00:00:00 IGIHE NETWORK KN KINYARWANDA EN ENGLISH FR FRANCAIS

Perezida wa Musanze FC yageneye ihene y’ubunani buri mukinnyi

Yanditswe na Byiringiro Osée Elvis
Kuya 21 Ukuboza 2022 saa 09:36
Yasuwe :

Perezida wa Musanze FC, Tuyishimire Placide, yageneye buri mukinnyi w’iyi kipe ihene mu rwego rwo kubashimira uko bitwaye muri Shampiyona ndetse no kubaha mpano y’iminsi mikuru isoza umwaka.

Ni igikorwa yakoze ku wa Kabiri, tariki 20 Ukuboza 2022, ubwo yasuraga ikipe mu myitozo ya nyuma yo kwitegura umukino w’Umunsi wa 15 wa Shampiyona, Musanze FC yakiramo Police Fc kuri uyu wa Gatatu, tariki 21 Ukuboza 2022.

Tuyishimire Placide yagize ati “Umusaruro wanyu ni amanota, mwarawuduhaye. Amanota 21 ntabwo ari bibi cyane ariko muyongeyeho ejo (ku mukino wa Police FC) byaba byiza kurushaho. Nanjye rero ku musaruro wanjye, ubu naje hano ngira ngo dushimire Imana uburyo umuntu aba yarakoze muri uyu mwaka."

Yakomeje agira ati "Ejo nimurangiza umukino, tutitaye ku bizavamo, buri muntu bazamuha ihene y’ubunani, nimutaha muzajye gusangira n’imiryango yanyu. Tuzongera tubonane mugarutse ku itariki 10 Mutarama 2023.”

Kapiteni wa Musanze FC, Niyonshuti Gad, yamushimiye avuga ko Musanze FC ari yo kipe ya mbere yakinnyemo iha ubunani abakinnyi bayo.

Yagize ati “Mu makipe naciyemo, iyi ni yo impa umwaka. Andi yampaga ibyo angomba gusa ariko iyi kuva nayigeramo, iyo umwaka urangiye, umuyobozi wacu araza akatwifuriza umwaka mushya yaba mu buryo bw’amagambo ndetse no mu buryo bwo mu mufuka."

Kugeza ubu, ku munsi wa 14 wa Shampiyona, Musanze FC iri ku mwanya wa karindwi n’amanota 21, ni mu gihe Police FC iri ku mwanya wa cyenda n’amanota 20.

Nyuma y’umukino wa 15 wa Shampiyona, ari na wo usoza igice cy’imikino ibanza, amakipe azahita afata akaruhuko k’iminsi mikuru isoza umwaka.

Biteganyijwe ko Shampiyona izasubukurwa ku wa 5 Gashyantare 2023.

Imikino yose y’Umunsi wa 15 wa Shampiyona

Ku wa Gatatu, tariki 21 Ukuboza 2022 (Imikino yose izaba saa Cyenda)

  • Rwamagana City FC vs Mukura
  • Espoir FC vs Gorilla FC
  • Musanze FC vs Police FC
  • Sunrise FC vs AS Kigali FC
  • Rutsiro FC vs Bugesera FC

Ku wa Kane, tariki 22 Ukuboza 2022

  • Etincelles vs APR FC

Ku wa Gatanu, tariki 23 Ukuboza 2022

  • Marines Fc vs Kiyovu Sports
  • Rayon Sports vs Gasogi United saa 18:30
Perezida wa Musanze FC, Tuyishimire Placide, yemereye abakinnyi ihene y'ubunani ubwo yari yitabiriye imyitozo ku wa Kabiri
Musanze FC yaraye ikoze imyitozo ya nyuma yitegura guhura na Police FC
Musanze FC iri ku mwanya wa karindwi mbere y'uko hakinwa Umunsi wa 15 wa Shampiyona

AMAFOTO: Musanze FC


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .