Pochettino yagizwe umutoza wa Paris Saint-Germain

Yanditswe na Eric Tony Ukurikiyimfura
Kuya 2 Mutarama 2021 saa 09:02
Yasuwe :
0 0

Uwahoze ari umutoza wa Tottenham na Southampton, Mauricio Pochettino, yagizwe umutoza mukuru wa Paris Saint-Germain yo mu cyiciro cya Mbere mu Bufaransa.

Uyu munya-Argentine w’imyaka 48, yasimbuye Thomas Tuchel uheruka kwirukanwa, aho yasinye amasezerano azageza kuwa 30 Kamena 2022, ariko akaba ashobora kongererwa umwaka umwe.

Pochettino wakiniye PSG hagati ya 2001 na 2003, yari amaze igihe nta kazi afite kuva yirukanwe na Tottenham mu Ugushyingo 2019.

Paris Saint-Germain agiye gutoza, ni iya gatatu muri Shampiyona y’u Bufaransa, Ligue 1, ndetse izahura na FC Barcelone muri 1/8 cya UEFA Champions League kizakinwa muri Gashyantare na Werurwe.

Pochettino azakoresha imyitozo ye ya mbere ku Cyumweru nyuma y’uko amakipe yo mu Bufaransa yari yafashe akaruhuko gato k’iminsi mikuru.

Nyuma yo guhabwa amasezerano, yagize ati “Ndishimye kandi ntewe ishema no kugaruka mu ikipe ifite umwanya wihariye mu mutima wanjye. Ngarutse mu ikipe uyu munsi mfite intego n’intumbero nyinshi kandi niteguye gukorana na bamwe mu bakinnyi bafite impano zikomeye ku Isi.”

Pochettino yatangiriye urugendo rw’ubutoza muri Espanyol ndetse amara amezi 18 muri Southampton mbere yo kwerekeza muri Tottenham muri Gicurasi 2014.

Yayifashije kugera ku mukino wa nyuma wa League Cup mu mwaka we wa mbere mu gihe yabaye iya kabiri muri Shampiyona ya 2016/17.

Uyu mugabo wahoze ari myugariro w’Ikipe y’Igihugu ya Argentine, yafashije kandi Spurs kugera ku mukino wa nyuma wa UEFA Champions League ya 2019, itsindwa na Liverpool.

Yirukanywe nyuma y’amezi atanu ubwo Tottenham yari ku mwanya wa 14 muri Premier League, asimburwa na José Mourinho.

Mauricio Pochettino yagizwe umutoza wa Paris Saint-Germain
Pochettino w'imyaka 48 yahawe amasezerano y'amezi 18
Thomas Tuchel yirukanywe ku wa 29 Ukuboza 2020
Pochettino yakiniye PSG hagati ya 2001 na 2003
PSG kuri ubu iri ku mwanya wa gatatu muri Ligue 1 izahura na FC Barcelone muri 1/8 cya UEFA Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .