Munyakazi Sadate yemereye buri mukinnyi w’Amavubi agahimbazamusyi nibatsinda Uganda muri CHAN 2020

Yanditswe na Eric Tony Ukurikiyimfura
Kuya 13 Mutarama 2021 saa 06:46
Yasuwe :
0 0

Uwahoze ari Perezida wa Rayon Sports, Munyakazi Sadate, yemereye buri mukinnyi w’Amavubi 100$ (hafi ibihumbi 99 Frw) mu gihe batsinda Uganda mu irushanwa rya CHAN 2020 rigiye kubera muri Cameroun.

Ikipe y’Igihugu yerekeje i Douala kuri uyu wa Gatatu gukina Shampiyona Nyafurika y’abakinnyi bakina imbere mu bihugu byabo izaba hagati ya tariki ya 16 Mutarama n’iya 7 Gashyantare 2021.

Umukino wa mbere w’u Rwanda muri CHAN igiye kuba ku nshuro ya gatandatu, uzakinwa ku wa Mbere tariki ya 18 Mutarama saa Tatu z’ijoro, ruhura na Uganda mu itsinda C. Ku wa 22 Mutarama ruzakina na Maroc mbere yo guhura na Togo ku wa 26 Mutarama.

Uwahoze ari Umuyobozi wa Rayon Sports, Munyakazi Sadate, yanditse ku rubuga rwa Twitter ko Amavubi naramuka atsinze Uganda, buri mukinnyi azamuha 100$.

Yagize ati “Nta kinini navuga ku basore bacu, gusa uko bizagenda kose turabashyigikiye kuko muzitanga bihagije. Icyo mbisabiye ku mpamvu zanjye bwite ntimuzatanteze Umugande rwose, muzamutsinde ndetse n’intego ndayemeye rwose, 100$ kuri buri umwe muri Cameroun iyo ntsinzi niboneka.”

Mu gihe Amavubi yatsinda Uganda idakunze kuyorohera, Munyakazi Sadate azaba asabwa gutanga hafi miliyoni 3 Frw (3000$) ku bakinnyi 30.

Si ubwa mbere Munyakazi Sadate yaba atanze agahimbazamusyi kangana gutya dore ko mbere y’umukino wahuje Rayon Sports na APR FC muri Mata 2019, yemereye abakinnyi kubaha agahimbazamusyi k’ibihumbi 100 Frw kuri buri umwe wari kugaragara ku mukino ndetse bivugwa ko byarangiye atanze miliyoni 2.35 Frw.

Munyakazi yabaye uwa kabiri wemereye Amavubi agahimbazamusyi kazwi muri CHAN 2020 nyuma ya Mbonabucya Désiré wabaye Kapiteni w’Ikipe y’Igihugu, uherutse gutangaza ko narenga amatsinda ya CHAN, azayaha miliyoni 5 Frw mu gihe Minisitiri wa Siporo, Munyangaju Aurore Mimosa, yavuze ko aba bakinnyi nibitwara neza bazashimirwa.

U Rwanda rwakiriye CHAN 2016, rugiye gukina iri rushanwa ku nshuro ya gatatu yikurikiranya n’iya kane muri rusange nyuma yo kwitabira CHAN 2011 yabereye muri Sudani. Inshuro ebyiri gusa (2009 na 2014) nizo u Rwanda rutitabiriyemo iri rushanwa.

Kure Ikipe y’Igihugu yageze muri iri rushanwa ni muri ¼ mu 2016 ubwo yasezererwaga na Repubulika Iharanira Demokarasi ya Congo iyitsinze ibitego 2- muri CHAN yabereye mu Rwanda.

Munyakazi Sadate yemereye buri mukinnyi w’Amavubi agahimbazamusyi ka 100$ nibatsinda Uganda muri CHAN 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .