Ibi umuyobozi w’iyi kipe ikunzwe kurusha izindi akaba yabitangarije mu Karumuna mu karere ka Bugesera, ubwo yakiraga ikipe y’abagore yari yaje kwerekana ibikombe yegukanye muri uyu mwaka birimo shampiyona y’icyiciro cya mbere ndetse n’icy’Amahoro.

Uwayezu Fidèle yavuze ko atemeranya n’abavuga ko Rayon Sports yagize umwaka mubi ko ahubwo bakwishimira ko bitwaye neza uyu mwaka.

Yagize ati “Twifuzaga kubakirana n’abahungu ariko bo baracyafite imikino kandi bamwe muri mwe bashakaga gutaha. Bityo twishimiye umusaruro mwagaragaje mwitwara neza muri rusange”.

“Hari abavuga ngo naravuze ngo tuzatwara igikombe cya shampiyona n’icy’Amahoro. Dore ngibi turabifite. Kereka niba hari abadaha agaciro bashiki bacu”.

“Twagize umwaka mwiza muri rusange, yego ibyo twifuzaga byose ntitwabigezeho, mu bagabo dutwaye umwanya wa kabiri muri shampiyona ndetse n’uwa gatatu mu gikombe cy’Amahoro, twanegukanye na Super Cup dutsinze APR. Iyo urebye, usanga mu bikombe bitandatu Ferwafa yateguye, twaratwayemo bine, ibindi bitatu amakipe akabigabana”.

Perezida Uwayezu akaba yavuze ko muri ibi bikombe harimo icy’Amahoro na shampiyona Rayon Sports y’abagore yatwaye, hakazamo na Super Cup iy’abagabo yegukanye. Ibindi bikombe bitatu bisigaye harimo icya shampiyona y’abagabo yatwawe na APR FC, Super Cup y’abagore yatwawe na As Kigali n’igikombe cy’Amahoro Police FC yatwaye mu bagabo.

Aha, ngo bimwe mu bitarakunze mu bagabo harimo no kuba baratakaje abakinnyi bagenderagaho banabanzaga mu kibuga barimo kapiteni Rwatubyaye Abdoul, Madjaliwa Mussa wagize ibibazo ku giti cye, Joachim Ojera na Hertier Nzinga Luvumbu.

Rayon Sports y’abagore nyuma yo kwakirwa n’ubuyobozi ikaba yahise isezerera abakinnyi barataha mu rugo aho bahawe misiyo yo kuzitwara neza mu mikino mpuzamahanga ya CECAFA izabera muri Ethiopia ikanatanga itike yo gukina imikino ya CAF Champions League.

Murego ukora nka Manager w'ikipe y'abagore, na we yashimye uko umwaka wabo wagenze

Ibikombe bibiri byatwawe byeretswe ubuyobozi

Visi Kapiteni wa Rayon Sports agaragaza kimwe mu bikombe batwaye

kapiteni wa Rayon Sports, Alice Kalimba ni umwe mu bamuritse ibikombe batwaye

Ibikombe byose byashyikirijwe Perezida w'umuryango wa Rayon Sports

Abayobora Rayon Sports y'abagore bishimiye ibikombe byatashye mu kabati kabo

Perezida Uwayezu yavuze ko ku bwe bagize umwaka mwiza nubwo bitagenze uko bashakaga

Rayon Sports yatwaye igikombe cya shampiyona n'icy'Amahoro nkuko Perezida wayo yabisezeranyije abakunzi b'iyi kipe

Umunyamabanga wa Rayon Sports, Patrick Namenye, na we yashimiye aba bakobwa uko bitwaye

Umutoza Rwaka yegukanye ibikombe bibiri mu mwaka we wa mbere atoza ikipe y'abagore

Video: Confiance Bizimana

Amafoto: Renzaho Christophe