Muri miliyari 5.6 Frw zo guteza imbere ruhago, miliyari 1.59 Frw yagenewe Amavubi; andi azakoreshwa iki?

Yanditswe na Eric Tony Ukurikiyimfura
Kuya 9 Mutarama 2021 saa 05:04
Yasuwe :
0 0

Amakipe y’Igihugu y’abagabo n’abagore mu mupira w’amaguru ‘Amavubi’ yagenewe asaga ¼ cy’ingengo y’imari Ishyirahamwe ry’Umupira w’Amaguru ryageneye iterambere rya ruhago mu 2021.

Mu ntangiriro z’uyu mwaka ni bwo FERWAFA yemeje ko ingengo y’imari ya 2021 izaba ingana na 6,364,175,639 Frw.

Aya yose yavuye muri miliyari 6.58 Frw yateganyijwe, ariko hakaba harakuwemo miliyoni 152,475 Frw azakoreshwa mu 2022 mu mupira w’abagore na miliyoni 69.595 Frw azishyurwa mu rwego rwo kugabanya imyenda iri shyirahamwe rifite.

Amafaranga FERWAFA yateganyije azava he?

FERWAFA yatangiye uyu mwaka wa 2021 ifite kuri konti ibihumbi 710$ (angana na miliyoni 695.8 Frw) arimo ibihumbi 500$ yatanzwe na FIFA ku mupira w’abagore mu bihe bya COVID-19, ariko kugeza ubu akaba atarashyikirizwa abo agenewe kuko hari ibyo bataruzuza.

Andi mafaranga iri shyirahamwe ryiteze ni miliyoni 1$ (miliyoni 980 Frw) azatangwa na FIFA asanzwe atangwa buri mwaka mu bikorwa by’amashyirahamwe, ibihumbi 500$ (miliyoni 490 Frw) nk’icyiciro cya kabiri cy’inkunga izatangwa na FIFA mu kugoboka amashyirahamwe muri COVID-19, ibihumbi 200$ (miliyoni 196 Frw) atangwa na FIFA mu gufasha ibijyanye n’amacumbi n’ingendo ku makipe y’Igihugu mu byiciro bitandukanye n’andi ibihumbi 100$ (miliyoni 98 Frw) atangwa rimwe mu myaka ibiri, agenewe ibikoresho by’umupira w’amaguru.

FERWAFA iteganya kandi kwakira miliyoni 2$ (miliyari 1.96 Frw) azatangwa na FIFA muri gahunda ya FIFA Forward 2.0 agenewe kubaka ibibuga, ibihumbi 200$ (miliyoni 196 Frw) atangwa na CAF buri mwaka, miliyoni 6 Frw azava mu ivuriro ryayo.

Andi ni azatangwa na Minisiteri ya Siporo arimo miliyoni 13.4 Frw zo guhemba Umuyobozi wa Tekinike, miliyoni 94 Frw zo guhemba abatoza Ikipe y’Igihugu, miliyoni 4.2 Frw ashobora kuzinjizwa na Gym yayo niyemererwa gukora, miliyoni 1.8 Frw azava ku bibuga abafana nibemererwa kureba imikino, miliyoni 4 Frw azava mu kwiyandikisha kw’amakipe y’Icyiciro cya Mbere n’icya Kabiri na miliyoni 2 Frw azava mu kwiyandikisha mu Gikombe cy’Amahoro.

Abafatanyabikorwa barimo Bralirwa na RBA bitezweho kwinjiza miliyoni 200 Frw, umushinga wa FIFA wo guteza imbere ruhago mu mashuri ugashorwamo miliyoni 49 Frw, Minisiteri ya Siporo igatanga miliyoni 200 Frw mu guteza imbere no kubaka ibigo biteza imbere impano (Isonga) mu ntara enye ndetse na miliyari 1.395 Frw ku makipe y’igihugu.

Amafanga yose azakoreshwa gute?

Ingengo y’imari ya FERWAFA mu 2021 igabanyije mu bice bibiri birimo miliyoni 723.82 Frw zizajya mu miyoborere na serivisi zitandukanye zayo mu gihe asaga miliyari 5.6 Frw asigaye azajya mu guteza imbere umupira w’Amaguru.

Muri uku guteza imbere umupira, miliyoni 10 Frw zizashyirwa mu gushyiraho gahunda ihamye y’iterambere rya ruhago y’abagore mu gihe gutegura amarushanwa y’abana bari munsi y’imyaka 13, 15 na 17, bizatwara miliyoni 158.9 Frw, miliyoni 48 Frw muri ayo akajya mu gushyigikira ubushobozi bw’amakipe y’abakobwa.

Hateganyijwe kandi gushyiraho irushanwa rigamije gukundisha umupira abakiri bato, abari hagati y’imyaka itandatu na 13 mu turere twose uko ari 30, bizatwara miliyoni 64 Frw, gushyiraho ibigo by’icyitegererezo mu bahungu bizatwara miliyoni 200 Frw ndetse n’ibindi nk’ibi mu bakobwa, byo bizatwara miliyoni 44 Frw. Aya yose, azaba arimo kwishyurira abana batoranyijwe mu mashuri, guhemba abatoza no kubagurira ibikoresho birimo imipira yo gukina.

Miliyoni 224 Frw yagenewe gutegura amakipe y’Igihugu y’abato mu bahungu no kuyashakira imikino ya gicuti mu gihe ay’abakobwa azatwara miliyoni 170.8 Frw.

Guhugura abatoza, abasifuzi n’abaganga ku bufatanye na CAF na FIFA, byagenewe miliyoni 154.8 Frw mu gihe gutegura amarushanwa atandukanye arimo ay’amakipe y’abagabo bizatwara miliyoni 696 Frw.

Guhemba amakipe yatwaye ibikombe mu marushanwa atandukanye byagenewe miliyoni 85 Frw naho gutegura amakipe y’igihugu makuru bizatwara miliyari 1.595 Frw.

Muri aya mafaranga, Ikipe y’Igihugu ya CHAN yagenewe miliyoni 145 Frw mu myiteguro, gutegura imikino ya gicuti yemewe na FIFA bigenerwa miliyoni 300 Frw, gutegura imikino yo gushaka itike ya CAN 2021 bigenerwa miliyoni 400 Frw mu gihe andi miliyoni 350 Frw azakoreshwa mu gutegura imikino ibiri yo gushaka itike y’Igikombe cy’Isi cya 2022 naho Ikipe y’Abagore izakoresha miliyoni 400 Frw mu marushanwa n’imikino yose izakina.

Miliyoni 233.17 Frw ni zo zagenewe ibikorwa bitandukanye by’abasifuzi birimo amafaranga bahabwa iyo basifuye imikino (azaba angana na miliyoni 204.17 Frw) mu gihe andi ari agenewe amahugurwa atandukanye bahabwa.

Ikipe y'Igihugu y'abagabo 'Amavubi' yagenewe hafi miliyari 1.2 Frw mu 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .