00:00:00 IGIHE NETWORK KN KINYARWANDA EN ENGLISH FR FRANCAIS

Ndatimana Robert ashobora kwerekeza muri Sunrise FC

Yanditswe na Hakizimana Jean Paul
Kuya 24 Mutarama 2023 saa 08:38
Yasuwe :

Ndatimana Robert ari mu biganiro na Sunrise FC bishobora gusiga asinyiye iyi Kipe yo mu Burasirazuba amaze iminsi akoreramo imyitozo.

Sunrise FC iri ku mwanya wa Cyenda wa Shampiyona igeze ku Munsi wayo wa 16, aho ifite amanota 23.

Iyi kipe nubwo idahagaze nabi cyane ariko iracyafite gahunda zo kwiyubaka mbere y’uko Isoko ry’Igura n’Igurisha rito rifungwa ku wa Gatanu, tariki ya 27 Mutarama 2023.

Visi Perezida wa Mbere wa Sunrise FC, Hodari Hillary, yabwiye IGIHE ko kuri ubu bari kureba niba hari abakinnyi bandi bashya bakongera muri iyi kipe gusa avuga ko basanzwe bafite ikipe nziza kandi bayizeyeho kwitwara neza.

Yakomeje ati “Turi kureba niba twakongeramo abakinnyi bashya nka bangahe, aho dufite ikibazo cyane ni kuri gatatu, turi kureba niba twabona undi mukinnyi w’Umunyarwanda twakongeramo agafatanya n’abahari.’’

Yunzemo ko mu batekerezwaho harimo na Ndatimana umaze iminsi akorera imyitozo muri Sunrise FC.

Ati “Kuri Ndatimana we twari twamuhaye amahirwe ngo aze akore imyitozo turebe uko ameze. Ubu rero turacyaganira ntabwo turamusinyisha ariko nibigenda neza tukumvikana nta wamenya wenda bizaba.”

Hodari yavuze ko ikipe basanganywe bayifitiye icyizere cyo gukomeza kwitwara neza ariko ko bafatanyije n’abatoza bakireba niba hari abakinnyi bake bakongeramo kugira ngo bakomeze kuyifasha kwitwara neza.

Ndatimana Robert ushobora gusinyira Sunrise FC ni umukinnyi wo hagati mu kibuga wamenyekanye bwa mbere ari mu Ikipe y’u Rwanda y’Abatarengeje imyaka 17 yahaye benshi ibyishimo ibona itike yo gukina Igikombe cy’Isi cyabereye muri Mexique mu 2011.

Nyuma y’aho uyu mukinnyi yanyuze mu makipe arimo Isonga FC, Rayon Sports, Police FC, Bugesera FC, Gicumbi FC na Sunrise FC ari na yo aherukamo mu mwaka ushize.

Nyuma y’aho hagiye hasohoka amakuru avuga ko uyu mukinnyi yarwaye ku buryo atagishobora gukina umupira w’amaguru.

Mu kiganiro Ndatimana aheruka guha IGIHE yagarutse ku burwayi yagize bwatumye areka gukina.

Yavuze ko yari arwaye indwara y’agahinda gakabije (Depression) gusa ngo abantu benshi ntibabimenye bamwitaga umusazi abandi bakabibona nk’aho ari imyitwarire mibi aho kumwegera ngo bamubaze bagahitamo kumuhunga.

Yaje kwivuriza mu Bitaro bya Caraes Ndera abifashijwemo n’umuryango we, arakira. Kuri ubu yaragarutse ameze neza ndetse mu minsi ishize yanakinnye umukino wa gicuti wahuje Sunrise FC na Rwamagana City.

Ikipe ya Sunrise FC yatangiye imikino yo kwishyura inganya na Bugesera FC 1-1. Iyi kipe igiye kwakira imikino itatu izayihuza n’amakipe arimo Gasogi United, APR FC na Marines FC.

Inkuru wasoma: Ndatimana Robert yagarutse! Yavuze ku burwayi bwamuzonze akajya kuvurizwa i Ndera (Video)

Ndatimana Robert ari mu biganiro na Sunrise FC bishobora gusiga asinyiye iyi kipe amaze iminsi akoreramo imyitozo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .