Nshimiyimana Eric yaba yatunze agatoki abakinnyi be?

Yanditswe na Eric Tony Ukurikiyimfura
Kuya 12 Ukwakira 2019 saa 09:15
Yasuwe :
0 0

Umutoza Mukuru wa AS Kigali, Nshimiyimana Eric, yasabye itangazamakuru kujya rinenga abakinnyi mu gihe bitwaye nabi mu mikino itandukanye, aho guhora bibasira abatoza gusa.

AS Kigali yanganyije na Bugesera FC ibitego 2-2 mu mukino w’Umunsi wa Gatatu wa Shampiyona wabereye kuri Stade ya Kigali i Nyamirambo ku wa Gatanu.

Abajijwe uko yabonye imyitwarire y’umunyezamu Ndayishimiye Eric ‘Bakame’ washinjwe kugira uruhare runini mu gitego cya kabiri cya Bugesera FC cyatsinzwe na Shaban Hussein ‘Tchabalala’, Nshimiyimana Eric yasabye abanyamakuru kujya bakora akazi kabo neza.

Ati ”Mukoze akazi kanyu neza, banyamakuru muri hano, mwadufasha. Abakinnyi bacu, hari ikibazo hano mu Rwanda mu banyamakuru, ibintu byose ni umutoza. Ntabwo nateye penaliti, ntabwo nagiye mu izamu….. Kuki mutarebera ku bandi b’i Burayi?’’

“Iyo umukinnyi akoze amakosa njyewe ndayamubwira, iyo muvuze ibintu kuri njyewe hari icyo bimfasha. Namwe mufashe abakinnyi bacu. Iyo batsinze ni bo muvuga, iyo batsinzwe ni umutoza. Ntabwo ari Bakame gusa n’abandi.”

Abajijwe ku buryo ingengabihe ya Shampiyona iteguye kuri AS Kigali niba nta ngaruka bizagira ku musaruro w’ikipe ye cyane ku kubona amanota ku makipe makuru, Nshimiyimana Eric yavuze ko bigoye, ariko yemeza ko hari icyo bizabafasha.

Ati ”Yego, Bugesera FC ntabwo ari ikipe yoroshye, ifite ubusatirizi bukomeye kandi bwiza. Ibya gahunda ya Shampiyona byo, ni uko mwe mureba hano imbere, nitugera mu minsi ya karindwi harimo za Kiyovu na Police FC zikurikirana, urumva ko ni imikino itoroshye, ntacyo dushobora guhindura, tuzakina. Hari igihe bigufasha.”

Nyuma y’imikino itatu imaze gukina, AS Kigali ifite amanota abiri gusa, aho yanganyije na APR FC na Bugesera FC, itsindwa na Rayon Sports.

Ikipe y’Umujyi wa Kigali izagaruka mu kibuga tariki ya 23 Ukwakira 2019, yakirwa na Etincelles FC mu mukino w’umunsi wa kane wa Shampiyona y’Icyiciro cya Mbere mu Rwanda.

Bakame yashinjwe gusohoka nabi ku gitego cya kabiri cya Bugesera FC
Umutoza wa AS Kigali Nshimiyimana Eric yasabye itangazamakuru kujya rinenga abakinnyi bitwaye nabi kuko byabafasha kwikosora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza