Perezida Kagame yakiriye Amavubi mbere yo gukina na Congo Kinshasa

Yanditswe na

Mihigo Jean Baptiste na Manzi Lema Jules

Kuya 28 Mutarama 2016 saa 03:58
Yasuwe :
0 0

Kuri uyu wa Kane, tariki ya 28 Mutarama 2016, perezida Kagame yakiriye abakinnyi ndetse n’abatoza b’ikipe y’igihugu y’umupira w’amaguru muri Village Urugwiro, maze abagira inama zizabafasha kwitwara neza mu irushanwa rya CHAN riri kubera mu Rwanda.

Mu gihe habura iminsi ibiri gusa kugira ngo ikipe y’igihugu Amavubi ihure n’iya Repubulika Iharanira Demokarasi ya Congo muri ¼ cy’irangiza, Perezida Kagame yabwiye abakinnyi ko bagomba gukora cyane kugira ngo babashe kwitwara neza.

Nyuma yo kwakira iyi kipe Minisitiri w’Umuco na Siporo, Uwacu Julienne yavuze ko Perezida wa Repubulika yakiriye ikipe y’igihugu kubera ko amaze igihe akurikirana imikino yayo kandi agatanga inama zigamije gufasha kugira ngo irusheho gukora neza ndetse zikanafasha abakinnyi.

Yagize ati “ By’umwihariko yashakaga guhura nabo kugira ngo abashimire kuko hari akazi keza bakoze. Muri rusange buri mukinnyi wese yaritanze uko ashoboye tukaba tumaze kugera ku rwego rushimishije.”

Perezida Kagame kandi ngo yabwiye ikipe ko intsinzi yayo ubu ireberwa mu ndorerwamo yo gukora cyane, ariko ko akazi kari imbere gasaba byinshi no kwitanga.

Perezida Kagame n'Ikipe y'Igihugu y'Umupira w'Amaguru bafashe ifoto y'urwibutso

Impanuro z’Umukuru w’Igihugu ku bakinnyi b’ikipe y’igihugu nkuko zigaragara kuri twitter ya Perezidanse y’u Rwanda zikomeza zibutsa aba bakinnyi ko ko uko bagenda bagera kuri byinshi, ari nako bigenda bikomera cyane; ndetse no kugera kure hashoboka birabasaba kugira intego ndetse n’ikinyabupfura.

Ati “Mufite impano zihagije ni yo mpamvu mugomba kugerageza kuzikoresha neza. Ntabwo ari ngombwa kwishimira kugera ku kintu kiri munsi y’icyo mufitiye ubushobozi.”

Yanagarutse ku myitwarire igomba kuranga abakinnyi kugira ngo bagere kure hasoboka; agira ati “ Mu gihe ikipe idafite imyitwarire myiza, impano zanyu zisasimburwa n’ingaruka mbi z’ikinyabupfura gike.”

Perezida Kagame yibukije abakinnyi bose bari mu ikipe y’igihugu ko Abanyarwanda bose babari inyuma kuko bahagarariye izina ry’igihugu.

Yanababwiye ko gutsinda bishoboka, kuko bafite ubushobozi nk’ubw’abo bahanganye, bityo bakaba basabwa gukora cyane kugira ngo babigereho.

Ati “N’iyo mwatsindwa, mugomba kwibaza niba mwitanze uko bishoboka kose, n’icyo mwagombye kuba mwakoze. Buri wese ashobora gutsindwa, ariko gutsindwa ntibyemewe iyo bitewe n’uko wakoze ibiri munsi y’ubushobozi bwawe.”

Yakomeje ababwira ko amahirwe yo gutsinda aba menshi mu gihe ugiye mu mukino wiyizeye, ndetse ko atari ngombwa kurambiriza ku mahirwe.

Yabagiriye inama y’uko bagomba kujya mu mukino biteguye, bagashaka intsinzi hakiri kare, ariko bakanibuka ko hakiri ibihe bigoye imbere.

Ati “Ntimuzave ku izima, ariko na none ntimwiyizere birenze ibikenewe. Muzatsindwe mwagerageje ariko ntimuzananirwe kugerageza ibishoboka byose. Muzajye mu mikino iri imbere mufite intego ko mugomba gutsinda, ariko intego igomba gukurikirwa n’ibikorwa. ”

Perezida Kagame wagiye ugaragara ku mikino myinshi Amavubi yakinnye, yanababwiye ko bafite ubushobozi bwo kwegukana iki gikombe cya CHAN, anabasaba kutishyiramo ko bamaze kugitwara batarakina; ati” mugikorere kandi nk’ikipe!”

Perezida Kagame yasoje ashimira Amavubi anababwira ko nibakora cyane bazagera kure hashoboka.

Amavubi azahura n’ikipe y’igihugu ya Repubulika Iharanira Demokarasi ya Congo muri ¼ cy’irangiza mu irushanwa rya CHAN kuri Stade Amahoro saa cyenda z’amanywa ku wa Gatandatu, tariki ya 30 Mutarama 2016.

Umutoza McKinstry yagaragazaga akanyamuneza ku maso
Yannick Mukunzi na Rusheshangoga Michel
Perezida Kagame yasinye ku mwenda w'Ikipe y'Igihugu
Kapiteni w'Ikipe y'Igihugu, Jacques Tuyisenge yashyikirije umwenda w'ikipe y'Igihugu Perezida Kagame
Kapiteni w'Ikipe y'Igihugu, Jacques Tuyisenge aganira n'itangazamakuru
Minisitiri Uwacu aganira n'itangazamakuru

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .