Norwich City yasubiye muri Premier League ku nshuro ya gatanu

Yanditswe na Eric Tony Ukurikiyimfura
Kuya 17 Mata 2021 saa 06:47
Yasuwe :
0 0

Ikipe ya Norwich City yatsindiye gusubira muri Shampiyona y’Icyiciro cya Mbere mu Bwongereza, Premier League, nyuma y’uko Brentford na Swansea City ziri inyuma yayo muri Championship, zombi zananiwe gutsinda kuri uyu wa Gatandatu.

Norwich City itozwa na Daniel Farke, yari yasubiye mu Cyiciro cya Kabiri (Championship) mu mwaka ushize w’imikino wa 2019/20.

Mu mikino y’iyi shampiyona yabaye kuri uyu wa Gatandatu tariki ya 17 Mata 2021, Brentford yanganyije na Millwall ubusa ku busa mu gihe Swansea City yanganyije na Wycombe Wanderers ibitego 2-2.

Kunanirwa gutsinda kw’amakipe yombi byatumye Norwich City ifitanye umukino na AFC Bournemouth saa tatu z’ijoro, ikomeza kuyobora shampiyona n’amanota 90, irusha 14 Swansea City ya gatatu mu gihe Brentford ya kane irushwa 16 kandi habura imikino ine kuri ayo makipe yombi.

Watford ya kabiri n’amanota 82, ni yo kipe rukumbi ishobora kubuza Norwich City kwegukana igikombe cy’Icyiciro cya Kabiri ku nshuro ya gatatu.

Mu nshuro eshanu Norwich City imaze kuzamukamo muri Premier League, ni ubwa mbere ibigezeho hakiri imikino myinshi yo gukina kuva mu 2004.

Ubwo yavaga muri Premier League mu mwaka ushize w’imikino, yatsinzwe imikino 13 muri 15 ya nyuma yakinnye muri iyi Shampiyona y’Icyiciro cya Mbere.

Kugumana umutoza Daniel Farke na benshi mu bakinnyi yari kumwe nayo mu mwaka ushize barimo Grant Hanley, Max Aarons, Teemu Pukki, Emi Buendia, Todd Cantwell na Kieran Dowell, biri mu biyifashije kongera gutsindira gukina Premier League.

Ubwo uyu mwaka w’imikino watangiraga, Norwich ntiyorohewe n’imikino ine ibanza, aho yabonyemo amanota ane, ariko ifata umwanya wa mbere mu mpera z’Ugushyingo ubwo yatsindaga Middlesbrough ku mukino wa 12.

Yabonye itike yo kuzamuka mu Cyiciro cya Mbere imaze kwinjiza ibitego 65 birimo 31 byabonetse hejuru y’umunota wa 75 mu gihe izamu ryayo ryinjiyemo ibitego 28.

Norwich City itozwa na Daniel Farke yasubiye muri Premier League nyuma y'umwaka umwe
Kugumana abakinnyi yamanukanye nabo biri mu byafashije Norwich City kwitwara neza muri Championship
Teemu Pukki (iburyo) yatsinze ibitego 25 naho Emi Buendia (ibumoso) atsinda ibitego 12, atanga n'imipira 17 yavuyemo ibitego kuri bagenzi be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .