Norwich City yabaye ikipe ya mbere ya Premier League imanutse mu cyiciro cya kabiri

Yanditswe na Eric Tony Ukurikiyimfura
Kuya 12 Nyakanga 2020 saa 08:48
Yasuwe :
0 0

Norwich City yabaye ikipe ya mbere yamanutse mu cyiciro cya kabiri mu yakinnye Premier League muri uyu mwaka w’imikino, ni nyuma y’uko inyagiwe na West Ham United ibitego 4-0 ku wa Gatandatu.

Norwich yari yagarutse mu cyiciro cya mbere muri uyu mwaka w’imikino, yari imaze iminsi ititwara neza ndetse yaraye itsinzwe umukino wa karindwi wikurikiranya, ukaba uwa 24 muri shampiyona bituma idashobora gukuramo amanota irushwa n’amakipe ayiri imbere mu gihe hasigaye imikino itatu.

Muri uyu mukino wabereye ku kibuga cya Norwich City, Michail Antonio yafashije West Ham kwizera ko nayo yazaguma mu cyiciro cya mbere, ayitsindira ibitego byose uko ari bine byawubonetsemo.

Igice cya mbere cyarangiye ari ibitego 2-0 byabonetse ku munota wa 11 n’uwa 45 ubwo Antonio yaherezwaga imipira na Issa Diop na Mark Noble.

Uyu rutahizamu w’Umwongereza yatsinze igitego cya gatatu ku munota wa 54 mu gihe icya kane yagitsinze ku munota wa 74, ku mupira yaherejwe na Ryan Fredericks.

Gutsinda uyu mukino byafashje West Ham gushyiramo ikinyuranyo cy’amanota atandatu hagati yayo n’ikipe zo mu murongo utukura mu gihe mu mikino itatu isigaje, izakiramo Watford na Aston Villa.

Ni ku nshuro ya gatatu Norwich City isubiye mu cyiciro cya kabiri mu gihe cy’imyaka irindwi gusa.

Abakurikirana iyi kipe bavuga ko ishobora no kugorwa kugumana abakinnyi beza yari ifite muri uyu mwaka w’imikino barimo umunyezamu Tim Krul, Teemu Pukki, Rodd Cantwell na Jamal Lewis .

Mu yindi mikino yabaye ku wa Gatandatu, Liverpool ifite intego yo gukuraho agahigo ka Manchester City, ikarenza amanota 100 yagize mu mwaka w’imikino wa 2017/18, yaraye inganyije na Burnley igitego 1-1, bituma igira amanota 93 mu gihe hasigaye imikino itatu.

Chelsea ishobora gutakaza umwanya wa gatatu ikisanga ku mwanya wa gatanu nyuma y’uko itsinzwe na Sheffield United ibitego 3-0 mu gihe irusha inota rimwe Leicester City ya kane n’amanota abiri Manchester United ya gatanu, zo zitarakina umunsi wa 35.

Michail Antonio yafashije West Ham United gutsinda Norwich City
Umutoza Daniel Farke yihanganisha Max Aarons nyuma y'umukino
Norwich City yasubiye mu cyiciro cya kabiri mu gihe habura imikino itatu ngo Premier League irangire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .