Iyi kipe yabaye iya gatatu muri Shampiyona ishize, ifite intego yo kongera kwitwara neza mu mwaka w’imikino wa 2024/25.

Mu bakinnyi yari ifite babanzaga mu kibuga mu 2023/24, Umunyezamu Muhawenayo Gad ni we wayisohotsemo yerekeza muri Gorilla FC.

Kuri ubu, iyi kipe yo mu Majyaruguru yamaze kongeramo amaraso mashya aho yaguze myugariro w’ibumoso Ndizeye Gad wavuye muri Police FC, Kamanzi Ashraf ukina hagati asatira izamu, wavuye muri Mukura Victory Sports na myugariro wo hagati Mukengere Christian wavuye muri Bugesera FC.

Abandi bakinnyi yaguze ni Umunya-Gambia Hydra Buba wavuye muri Rihno FC, Umunya-Uganda Salim Abdallah wavuye muri URA FC, Umunya-Nigeria Sunday Inemesit wavuye muri Etoile de l’Est n’Umunya-Cameroun Nkofor Ngafei wavuye muri Coasta Union yo muri Tanzania, bose basinye imyaka ibiri.

Amakuru IGIHE yamenye ni uko iyi kipe isa n’iri kuva ku isoko kuko umukinnyi umwe ishobora kongeramo ari Umunyezamu Nsabimana Jean de Dieu ‘Shaolin” wakiniraga Bugesera FC.

Musanze FC izatangira Shampiyona nshya yakira Muhazi United mu mukino w’Umunsi wa Mbere uzabera kuri Stade Ubworoherane ku Cyumweru, tariki ya 18 Kanama 2024.

Umunya-Uganda Salim Abdallah yavuye muri URA FC

Kamanzi Ashraf wavuye muri Mukura VS, ni umwe mu bakinnyi bashya bari muri Musanze FC

Umunya-Cameroun Nkofor Ngafei akina hagati mu kibuga yugarira