Musanze FC yavuze ku makuru avuga ko umutoza wayo yanduye Coronavirus

Yanditswe na Eric Tony Ukurikiyimfura
Kuya 24 Werurwe 2020 saa 05:33
Yasuwe :
0 0

Ikipe ya Musanze FC yatangaje ko amakuru avugwa ko umutoza wayo mukuru w’Umunya-Misiri, Ahmed Abdelrahman Ibrahim Adel, yanduye icyorezo cya Coronavirus nta shingiro afite.

Abdelrahman Ibrahim Adel yagizwe umutoza wa Musanze FC tariki ya 2 Ukuboza 2019, asimbuye Umurundi Niyongabo Amars wari umaze iminsi itanu yirukanywe.

Ubwo Shampiyona n’ibindi bikorwa byose bihuza abantu benshi byari bimaze guhagarikwa mu Rwanda ku wa 14 Werurwe, Ahmed Adel yasubiye iwabo mu karuhuko gato.

Uyu mugabo w’Umunya-Misiri yagarutse mu Rwanda kuwa Kane w’icyumweru gishize, tariki ya 19 Werurwe, ari nabwo hatangiye kuvugwa ko yaba yaranduye Coronavirus.

Ibinyujije ku rubuga rwa Twitter, Musanze FC yanyomoje ayo makuru, ivuga ko nta shingiro afite.

Ati “Turabamenyesha ko ibihuha bimaze iminsi bivugwa ko umutoza mukuru Ahmed Adel yanduye Covid-19 nta shingiro bifite kandi bibogamye. Ameze neza kandi afite umutekano, ari mu rugo.”

Umunyamabanga Mukuru wa Musanze FC, Makuza Rutishereka Jean, yabwiye IGIHE ko Ahmed Adel yapimwe n’inzego zishinzwe ubuzima zigasanga ataranduye Coronavirus.

Ati “Nyuma yo kugera hano avuye mu Misiri aho yari yajyanye n’umwungirije [we wasigayeyo], tariki ya 20 Werurwe [Ku wa Gatanu] ababishinzwe baje kumureba mu rugo bamujyana mu bitaro bikuru bya Ruhengeri baramupima, ibizamini babyohereza i Kigali. Yahamaze ijoro rimwe, ibisubizo bye byaje tariki ya 21 Werurwe bigaragaza ko ari muzima, baramureka arataha.”

Kuva ageze muri Musanze FC, Ahmed Adel amaze gutoza iyi kipe mu mikino 12, ayihesha amanota 18 ndetse Shampiyona yahagaze iri ku mwanya wa 11 n’amanota 27 mu mikino 24.

Musanze FC yanyomoje amakuru avugwa ko umutoza wayo Ahmed Adel yanduye Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .