Nyuma ya Marines FC, Kiyovu Sports ni yo kipe yoroheye APR FC mu myaka 10 iheruka

Yanditswe na Eric Tony Ukurikiyimfura
Kuya 10 Ukuboza 2020 saa 10:03
Yasuwe :
0 0

Ku wa Gatanu, APR FC izakira Kiyovu Sports mu mukino w’Umunsi wa Gatatu wa Shampiyona y’Icyiciro cya Mbere mu Rwanda uzabera kuri Stade ya Kigali guhera saa Cyenda.

Uzaba ari umukino wa mbere APR FC ikinnye muri uyu mwaka w’imikino wa 2020/21 nyuma y’uko ibiri ibanza yabaye ibirarane ubwo yari muri CAF Champions League.

Ku ruhande rwa Kiyovu Sports, yo yakinnye imikino ibiri iheruka, aho yatsinze Mukura Victory Sports ibitego 3-1 mbere yo gutungurwa na Marines FC yayitsinze ibitego 3-0.

Nyuma y’uwo mukino wabaye ku wa Kabiri, umutoza wungirije wa Kiyovu Sports, Kalisa François, yavuze ko nubwo batsinzwe na Marines, bizeye gushimisha abafana b’Urucaca ku mukino wa APR FC.

Ati “Ni cyo natangiriyeho mvuga, mu mukino habamo gutsinda, gutsindwa no kunganya. Uyu munsi dushobora kuba dutsinzwe ariko natwe dufite ibyishimo ku wa Gatanu (…). Imikino ntabwo isa, uyu munsi byanze ariko ku wa Gatanu dushobora gukina umukino usukuye (…). Umukino wa APR FC tuzawukina, uyu munsi twatsinzwe na Marines ariko ndizeza abafana ko ku mukino wa APR FC bazishima.”

Kiyovu Sports itozwa na Karekezi Olivier wabaye umukinnyi ukomeye muri APR FC ndetse ikagira abakinnyi barimo Kimenyi Yves, Nsengiyumva Moustapha na Ngandu Omar, na bo banyuze muri iyi kipe y’ingabo.

APR FC na yo irimo amwe mu mazina yanyuze muri Kiyovu Sports nka Omborenga Fitina, Nizeyimana Djuma na Nsanzimfura Keddy watangaje ko yiteguye neza iyi kipe yavuyemo mu mezi atanu ashize.

Ati “Ni umukino niteguye gutsinda, ikipe ya Kiyovu nagiriyemo ibihe byiza kandi ngomba kubikora neza ngahesha ikipe yanjye intsinzi.”

Uyu mukino uzayoborwa n’umusifuzi Twagirumukiza Abdul Karim uzaba yungirijwe na Ndagijimana Théogène na Karangwa Justin mu gihe umusifuzi wa kane ari Nizeyimana Is’haq.

Nyuma ya Marines FC, Kiyovu Sports ni yo kipe yoroheye APR FC mu myaka 10 iheruka

Uretse Marines FC yabonye amanota atatu gusa mu mikino yahuyemo na APR FC mu myaka 10 ishize, Kiyovu Sports yabonye amanota atanu gusa kuri iyi kipe y’ingabo.

Intsinzi ya Kiyovu Sports yo ku wa 27 Ukwakira 2017, yabonetse nyuma y’imyaka 12 Urucaca rudatsinda APR FC. Uyu mukino warangiye ari igitego 1-0 cyatsinzwe na Mustafa Francis ndetse icyo gihe Kiyovu Sports yari imaze iminota isaga 630 (imikino irindwi) itinjiza igitego mu izamu rya APR FC.

Kiyovu Sports yaherukaga gutsinda APR FC muri Shampiyona tariki ya 30 Ukwakira 2005, ibitego 3-1 ku mukino w’umunsi wa nyuma wa shampiyona y’uwo mwaka yanegukanywe na APR FC.

Amateka aha amahirwe APR FC

Mu mikino 34 iheruka guhuza amakipe yombi muri Shampiyona, APR yatsinzemo 24, Kiyovu itsinda itatu, zinganya imikino irindwi.

APR FC yatsinze imikino 19 muri 22 iheruka guhuriramo na Kiyovu Sports harimo n’uheruka warangiye ari 1-0.

Muri iyi mikino 22, APR FC yinjijemo ibitego 42 mu izamu rya Kiyovu Sports mu gihe Urucaca rwo rwatsinze ibitego bitanu gusa.

Gahunda y’umunsi wa gatatu wa Shampiyona

Ku wa Kane tariki ya 10 Ukuboza 2020

  • Espoir FC vs Rayon Sports FC (Warasubitswe)
  • Etincelles FC 1-2 Musanze FC
  • Bugesera FC 1-3 Police FC
  • Rutsiro FC vs Gasogi United (Warasubitswe)
  • AS Muhanga 0-0 Gorilla FC
  • AS Kigali 2-0 Mukura VS&L

Ku wa Gatanu tariki ya 11 Ukuboza 2020

  • APR FC vs SC Kiyovu (Stade de Kigali, 15h00’)
  • Marine FC vs Sunrise FC (Stade Umuganda, 15h00’)
APR FC izakira Kiyovu Sports ku wa Gatanu
Kiyovu Sports iheruka gutsindwa na Marines FC ibitego 3-0
Nsanzimfura Keddy ukinira APR FC, yavuye muri Kiyovu Sports mu mezi atanu ashize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .