Myugariro wa Liverpool yanditswe muri ‘Guiness des Records’

Yanditswe na Ndayikunda Josué
Kuya 16 Ukwakira 2019 saa 08:15
Yasuwe :
0 0

Umwongereza Trent Alexander-Arnold ukinira Liverpool yanditswe mu gitabo cy’abakoze ibintu bidasanzwe ku isi, Guinness des Records, nyuma yo gutanga imipira yavuyemo ibitego 12 mu mwaka umwe wa Shampiyona y’Abongereza ya 2018/2019, akabikora akina nka myugariro.

Usanga akenshi ba myugariro badakunze gutanga imipira ivamo ibitego bitewe n’umwanya bakinaho mu kibuga.

Alexander-Arnold w’imyaka 21 yanditse amateka yo kuzuza 12 byahise binatuma aca kuri Leighton Baines watanze imipira yavuyemo ibitego 11 mu mwaka w’imikino wa 2010/2011 ndetse na Andy Hinchcliffe wabikoze mu 1994/95. Aba bombi bakaba barabikoreye mu ikipe ya Everton.

Nyuma yo kwandikwa mu gitabo cy’abahize abandi ku Isi, uyu Mwongereza yatangaje ko ari ibihe bidasanzwe kuri we n’umuryango we, anavuga ko uruhare runini rwagizwe n’abakinnyi bagenzi be, umutoza n’abafana.

Ati” Ibi byakozwe n’abasore bashyiraga umupira mu rucundura kuko umupira w’amaguru ni umukino ukinwa ku bufatanye. Iyo ntaza kugira abakinnyi bamfasha, umutoza n’abafana baba baturi inyuma, sinari kugera kuri aka gahigo.”

Trent Alexander-Arnold yakomeje avuga ko ubwo yari akiri muto yakundaga gusoma igitabo cya ‘Guiness des Records’ none kuri ubu akaba ashimishijwe no kubona izina rye ricyanditsemo.

Ati“ Nkiri muto nakundaga gusoma igitabo cya Guiness des Records kuko gishimishije kugisoma, kumenya ibyo abantu bagezeho hirya no hino ku Isi. Ni ibihe bitangaje kuri njye n’umuryango wanjye.”

Uyu musore w’Umwongereza yabaye umukinnyi muto wabashije gutanga imipira itatu yavuyemo ibitego mu mukino umwe, ibi akaba yarabikoze mu mwaka ushize wa Shampiyona y’Abongereza ubwo Liverpool yakinaga na Watford.

Alexander Trent-Arnold ni umwe mu bakinnyi b’inkingi za mwamba bafashije Liverpool kwegukana igikombe UEFA Champions League mu mwaka ushize w’imikino.

Trent Alexander-Arnold yatanze imipira 12 yavuyemo ibitego kuri bagenzi be mu mwaka ushize w'imikino
Umwongereza Trent Alexander-Arnold ukinira Liverpool yanditswe mu gitabo cy’abaciye uduhigo dutandukanye ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza