Abinyujije ku rubuga rwa X, Murangwa yavuze ko kugeza ubu bitangaje kuba yaba Ferwafa ndetse n’abo muri Rwanda Premier League, nta n’umwe wari watanga impamvu ifatika ku cyifuzo cye cyo kugabanya, kongera cyangwa kutongera abanyamahanga, ikintu gikomeje gushyira mu rujijo abakunzi b’umupira w’u Rwanda.

The Debate Over Foreign Players in the Rwanda Premier League: What's at Stake?

The ongoing debate about the number of foreign players permitted in the @RwandaLeague raises important questions about the future of Rwandan football.
1/

— Eric E Murangwa MBE (@e_murangwa) August 19, 2024

Murangwa wambitswe umudari w’ishimwe uri mu cyiciro gikomeye cyane mu Bwongereza mu 2018, yavuze ko kuri we asanga kongera abanyamahanga muri Shampiyona y’u Rwanda byahita biyizamurira urwego, gusa atangaza ko byasaba kwiganwa ubushishozi kugira ngo umupira w’u Rwanda utazongera kugira ibibazo nk’ibyo wagize mu ntangiriro z’imyaka ya 2000.

Ati “Iyo urebye uburyo kugeza ubu ibijyanye no kuzamura impano mu mupira wo mu Rwanda birimo imbogamizi, kongera umubare w’abanyamahanga byazamura urwego rwa Shampiyona yacu, ariko bigomba kujyana na gahunda ihamye y’uburyo impano z’abakiri bato zizajya zizamurwa ku buryo bukwiye.”

“Turamutse tudashyizeho umurongo uhamye w’umupira wacu, twasanga twongeye gukora amakosa yakozwe mu mpera z’imyaka ya 1990 n’intangiriro za 2000 ubwo icyari kituraje ishinga kwari ugukoresha abanyamahanga muri shampiyona no mu Ikipe y’Igihugu.”

Murangwa Eric Eugène yari yatanze kandidatire ku kuyobora Komisiyo Ishinzwe Iterambere ry’Umupira w’Amaguru mu Rwanda mu matora aheruka, gusa iyi ntiyakirwa kubera ko atari yujuje ibyangombwa.

Uyu akaba yiyongereye ku bakunzi benshi b’Umupira w’amaguru bategererezanyije amatsiko umwanzuro wa nyuma wa Ferwafa wo kubijyanye no kongera abanyamahanga.

Amakuru IGIHE ifite ni uko bitarenze impera z’uku kwezi uyu mwanzuro uzaba wagiye hanze, aho nta gihindutse aba bazaba ari 10 ku rupapuro rw’umukino barimo barindwi batangira mu kibuga.

Murangwa Eric Eugène MBE ayobora ishyirahamwe ry'abahoze bakinira Ikipe y'Igihugu Amavubi.

Police FC iheruka kwegukana Super Cup iri mu makipe ashobora kugorwa muri Shampiyona mu gihe abanyamahanga batakongerwa.

Abakunzi b'umupira w'amaguru barifuza ko umubare w'abanyamahanga bajya mu kibuga wazamurwa ukava kuri batandatu bemewe kuri ubu.