 ya mbere nta kintu byigeze biyifasha kuko ubwugarizi bwa Police FC bwari buhagaze bwuma.

Iyi kipe y’abashinzwe umutekano, yaje kungukira ku burangare bw’abakinnyi bo hagati b’Urucaca ubwo ku munota wa 12 Ishimwe Christian yazamukanaga umupira wenyine awukuye mu rubuga rwe, akawuha Abedi Bigirimana wawumusubije maze uyu myugariro ahita arangiriza mu izamu.

Iki gitego cya Police cyatumye ishyira umupira hasi yiharira umukino kuva ubwo maze bidatinze Bigirimana Abedi wari wagize uruhare mu gitego cya mbere aza kwitsindira icya kabiri ku ikipe ye, hari ku munota wa 34.

Nyuma yo kujya mu karuhuko ari ibyo bitego 2-0, Police FC yatangiye igice cya kabiri aho yasoreje icya mbere maze nyuma y’iminota ine gusa Mugisha Didier na we yinjira ku rutonde rw’abatsinze uyu munsi dore ko yaje kuzamukana umupira ku ruhande rw’ibumoso maze akawuterera inyuma gato y’urubuga rw’amahina ukaruhukira mu izamu rya Djihad Nzeyurwanda.

Police ntabwo yanyuzwe biciye kuri rutahizamu wayo Ani Elijah aho ku munota wa 56 yongeye guhusha igitego cyabazwe ubwo uyu munya-Nigeria yazaga gukubita umutambiko w’izamu maze Didier ashubijemo ujya hanze.

Nyuma yo gukomeza guhusha ibitego Ani Elijah yabonye izamu ubwo yendaga gusimbuzwa aho ku kazi gakomeye kakozwe na Ashraf Mandela uyu rutahizamu yaje gutsinda igitego cya kane ku munota wa 82 maze ava mu kibuga amwenyura.

Gutsinda uyu mukino byatumye Police ikomeza kuyobora urutonde rwa shampiyona n’amanota 10 mu mikino ine imaze gukina mu gihe Kiyovu Sports yo yashimiye Imana ko umusifuzi Uwikunda Samuel arangije umukino itsinzwe ibitego 4-0 byonyine.

Abakinnyi babanje mu kibuga

Police FC: Patience Niyongira, Ashlaf Mandela, Christian Ishimwe, Henry Msanga, Ndizeye Samuel, Ani Elijah, Simeon Iradukunda, Abedi Bigriimana, Yakub Issah, Richard Kirongozi na Mugisha Didier

Kiyovu Sports: Nzeyurwanda Djihad, Nizigiyimana Makenzi, David, Guy Kazinda, Ndizeye Eric, Tuyisenge Hakim, Felicien H, Olivier T, Sharif Bayo, N. Denny

Abafana ba Kiyovu Sports bari bikozeho nubwo byarangiye ari nko kubyibushya ihene ku munsi w'isoko

Gusa muri Stade abantu benshi bari bumiwe

Abayovu bari bumiwe...

Kabuhariwe mu kurya Temarigwe (ibumoso) na we yari yumiwe

Uyu na we yari yumiwe nyuma yo gutsapa umupira w'Urucaca

N'ababyeyi bari bumiwe

Rabbin Iman Isaac na we yari yumiwe

Mvukiyehe Juvenal wahoze ayobora Kiyovu Sports na we yari yumiwe

Abanyamakuru Sidiq na Antha...

Abatoza bombi bari bishimye mbere y'umukino

Kiyovu Sports yabanje mu kibuga ikomeje gukina idafite abakinnyi bashya kubera ibihano bya FIFA

Abayobozi ku mpande zombi babanje kwifurizanya amahirwe masa

Police FC ni yo iyoboye shampiyona

Bigirimana Abedi na Nzeyurwanda Djihad ni bo bari ba kapiteni ku mpande zombi

Ishimwe Christian yazamukanye umupira wavuyemo igitego cya mbere

Yawutereye mu maso ya Makenzi

Djihad yashidutse inshundura zinyeganyeze

Christian yishimiraga igitego cya mbere mu ikipe ya Police FC

Abasifuzi b'umunsi bari biteguye neza

Sharif Bayo ni we wagerageje kwitwara neza muri Kiyovu Sports

Kiyovu yarushijwe impande zose

Kiyovu yarushijwe impande zose

Police yaremye amahirwe menshi mu rubuga rwa Kiyovu Sports

Elijah yashakaga igitego ku buryo bwose

Djihad yongeye kuryama biba iby'ubusa

Birangira Bigirimana Abedi ari we utsindiye igitego Police FC

Birangira Bigirimana Abedi ari we utsindiye igitego Police FC

Elijah yakomezaga guhusha ibyabazwe

Bagenzi be ntibabyumvaga

Christian agakomeza kurema ibindi

Mugisha Didier ati nange reka ngerageze amahirwe

Abafana baa Kiyovu bati byose tubishyize mu maboko ya Nyagasani

Umufana wa Police... aboneka hake

Ariko nyine Kiyovu ihora ari Kiyovu ak'ubunyamujyi ntikaburaga

Imitaka yari yitwajwe n'abafana kuko bari biteze kunyagirwa

Ibibazo bidafitiwe ibisubizo byari byinshi

Police na yo yari ifite abafana da

Didier yigize Maguru ya Sarwaya yereka Makenzi ko imyaka ntawe uyihisha

Umupira yawukurikiye neza

Hari mbere yo gutsinda igitego cya gatatu

Kera kabaye Imana yumvise Elijah

Neza neza nk'umwe wo mu Bwoko bwayo dore ko yabonye izamu agiye gusimbuzwa

Yabonye inshundura atsindira Police FC igitego cya kane

Kiyovu Sports yiruhukije Uwikunda Samuel arangije umukino

Amafoto: Kasiro Claude