00:00:00 IGIHE NETWORK KN KINYARWANDA EN ENGLISH FR FRANCAIS

Muhadjiri mu bakinnyi bashya ba Police FC bayifashije kwigobotora Gorilla FC (Amafoto na Video)

Yanditswe na Iradukunda Olivier
Kuya 20 Mutarama 2023 saa 07:57
Yasuwe :

Police FC ibifashijwemo n’abakinnyi barimo Hakizimana Muhadjiri uheruka kuyisinyira yatsinze Gorilla FC ibitego 3-2 mu mukino w’Umunsi wa 16 wa Shampiyona wabereye kuri Stade ya Bugesera ku wa Gatanu, tariki ya 20 Mutarama 2023.

Umukino wahuje amakipe yombi akurikiranye ku rutonde rwa Shampiyona, kuko Police FC yari ku mwanya wa 11 n’amanota 21, inyuma ho umwanya umwe ya Gorilla FC yari ku wa 10 ariko banganya amanota.

Police FC y’Umutoza Mashami Vincent, yongereye imbaraga mu bakinnyi bayo yinjiza abashya, ni yo yagaragaraga nk’ikomeye kurusha Gorilla FC ya Gatera Mussa.

Ku rundi ruhande, Twizerimana Onesme yakinaga n’ikipe yahozemo muri uyu mukino wayobowe na Ngaboyisonga Patrick.

Gorilla FC ni yo yagerageje kwinjira mu mukino mbere ya Police FC ariko inakoresha imbaraga nyinshi cyane.

Ibi ntibyarambye kuko iyi kipe y’Igipolisi yabonye amahirwe ya mbere ku munota wa 15, ihita inabona penaliti yakozwe na Kayijuka Hamidu wakoze umupira mu rubuga rw’amahina ku mupira Mugisha Didier yari ateye mu izamu. Yahise yinjizwa neza na Muhadjili Hakizimana ku munota wa 16.

Iki gitego cyatumye Police FC yinjira mu mukino, yongera imbaraga mu kotsa igitutu Gorilla FC.

Ku zuba ry’igikatu, amakipe yombi yageze aho ahabwa akanya ko gusoma ku mazi, kashyizweho ku munota wa 38.

Kagiriye umumaro abakinnyi ariko Police FC nyuma yako iza kubona ikindi gitego cyavuye ku mupira wazamukanywe neza na Ruhumuriza Patrick, awuhawe na Nshuti Dominique, na we ahita awuzamura mu rubuga rw’amahina Mugisha Didier, mushya muri iyi kipe awuboneza mu rushundura.

Mugisha Didier yongeye guhusha ubundi buryo ku munota wa 48, mu nyongera y’iminota itanu yashyizwe ku gice cya mbere; aha Umunyezamu wa Gorilla FC, Mugisha Yves, yitwaye neza awushyira muri koruneri.

Ibi bitego ni byo byasoje igice cya mbere cy’umukino cyarangiye Gorilla FC itarabasha kunyeganyeza inshundura.

Igice cya kabiri cyatangiye Gorilla FC ica amarenga yo kwishyura ndetse yabonye uburyo bwa mbere ku makosa ya Hakizimana Amani, ariko Habimana Yves awutera hanze y’izamu.

Iki gikorwa cyakanguye Police FC yasabwaga kutirara, igashaka ikindi gitego. Ku munota wa 49 w’umukino, Ntwali Evode yateye ishoti riremereye atsinda igitego cya gatatu.

Iki gitego cyatumye abakinnyi ba Police FC birara, byongerera imbaraga aba Gorilla FC yahise ibyuka ijya kugabanya ikinyuranyo cy’ibitego.

Ku munota wa 60, Ngabonziza Patrick na Ntwari Evode basimbuwe na Ntirushwa Aimé na Kayitaba Bosco ku ruhande rwa Police FC.

Gorilla FC na yo yahise ikora ikora impinduka, ikura Habimana Yves mu kibuga, imusimbuza Mohamed Bobo Camara.

Ku munota wa 75 kandi Hakizimana Muhadjiri na Mugisha Didier, bombi basimburijwe rimwe, hajyamo Iyabivuze Osée na Sibomana Patrick.

Uku gukomeza kwirara kwa Police FC, kwatumye Adeshola Adeaga atsindira Gorilla FC igitego cya mbere, cyavuye kuri penaliti yatanzwe nyuma y’ikosa Rutanga Eric yakoreye Bobo Camara mu rubuga rw’amahina.

Police FC yongeye gukora impinduka mu minota ya nyuma y’umukino, kapiteni Nshuti Dominique Savio asohoka mu kibuga, hajyamo Ndayishimiye Antoine Dominique.

Nyuma y’iminota itatu gusa imaze gukora impinduka, Iradukunda Siméon yatsinze igitego cya kabiri cya Gorilla FC ku munota wa 85, atereye ishoti rikomeye mu rubuga rw’amahina nyuma yo gufungirwa umupira na Bobo Camara.

Uku ni ko umukino warangiye ikipe y’abashinzwe umutekano iwucyuye ku bitego 3-2 bya Gorilla FC.

Nyuma y’uyu mukino Police FC yahise ijya ku mwanya wa gatandatu, ifite amanota 24, nubwo andi makipe iri imbere atarakina. Gorilla FC yafashe umwanya wa 11 n’amanota 21.

Hakizimana Muhadjiri yatangiye neza atsindira Police FC igitego cya mbere
Nshuti Dominique ashakisha uko yambura umupira Karema Eric
Mugiraneza Jean Baptiste ntarakira ngo ajye mu kibuga
Mugisha Didier yitwaye neza ku mukino we wa mbere wa Police FC
Mu gice cya Kabiri Police Fc yakinnye umukino ugenda gahoro
Kwizera Janvier yageragaho agaterwa amashoti, yinjijwe ibitego bibiri
Kubona abafana byabaye ibibazo ku makipe ari kwakirira mu ntara
Johnson Adeaga na mugenzi we bamaze gutsinda igitego cya kabiri
Habimana Yves wa Gorilla FC na Hakizimana Muhadjili bahatanira umupira
Gorilla FC yavuye inyuma ishaka kwishyura Police FC ariko ntiyabigeraho
Duru Mercy na Kayijuka Hamidu bababajwe no kudatsinda umukino
Adeshora Adeaga yatsindiye Gorilla FC igitego
Abakinnyi ba Police FC babanje hanze mu mukino bahuriyemo na Gorilla FC
Umukino wagaragayemo gukoresha imbaraga kuri Gorilla FC nubwo yatakaje umukino
Umukino wabaye ku zuba rikakaye
Sibomana Patrick yahoberanye n'Umutoza Mashami Vincent umukino urangiye
Ngabonziza Patrick yasimbuwe na Kayitaba Bosco wageze muri Police FC atijwe na AS Kigali
Abakinnyi ba Police FC bakora akanama k'uburyo bari bwitware
Hakizimana Muhadjiri yagarukanye imbaraga nyinshi
Nshuti Dominique Savio wari kapiteni wa Police FC ahanganye n'abakinnyi ba Gorilla FC
Ruhumuriza Patrick ahanganiye umupira wa Habimana Yves
Nsabimana Eric Zidane wa Police FC yakinanaga imbaraga nyinshi
Police FC yatsinze Gorilla FC ibitego 3-2
Abakinnyi ba Gorilla FC basohokanye isoni bamaze gutsindwa umukino

Amafoto: Nezerwa Salomon

Video: Iraguha Jotham


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .