Operation ’Umurozi’: Inkuru y’ishimutwa ry’ ‘umuganga’ wa Rayon Sports

Yanditswe na Musangwa Arthur
Kuya 12 Ukuboza 2019 saa 02:13
Yasuwe :
0 0

Iyo ufunguye Bibiliya mu ivanjili ya Yohana igice cya 8 uhasanga inkuru y’umugore wafashwe asambana maze Abafarisayo bakamuzanira Yesu ngo aterwe amabuye. Uyu mwana w’Imana ngo yarabarebye arababwira ngo muri mwe udafite icyaha, abe ari we ubanza kumutera ibuye.

Habuze n’umwe. Mu Rwanda na ho ubanza uciye mu makipe yose ukabaza ikibazo kigira kiti "utarakoresha amarozi naseke kanaka", bose bagenda banyerera bucece nk’abanyeshuri babonye “Animateur” kandi uwo munsi bari bahisemo gukwepa amasomo. Ni wo mupira w’amaguru wacu.

Amarozi si inkuru nshya mu mupira w’u Rwanda. Henshi bazakubwira ko ibyo bintu bitazwi, ko basenga cyane ndetse bazabyerekana mbere ya buri mukino. Benshi bapfukama hari ibyo bambariye ku myenda, ukuri kuzwi n’utuzu duto turimo umwijima bahuriramo.

Usubiye inyuma gato mu myaka ishize usanganirwa n’inama yigeze gukorwa na AS Kigali bamwe mu bakinnyi bagashinja bagenzi babo kubaroga. Inama nk’iyi y’amarozi kandi yigeze gukorwa mu Ikipe y’Isonga itarasenyurwa, irerero ry’u Rwanda kuri ubwo ntabwo ryatanzwe mu gukoresha umuti nk’uko bawita. Hambere aha kandi muri AS Muhanga kandi byigeze kuvugwa ko uwari rutahizamu wayo Kamana Bokota Labama, yaba yarashwanye n’umutoza we bapfa kudahuriza ku murozi.

Ayo ni amakipe amwe n’amwe, gusa hejuru yayo haza APR FC na Rayon Sports. Aya ngo ni yo arusha (cyangwa yarushaga) andi kwizera, gukoresha no kujya muri iyi myemerere itangaje. Umukino uyahuza wo biba ari ibindi bindi.

Mu 2013 Rayon Sports yari yategetswe kugera ku kibuga nyuma ya APR FC ndetse abakinnyi basohoka mu modoka bakagenda nta n’umwe urebye inyuma; ibi ni ko byaje kugenda.

Hejuru y’ibi Kanyamayayi (Kit Manager) wa Rayon Sports yagombaga kumena ikintu kimeze nk’igicuma mbere y’uko abakinnyi ba APR FC binjira ku kibuga kwishyushya ndetse akinjira mu kibuga yambaye ibirenge kugira ngo umuti ukore.

Kumena iki kintu n’ubu bitari byamenyekana ubwoko bwacyo, byatumye ngo imbaraga APR FC na yo yari yifashishije ziburizwamo kugeza umukino urangiye. Umukino waje kurangira Rayon Sports iwutsindiye i Nyamirambo 2-1. APR FC yari yazanye umuganga uvuye mu Burundi nk’uko byatangazwaga, ngo icyo gihe yabuze intama n’ibyuma.

Ibyo ni hambere, reka tujye vuba umwaka ushize. Amakipe yombi yari mu ruhando rwo kurwanira igikombe yaje kwisanga mu rugamba rwo kurwanira umurozi. Reka mu rwego rwo kubyoroshya tumuhe icyubahiro cye, “Muganga” ni na ko banamwita muri ruhago yacu.

Ubundi ngo uyu muganga ukomoka i Burundi yari yarageze mu Rwanda azanywe na Jules Ulimwengu, amukodeshereza icyumba (annexe) mu gipangu yabagamo i Nyamirambo.

Umwe mu bantu b’imbere muri Rayon Sports utashatse ko amazina ye atangazwa yagize ati “Ni ahantu i Nyamirambo hafi y’isoko, niho Abarundi bose bo muri Rayon Sports baba, uwo muganga yari yarazanywe na Jules amukodeshereza inzu aho mu gipangu.”

Uyu muganga ngo yari yumvikanye na Rayon Sports kuzajya ayikorera imikino, yatsinda ikipe ikamuha ibihumbi 300 Frw kuri buri umwe. Aya masezerano ariko ngo yaje kuzamo agatotsi nk’uko undi waganiriye na IGIHE abisobanura.

Ati “Urabona, nyuma yo gutsinda imikino itatu (Espoir, Amagaju na Police FC) yarabishyuje birangira batayamuhaye bimwe byo kwiraza i Nyanza ariko. Aya makuru bamwe mu bafana ba APR FC baje kuyamenya, ni ko kujya kumureba bamwizeza ko naramuka abafashije Rayon Sports ntitsinde Musanze bari buhite bamuhera ibihumbi 200 Frw kuri Stade ya Kigali.”

Ugira ngo ntibyabaye. Uyu mugabo wari ukeneye amafaranga yaje kwemera maze umukino w’umunsi wa 28 wa shampiyona birangira yemereye aba bafana ko Rayon Sports iri buwutakaze ndetse n’indi iyikurikira.

Abafana ba APR FC baje ku kibuga bikomanga ku gatuza ko “Gasenyi” iri butsindwe. Ku munota wa 45 ngo ba! Mugenzi Cedric yatsinze igitego ikipe yahozemo, Musanze ijya mu karuhuko iri imbere, igikombe ntikigiye gutakara?

Inama zarabaye. Amayeri mu kibuga si cyo cyari ikibazo, ubuhanga bw’abo bahanganye si ikibazo, ikibazo ni kimwe. Muganga!

Jules Ulimwengu wari ufite amakuru yabwiye bagenzi be ko nibadashakisha uwo muganga yari azi neza ko ari ku kibuga ritari bureme, intsinzi ngo ntabwo iza kuboneka.

Telefoni zaracicikanye, isura ye yari izwi nta kuranga kurimo. Mbere y’uko umusifuzi Rulisa ahuha mu ifirimbi ko igice cya kabiri gitangiye muganga koko yaje kuboneka.

Amakuru agera kuri IGIHE ni uko uyu yahise yemererwa kwishyurwa ibirarane afitiwe, agahabwa na miliyoni n’ibihumbi 200 Frw mu gihe Rayon Sports yatsinda uwo mukino.

Uyu kandi yagombaga kubafasha gutegura umukino wari buhuze APR FC na Muhanga mu mpera z’icyo cyumweru maze igikombe cya shampiyona byarangira bagitwaye akazapfumbatishwa amadorali ibihumbi bitanu. Ibyakurikiye abari kuri Stade ya Kigali bazi uko byagenze.

Gusa hari hari ikitarakemuka. Nyuma yo kumenya ko umuganga yisubiriye muri Rayon Sports, ba bakunzi ba APR FC bari kuri Stade ya Kigali barumiwe, hari hasigaye uburyo bumwe noneho ngo uyu muganga imbaraga ze ziburizwemo. Byari ukumushimuta ku wundi mukino ntazaboneke.

Mbere y’iminsi ibiri ngo umukino wa APR FC na Rayon Sports ube, ngo abantu bo muri APR FC bafashe imodoka y’umweru ya Toyota (Vigo), maze bajya i Nyamirambo gushaka umuganga baramufata.

Umwe mu bantu bakomeye ba hafi muri Rayon Sports ariko na none ukorana na APR FC, ngo yabwiwe ayo makuru ko umuganga atwawe, aba ariwe utabara, agarura umuvuzi mu modoka y’icyatsi.

Uwatanze ubuhamya ati “Ni umuntu w’imbere wa Rayon Sports, keretse iyo tugize ibyago akaba atari mu Rwanda kuko akunda kujya hanze, naho ubundi ni umuntu uvuga ati bimeze bitya, mubigenze mutya.”

Jules Ulimwengu ngo yahamagaye umwe mu bayobozi ba Rayon Sports amumenyesha ko urugo rwe rwavogerewe n’abantu bo muri APR FC.

Ati “Umuntu wacu ni we wahise amugarura mu modoka ye y’icyatsi. Icyo gihe hajemo ariko agatotsi, aba Rayon baravuga bati uyu muntu ntabwo tumwizeye, ko ahise amugarura, ntabwo tuzi ibyo bari bamwemereye.”

“Yaravuze ati umukino numunanira njye muze kubimbaza, ku munota wa 90 igitego tuba turakibonye n’ubu icyizere aracyagifite muri Rayon Sports. “

Uyu muganga wari wongeye guca mu rihumye abafana ba APR FC, byarangiye ahise animurwa ajyanwa kuba Kicukiro ku wundi mukunzi wa Rayon Sports kugeza shampiyona isojwe.

Usibye kuba ikipe yakwitabaza amarozi mu mukino ngo itsinde, hari n’izindi zisaba amakipe makuru ko yazishyurira umurozi kugira ngo abashe gutsinda ba mukeba.

Bivugwa ko ibi byabaye ku mukino Gicumbi FC iherutse gukina na APR FC aho ngo iyi kipe yo mu Majyaruguru yari yasabye ko Rayon Sports yayiha ibihumbi 500 Frw, harimo 100 Frw ry’umuganga kugira ngo ibashe gutesha amanota atatu mukeba.

Undi ati “Ibi bintu ndabizi mbibamo. Amarozi arakora pe, ariko ni ibintu by’imyemerere. Ku mukino wa APR FC na Gicumbi ejo bundi ku Mumena [ku wa 3 Ukuboza 2019], Rayon Sports yabanje kubaha ijana, andi ibabwira ko iza kuyabaha nyuma ariko kuko ari ibintu utabonera ibihamya, biba bisaba kwihambira, kuko bishobora gukunda cyangwa ntibikunde.”

“Nko muri Rayon Sports harimo abantu umunani bagomba gushaka umurozi. Ni imyemerere, ariko abantu barabiyoboka cyane. Ubu APR FC ngo iri gukoresha umwarimu [umuganga] wahoze akorera Rayon Sports. Ni imyemerere, iyo bidaciyemo, umuganga araza akakubwira ati ni uko hari umuntu uyu n’uyu utubahirije.”

“N’abatoza b’abazungu, baba bazi ko hari amafaranga bagomba gutanga. Baba babizi neza, hari abantu baba bagomba kumwicaza bakamubwira, iyo atabikoze baramutsindisha.”

Mu mukino APR FC yahagamwe na Gicumbi FC, amakipe akanganya 1-1, wavuzwemo amarozi ndetse biviramo Umunya-Ghana Vanderpuije Daniel uzwi nka Tchabalala w’iyo kipe yo mu Majyaruguru gukubitwa.

Nyuma y’uwo mukino abantu babiri bikekwa ko ari abafana ba APR FC batawe muri yombi n’Urwego rw’Igihugu rushinzwe Ubugenzacyaha (RIB) bakurikiranyweho gukubita Tchabalala.

Umunya-Ghana uzwi nka Tchabalala, yakubitiwe mu rwambariro rwa Gicumbi FC akekwaho amarozi
Gicumbi FC iri ku mwanya wa nyuma muri Shampiyona y'Icyiciro cya Mbere mu Rwanda yahagamye APR FC mu mukino waketswemo amarozi. Abakinnyi ba Gicumbi FC babanje kunyanyagiza ibisa n'umunyu mu mazamu

RIB yavuze ko "babiri ari bo bakurikiranyweho gukubita uyu mukinnyi ndetse kuri ubu bari gukorerwa dosiye ngo bashyikirizwe ubushinjacyaha."

Ubusanzwe biragoye kwemera ko amarozi abaho, ibi byose amakipe yacu abamo biba bisa n’ibya bamwe bagerageje gukama ikimasa. Muri ruhago habamo utsinda n’utsindwa, kenshi kandi hakanabaho no kunganya.

Kwiringira ubuvuzi gakondo bikomeje gufata indi ntera muri ruhago yacu, ku buryo wakeka ko twasubiye mu bihe bya mbere y’ubukoroni ubwo abantu babandwaga ndetse bakaraguza izuba riva.

Ng’uko uko ruhago yacu ihagaze mu gihe twitegura kwinjira mu mwaka wa 2020!

Inkuru y'ikoreshwa ry'amarozi mu mupira w'amaguru w'u Rwanda si nshya. Ifoto yafatiwe kuri Stade Amahoro ku wa 17 Werurwe 2018 ku mukino wa APR FC na Djoliba AC igaragaza amagi asizeho amarangi y’umukara yamenewe iruhande rw’ikibuga abakinnyi basimbura bishyuhirizaho
Mu mukino w’Igikombe cy’Amahoro cya 2013, Rayon Sports yatsinzwemo na Bugesera FC 2-1, abafana ba Rayon Sports bavumbuye inkoko muri Stade Amahoro bayishe ikipe yabo ibona igitego cy’impozamarira
Tariki ya 16 Ukuboza 2016 yabaye intangiriro y’inkuru kimomo ku ikoreshwa ry’amarozi ku mukino wabereye i Huye Mukura VS yanganyirijemo na Rayon Sports 1-1
Iki kintu utamenya ubwoko bwacyo cyaje kumenwa ku kibuga cya Nyamirambo ku mukino Rayon Sports yatsinzemo APR FC 2-1. Bivugwa ko ari ho intsinzi yari izingiye
Ku mukino w'Igikombe cy'Amahoro hagati ya Espoir na APR FC, umukecuru byavugwaga ko ari umurozi wa Espoir, yaje gufatanwa urutonde rw'abakinnyi ba APR FC yabashyizeho ibintu byinshi. Iyi yahise itwikwa n'abashinzwe umutekano i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .