Ndizeye Innocent yasezeye kuri Musanze FC ashinja ubwambuzi

Yanditswe na Eric Tony Ukurikiyimfura
Kuya 18 Mata 2021 saa 09:45
Yasuwe :
0 0

Umukinnyi wo hagati mu kibuga ukina ku mpande asatira izamu, Ndizeye Innocent uzwi nka ‘Kigeme’, yandikiye Musanze FC ayisezera, aho yagaragaje ko atishyuwe imishahara y’amezi atatu.

Ndizeye Innocent yaguzwe na Musanze FC muri Kamena 2020, avuye muri Mukura Victory Sports.

Uyu mukinnyi wamenyekanye akinira Amagaju FC, yandikiye Musanze FC ku wa 14 Mata, ayimenyesha “gusesa amasezerano” kuko atishyuwe imishahara y’amezi atatu.

Yagize ati “Nshingiye ku ngingo ya 14 ya ’Règlement du statuts et du transfert des joueurs’ édition Février 2021, ivuga ko mu gihe ikipe itishyuye imishahara mu gihe cyagenwe na nyuma y’uko umukinnyi ayihaye iminsi 15 ayishyuza ariko ikipe ikabyirengagiza, umukinnyi aba afite uburenganzira n’impamvu yumvikana yo gusesa amasezerano;”

“Nyuma kandi y’uko mbandikiye nsaba ko ikipe ya Musanze yanyishyura imishahara y’amezi atatu imfitiye mu ibaruwa yo kuwa 26/03/2021 ariko singire igisubizo mpabwa;”

“Mbandikiye mbamenyesha ko mfashe icyemezo cyo gusesa amasezerano twari dufitanye, kuva uyu munsi nkaba ntakiri umukinnyi wa Musanze FC kandi nkaba ngiye kwishakira indi kipe.”

Bivugwa ko Ndizeye Innocent yaba yifuzwa na Mukura Victory Sports kugira ngo asubire i Huye gukorana n’abatoza bashya bayobowe na Rodolfo Zapata.

Mbere y’uko Shampiyona y’Icyiciro cya Mbere igaruka tariki ya 1 Gicurasi 2021, amakipe yemerewe kongeramo abakinnyi bashya mu gihe cy’ibyumweru bibiri kugeza tariki ya 29 Mata.

Musanze FC iri mu itsinda C hamwe na AS Kigali, Police FC na Etincelles FC.

Ndizeye Innocent yamenyesheje Musanze FC ko agiye gushaka indi kipe kuko itamwishyuye imishahara y'amezi atatu
Ndizeye Innocent (hagati) yishimira igitego yatsinze AS Muhanga mu Ukuboza 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .