Perezida Kagame yavuze ku kuba ikipe ya Afurika yatwara Igikombe cy’Isi, n’Umunyarwanda akegukana Tour de France

Yanditswe na Eric Tony Ukurikiyimfura
Kuya 9 Ukuboza 2019 saa 02:06
Yasuwe :
0 0

Perezida wa Repubulika Paul Kagame asanga bigoye kuba ikipe ya Afurika yakwegukana Igikombe cy’Isi mu mupira w’amaguru bitewe n’uko akenshi amakipe yiyumva nk’adashoboye imbere y’ibihugu by’ibihangange ndetse rimwe bikajyana n’iterambere ry’ibihugu bigize uyu mugabane.

Nyuma yo kwitwara neza mu Gikombe cy’Isi kwa Tunisia mu 1978, Maroc mu 1986 na Cameroun mu Gikombe cy’Isi cyo mu 1990, Umunyabigwi w’Umunya-Brésil, Pelé, yavuze ko bitarenze mu 2000, ikipe ya Afurika izaba yaregukanye iri rushanwa riruta andi mu mupira w’amaguru.

Kuri ubu hashize imyaka 19 nyuma y’igihe cyari cyateganyijwe na Pelé, nta kipe ya Afurika irarenga ¼ mu Gikombe cy’Isi ndetse ayageze kure ni Sénégal, Cameroun na Ghana, yose yagarukiye muri iki cyiciro mu 2002, 1990 na 2010 nk’uko akurikiranye.

Mu kiganiro yagiranye na The East African nk’umwe mu bayobozi bakunda kandi baharanira iterambere ry’imikino kuri uyu mugabane, Perezida Kagame yabajijwe niba abona hari ikipe ya Afurika ishobora kwegukana Igikombe cy’Isi.

Perezida Kagame yasubije ko amaze kureba ibikombe by’Isi byakinwe mu myaka 30 ishize, ariko asanga abagize amakipe ya Afurika hari ibyo yirengagiza byakabaye bishobora kuyafasha kwitwara neza muri iri rushanwa rihuza ibihugu biturutse ku migabane yose.

Ati’’ Ntabwo nabyemeza neza ibijyanye n’Igikombe cy’Isi kuko akenshi usanga hari aho bihurira n’iterambere ryacu. Kuki dukize cyane kandi na none tukaba dukennye? Yaba ari uko se tutazi icyo gukora? Abenshi muri twe turabizi, ariko ntitubikora. Narebye hafi Ibikombe by’Isi byakinwe mu myaka 30 ishize.’’

Perezida Kagame yakomeje avuga ko urebye imikinire y’amakipe ya Afurika, adakina nabi ugereranyije n’andi, ahubwo itandukaniro riba ko yo yumva ko hari amakipe adashobora gutsinda ndetse byongeye ugasanga abakinnyi basa n’abishimiye ko batsinzwe.

Ati’’ Ntabwo ari uko amakipe yacu akina nabi cyane. Mu ntangiriro batsinda amakipe meza, ariko bakomeza, bakagera aho bemera ko batsindwa, rimwe bakishimira ko batsinzwe. Bamwe muri bo bishimira ko batsinzwe n’ikipe y’u Bufaransa kuko ari uko byari byitezwe, umukino warangira, bakajya gusaba umukinnyi wabo umwambaro we.’’

"Gusa kugeza ubu, Abanyafurika ni abakinnyi beza b’umupira w’amaguru, ariko kugira ngo bitware neza bisaba ko barebera no ku bandi, bakareka kwirebaho ubwabo.’’

Mu gikombe cy’Isi giheruka kubera mu Burusiya, Afurika yari ihagarariwe na Misiri, Maroc, Nigeria, Sénégal, Tunisia na Misiri.

Kuva iri rushanwa rikomeye ritangiye gukinwa mu 1930, Afurika imaze guhagararirwa n’ibihugu 13 gusa muri 55 bigize Impuzamashyirahamwe yayo y’Umupira w’Amaguru (CAF).

Birashoboka ko Umunyarwanda yazegukana Tour du France mu gihe cya vuba

U Rwanda na Erythrée ni ibihugu biri gutera imbere byihuse mu mukino w’amagare, aho kuri ubu bihanganye na Afurika y’Epfo imaze igihe kirekire iyoboye kuri uyu mugabane.

Perezida Kagame yabajijwe igihe abona Umunyarwanda cyangwa Umunya-Erythrée ashobora kuzegukanira isiganwa rikomeye mu magare rya Tour de France.

Perezida Kagame yasubije ko hari impano z’Abanyarwanda zigaragaza ndetse asanga mu gihe kitari kirekire, bishoboka ko hari umukinnyi wo muri ibi bihugu byombi ushobora kuzegukana iri siganwa.

Ati’’ Hari Abakinnyi benshi b’amagare bazamuka byihuse mu Rwanda kandi ni ko bimeze no muri Erythrée. Icyo umuntu yashingiraho ni uko bazamuka bigirira icyizere. Ku bw’ibyo, ndatekereza ari mu gihe cya vuba.’’

Perezida Kagame usanzwe ari n’umukunzi w’umukino w’isiganwa ry’utumudoka duto, rya F1, yavuze ko asanga Lewis Hamilton wa Mercedes Benz afite amahirwe menshi yo kwegukana iri rushanwa ku nshuro ya karindwi mu mwaka utaha bitewe n’ikoranabuhanga imodoka ye ikoranye ndetse n’ubushake bwo gutsinda agaragaza.

Perezida Kagame asanga hari ibikibura ngo ikipe ya Afurika yegukane Igikombe cy’Isi mu gihe kandi asanga mu gihe cya vuba, Umunyarwanda cyangwa Umunya-Eritrea ashobora kuzegukana Tour de France
Perezida Kagame yari muri Luzhniki Stadium yabereyemo umukino ufungura igikombe cy'Isi mu Burusiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .