Mukura VS yasubiriye Gasogi United, Kiyovu Sports na Police FC zitwara neza

Yanditswe na Eric Tony Ukurikiyimfura
Kuya 15 Gashyantare 2020 saa 06:53
Yasuwe :
0 0

Igitego kimwe rukumbi cyatsinzwe na Iradukunda Jean Bertrand, cyafashije Mukura Victory Sports gutsinda Gasogi United 1-0 mu mukino w’umunsi wa 20 wa Shampiyona wabereye kuri Stade ya Kiigali i Nyamirambo kuri uyu wa Gatandatu.

Ni byinshi byari byatangajwe ku mpande zombi, aho Gasogi United yavugaga ko yatsinzwe mu mikino ibanza yibwe mu gihe Mukura Victory Sports yari yahize kongera gutanga isomo kuri iyi kipe yazamutse mu cyiciro cya mbere uyu mwaka.

Mukura Victory Sports yakabaye yafunguye amazamu mu minota 20 ya mbere, uburyo bubiri bwabonywe na rutahizamu w’Umunya-Ghana, Muniru Abdul Raman, ntiyabubyaza umusaruro.

Uburyo bwa mbere bwari ubwo ku munota wa 18, aho yacomekewe umupita maze asiga ba myugariro ba Gasogi United, asigaranye na Kwizera Olivier, ananirwa kumurenza umupira, ukurwaho n’amaguru n’uyu munyezamu.

Nyuma y’umunota umwe, Muniru yabonye ubundi buryo acitse Ndabarasa Trésor, acenga Kwizera Olivier, arebana n’izamu atera umupira wafashe inshundura ntoya.

Mukura Victory Sports yungukiye ku guhuzaguruka k’ubwugarizi bwa Gasogi United maze ku munota wa 31, Iradukunda Bertrand atsinda igitego kimwe rukumbi cyabonetse mu mukino arobye umunyezamu Kwizera Olivier wasohotse agiye kurwana kuri ba myugariro be.

Iminota ya nyuma y’igice cya mbere yihariwe na Gasogi United, ariko ubwugarizi bwa Mukura Victory Sports bwari buyobowe na Olih Jacques bwihagararaho mu gihe umupira watewe na Hassan Kikoyo ku ruhande rwa Gasogi United, wagiye hanze.

Umunyezamu Iratugenera Edouard yarokoye Mukura Victory Sports ubugira kabiri, akuramo umupira w’umuterekano watewe na Kaneza Augustin ndetse n’uwa Rugamba Jean Baptiste mu rubuga rw’amahina.

Gasogi United yakomeje gusatira ishaka igitego cyo kwishyura, ariko uburyo bundi bukomeye bwabonetse mu mukino bwabonetse ku ruhande rwa Mukura Victory Sports, umupira watewe na Ntwari Evode ufatwa na Kwizera Olivier.

Imikino isanzwe y’umukino yarangiye Mukura Victory Sports itsinze igitego 1-0, igira amanota 34 ku mwanya wa kane mu gihe Gasogi United yagumanye amanota 22.

Mu yindi mikino yabaye uyu munsi, Police FC yatsindiye Heroes FC ibitego 3-1 mu Bugesera, igira amanota 43 ku mwanya wa kabiri, irusha inota rimwe Rayon Sports izakira Sunrise FC ejo ku Cyumweru.

Etincelles FC yatsindiwe mu rugo na Bugesera FC ibitego 3-1 mu gihe Kiyovu Sports yatsinze Gicumbi FC ibitego 3-1 mu mukino wabereye ku Mumena, igira amanota 32 ku mwanya wa gatanu.

Yamini Salumu na Iradukunda Bertrand bakurikiye umupira
Yamini Sakumu ashyira hasi Bertrand ngo atamutwara umupira
Umutoza wa Gasogi United, Guy Bukasa, atanga amabwiriza ku bakinnyi be
Umuhanzi Safi Madiba (iburyo) ni umwe mu barebye uyu mukino
Umuyobozi wa Gasogi United, KNC (ibumoso) areba uko ikipe ye ikina
Umusifuzi wo ku ruhande Mutuyimana Dieudonné yashyize igitambaro hasi abanza gufunga neza inkweto
Nshimiyimana Ibrahim ashaka uko acenga myugariro Ngirimana Alex wa Mukura VS
Ngirimana Alex akura umupira kuri Manace Mutatu wa Gasogi United
Yamini Salumu atwara umupira, akurikiwe n'abakinnyi batatu ba Mukura VS
Rutahizamu wa Gasogi United, Nshimiyimana Ibrahim mu kirere atera umupira n'umutwe
Umugande Hassan Kikoyo agerageza guhagarika umupira wari wamusize
Iradukunda Bertrand yambura umupira Kaneza Augustin
Yamini Salumu ajya gutera umupira wari uteretse muri koruneri
Umutoza wa Mukura VS, Toni Hernandez atanga asaba abakinnyi be kugaruka
Abafana ba Gasogi United bategereje igitego cyo kwishyura barakibura
Abafana ba Mukura VS bamwenyuye hakiri kare
Iradukunda Bertrand na Hassan Kikoyo batanguranwa umupira mu kirere
Iradukunda na Hassan Kikoyo bitegereza aho umupira ugana nyuma yo kuwutera n'umutwe
Mutijima Janvier (iburyo) asatira Rugamba Jean Baptiste wari ufite umupira
Rugamba Jean Baptiste winjiye asimbuye Muganza, yahushije uburyo bwabazwe muri uyu mukino
Myugariro wa Mukura Victory Sports, Ngirimana Alex acira amazi
Ndikumana Tresor ashoreye umupira ubwo yari akurikiwe na Ntwari Evode
Uwihoreye Jean Paul ashimira Imana nyuma yo kubona amanota atatu
Ngirimana Alex wa Mukura ahagurutsa Ndikumana Tresor wa Gasogi United
Abakinnyi ba Gasogi United ntibiyumvishaga uburyo batsinzwemo
Iradukunda Jean Bertrand yishimira guhesha Mukura Victory Sports amanota atatu
Ndayisenga Ramadhan, Ngirimana Alex na Mutijima Janvier bafata ifoto ubwo umukino wari urangiye

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .