Nduhungirehe ntavuga rumwe na FERWAFA ku bushobozi bw’abasifuzi na ruswa mu mupira w’u Rwanda

Yanditswe na Eric Tony Ukurikiyimfura
Kuya 14 Werurwe 2020 saa 02:10
Yasuwe :
0 0

Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier usanzwe ari n’umukunzi wa Mukura Victory Sports, yavuze ko bimwe mu bibazo byugarije iterambere ry’umupira w’u Rwanda ari ubushobozi buke bw’abasifuzi na ruswa ikomeje kuwuvugwamo.

Ibi Nduhungirehe yabivuze mu butumwa yashyize kuri Twitter kuri uyu wa Gatanu, agaruka ku kirego cya Mukura Victory Sports yavuze ko yasifuriwe nabi mu mukino iheruka kunganyamo na AS Kigali.

Uyu muyobozi yavuze ko atiyumvisha uburyo Police FC yibwe penaliti eshatu zigaragara mu mikino ibiri yakinnye mu cyumweru gishize.

Yagize ati “Mu Rwanda hari ikibazo gikomeye cy’imisifurire ku buryo FERWAFA igomba kugifatira ingamba. Hari ubushobozi buke bw’abasifuzi, hakaba ndetse na ruswa yafashe indi ntera. Ntibyumvikana ukuntu ikipe ya Police FC ishobora kwibwa penaliti eshatu zose mu mikino ibiri.”

Police FC imaze imikino itatu yikurikiranya nta ntsinzi, iherutse kwandikira FERWAFA ivuga ko yimwe penaliti ku mukino wayihuje na APR FC mu gihe ubwo yahuraga na AS Kigali, nabwo hari imipira ibiri yakozwe n’abakinnyi b’ikipe y’Umujyi wa Kigali, ntihatangwa penaliti.

Mukura Victory Sports na yo yaregeye FERWAFA, ivuga ko yasifuriwe nabi mu mukino yanganyijemo na AS Kigali ku wa Gatatu.

Amagambo ya Nduhungirehe yasembuye ibitekerezo by’abatari bake ku rubuga rwa Twitter, bagira icyo babivugaho.

Ishyirahamwe ry’Umupira w’Amaguru mu Rwanda (FERWAFA) ryasabye uyu muyobozi kureka iby’imisufurire bigaharirwa ababifiteho ubumenyi buhagije mu gihe ku kijyanye na ruswa, rimusaba ko abaye afite ibimenyetso yabigaragaza rikabikurikirana.

Ryagize riti "Nyakubahwa Minisitiri Nduhungirehe, murakoze ku bitekerezo byanyu. Icyakora ntitwemeranya namwe ku kuba muvuga ko abasifuzi bacu bafite ubushobozi buke, cyane cyane ko kumenya ko ibyemezo by’umusifuzi aribyo cyangwa atari byo bisaba ubumenyi buhagije mu misifurire.”

“Ku birebana na Ruswa, turizera ko mutabihamya kuri uru rwego mutabifitiye ibimenyetso. Byaba byiza muduhaye ibyo bimenyetso bya ruswa yafashe indi ntera muri ruhago yacu kugira ngo dufatanye n’inzego zibishinzwe kubirwanya twivuye inyuma.”

“FERWAFA izakomeza gukora ibishoboka byose kugirango imisifurire igende neza mu marushanwa yose itegura.”

Umupira w’amaguru mu Rwanda umaze igihe kitari gito uvugwamo ruswa ariko inzego zose zibishinzwe zikavuga ko nta bimenyetso bigaragazwa ko koko yaba itangwa.

Urwego rw’Umuvunyi, rushinzwe kurwanya ruswa mu nshingano zarwo, ruherutse gutangaza ko nibigaragara ko ruswa iba mu mupira w’u Rwanda, ruzabyinjiramo.

Indi nkuru wasoma: Rurangirwa yavuze ku misifurire yo mu Rwanda na penaliti Police FC ivuga ko yibwe kuri APR FC.

Imisifurire ikomeje kuvugwaho byinshi mu mupira w'u Rwanda
Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, umufana ukomeye wa Mukura VS, yanenze ubushobozi bw'abasifuzi b'abanyarwanda anavuga ko umupira w'u Rwanda urimo ruswa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .