00:00:00 IGIHE NETWORK KN KINYARWANDA EN ENGLISH FR FRANCAIS

Perezida wa Rayon Sports yijeje abafana ibyamunaniye

Yanditswe na Iradukunda Olivier
Kuya 31 Ukuboza 2022 saa 06:43
Yasuwe :

Perezida wa Rayon Sports, Uwayezu Jean Fidéle yijeje abakunzi b’iyi kipe ko iri gukora ibishoboka byose kugira ngo ibashe kwegukana igikombe cya shamiyona y’Umupira w’Amaguru mu Rwanda ndetse n’icy’Amahoro.

Ibi Uwayezu Jean Fidéle yabigarutseho ubwo Umunye-Congo Héritier Nzinga Luvumbu yashyiraga umukono ku masezerano amugira umukinnyi wa Rayon Sports.

Iyi kipe iguze uyu mukinnyi mu gihe Shampiyona y’icyiciro cya mbere mu Rwanda igeze aho rukomeye, aho amakipe agiye gukina imikino yo kwishyura. Rayon Sports izatangira iki gice iri ku mwanya wa gatanu kuko ariho amakipe yagiye mu karuhuko iri.

Gusa aho iri ntabwo ariho yifuza kuba nk’ikipe iri mu nkundura yo guhatanira ibikombe bikinirwa mu Rwanda. Iyi niyo mpamvu iri kugura abakinnyi bakongera imbaraga muri yo.

Tariki ya 2 Gashyantare 2022, mu Nzove ku cyicaro cya SKOL Brewery Ltd, Rayon Sports isinyisha umutoza Jorge Paixão, Perezida Uwayezu Jean Fidéle yari yavuze ko aje kubahesha ibikombe byombi bikinirwa mu Rwanda.

Uku ntabwo ariko byagenze kuko iyi kipe ikundwa n’abatari bake, yabuze byose rugikubita.

Kuri iyi nshuro mu muhango wo guha amasezerano Luvumbu, Uwayezu yongeye ashimangira ko aje gufatanya na bagenzi be bakinana, iyi kipe igatwara icya Shampiyona n’icy’Amahoro.

Ati “Luvumbu yafashije ikipe nubwo twari mu bibazo ntitwabona igikombe, ariko nta n’umwe utazi ko yaduhaye ibyishimo. Muri gahunda twihaye yo kurwanirira igikombe rero, turimo turubaka ikipe tureba aho twashyira imbaraga kugira ngo tubigereho. Niyo mpamvu twamuzanye kugira ngo dutware igikombe cya Shampiyona n’icy’Amahoro.”

Mu ntego za Rayon Sports harimo kongera abakinnyi bandi bakomeye mu ikipe, barimo na Youssef Rhab wayinyuzemo.

Rayon Sports iheruka kwegukana igikombe cya Shampiyona y’umupira w’amaguru mu Rwanda mu 2019 kuko ibyakurikiyeho byose byegukanywe na APR FC.

Rayon Sports izanye Luvumbu Nzinga kugira ngo itware igikombe cy'Amahoro n'icya Shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .