Mu Rwanda birashoboka kugabanyiriza abakinnyi imishahara kubera Coronavirus?-Icyo abayobozi b’amakipe babivugaho

Yanditswe na Eric Tony Ukurikiyimfura
Kuya 26 Werurwe 2020 saa 12:59
Yasuwe :
0 0

Kuva tariki ya 15 Werurwe 2020, ibikorwa byose by’imikino byarahagaritswe mu Rwanda mu rwego rwo kwirinda ikwirakwira rya Coronavirus.

Ni mu gihe kandi kuva ku wa Gatandatu tariki ya 21 Werurwe 2020, abantu bose basabwe kuguma mu ngo zabo kubera ingamba nshya zafashwe mu guhangana n’icyo cyorezo.

Ibi bishobora kugira ngo z’ubukungu ku bigo byinshi birimo ibyakoranaga n’amakipe y’imikino itandukanye ku buryo hari azagorwa no kubona ubushobozi bwo guhemba abakinnyi n’abandi bakozi bayo.

Izi ngamba ntabwo ziri mu Rwanda, ahubwo ni ku Isi yose ndetse amakipe akomeye y’i Burayi arimo FC Barcelone, Bayern Munich na Borussia Dortmund yafashe icyemezo cyo kugabanyiriza imishahara abakinnyi bayo mu rwego rwo kwirinda igihombo gikabije cyaterwa na Coronavirus.

82% by’amakipe 16 akina Shampiyona y’icyicro cya mbere mu Rwanda hari ubufasha bwa Leta abona, binyuze mu turere cyangwa izindi nzego. Rayon Sports, Gasogi United na Heroes FC ni yo makipe atabona inkunga ivuye muri Leta.

Icyo ayo makipe 16 yose ahuriraho kimwe n’ayo mu yindi mikino, ni uko hari icyo yinjizaga binyuze mu bafana barebye imikino cyangwa abaterankunga bakorana nayo.

Mu gihe imikino yahagaze, ntacyo amakipe ari kubona ndetse kuba ibigo byinshi byarabaye bifunze imiryango kubera icyorezo cya Coronavirus, bivuze ko hari icyagabanutse mu byo byinjizaga ku buryo bigoye ko byakomeza gufasha amakipe.

Ibikorwa byose by'imikino byagaritswe kugeza igihe kitazwi mu Rwanda

Ese kugabanyiriza abakinnyi imishahara byaba igisubizo ku makipe yo mu Rwanda?

IGIHE yaganiriye n’abayobozi batandukanye b’amakipe yo mu Rwanda ibabaza niba icyorezo cya Coronavirus nta ngaruka kizagira ku mibereho y’amakipe yabo ndetse niba kugabanyiriza abakinnyi imishahara bishobora kuba kimwe mu bisubizo.

Hari abagaragaje ko abakinnyi bakwiye guhembwa kuko bafite amasezerano abibemera kandi akaba agomba kubahirizwa kuko nta handi bakura.

Abandi bavuze ko hakwiye ibiganiro kuko n’abakinnyi babibona ko ibihe Isi yose irimo bidasanzwe mu gihe bamwe bavuga ko bishobora kuzaba bibi mu gihe iki cyorezo cya Coronavirus cyakomeza.

Uko bamwe mu bayobozi b’amakipe babibona:

Perezida wa AS Muhanga, Ndayisaba Jean Damascène

Ndayisaba avuga ko ’Kugabanyiriza abakinnyi imishahara ntabwo ari byo. None se iyo umukozi ahagaze kubera impamvu zitamuturutseho ntabwo ahembwa? Ikibazo gikomeye ni ubukene bw’amakipe, ubundi abakinnyi bagomba guhembwa’.

Icyo batazabona ni agahimbazamusyi n’ibyo bahabwaga ku myitozo kuko nta mikino ihari, ariko imishahara yo bagomba kuyibona, ni ko mbitekereza. Muri AS Muhanga tubonye ubushobozi, abakinnyi babona imishahara yabo.

Umwenda w’amakipe uzakomeza wiyongere ariko abakinnyi rwose bazafashwe gukomeza kubaho kuko amasezerano ntabwo araseswa. Nubwo umushahara waba ikirarane.

Perezida wa AS Muhanga, Ndayisaba Jean Damascène asanga abakinnyi bagombwa umushahara wabo nubwo waba ikirarane

Perezida wa Rayon Sports, Munyakazi Sadate

Muri iki gihe imikino itari kuba, birumvikana ko biba bigoye kubona ubushobozi bwo gutunga abakinnyi no kubahemba, ni nayo mpamvu mwabonye twasabye abafana ko babigira ibyabo, bakadufasha bifashishije ikoranabuhanga kuri za telefoni zabo nubwo na bo batorohewe kubera ibihe turimo.

Ariko mu minsi iri imbere turaza kuganira nka Komite twumve, tunaganirize n’abakinnyi turebe icyo babitekerezaho. Turebe niba hari izindi ngamba zakomeza. Kugeza ubu nta zindi ngamba turabifataho kuko tutaraganira n’abakinnyi nka Komite, ariko biri mu byo dutekereza ko byazadufasha mu gihe twaba tumaze kubyumvikanaho.

Icyo dusaba [abafana] ni ugukomeza gutekereza ko ikipe ari iyabo, nibo bayifasha, nibo ibereyeho, nibo baterankunga bayo b’ibanze. Icyo tubasaba ni uko bakomeza kuyifasha bakoresheje ikoranabuhanga banyuze kuri *610#.

Abafana ba Rayon Sports bamaze gukusanya miliyoni 4 Frw muri miliyoni 20 Frw zifuzwa. Bizagenda gute nizitaboneka?

Aho niho tuzafata izindi ngamba zirimo no kwishakamo ubushobozi nka Komite, ariko na nyuma y’ibyo harimo no kuba twatangira kuganira n’abakinnyi kugira ngo turebe uko twafashanya muri ibi bihe.

Abaterankunga bacu nabo dushobora kuganira ariko nabo bizagorana. Nabo ntabwo boroherewe. Urugero niba dukorana na SKOL, nkeka bari gucuruza nka 10% y’ibyo bacuruzaga. Urumva inkunga baduhaga ishobora guhungabana. Abaterankunga bashya turi gukorana [Airtel, za sitasiyo,..] nabo ni uko.

Perezida wa Rayon Sports, Munyakazi Sadate yabwiye IGIHE ko kuri ubu bishingikirije abafana ariko nibyanga bazashaka ibindi bisubizo bafatanyije n'abakinnyi

Karenzi Sam; Umunyamabanga Mukuru wa Bugesera FC

Twe ntacyo turabitekerezaho. Icya mbere, ntabwo tuzi igihe bizamara n’impinduka bizagira ku ngengabihe y’imikino. Hazazamo ikibazo nibiramuka bigiye hanze y’igihe cy’ingengo y’imari twakoze, ni ukuvuga bikajya hanze y’ukwezi kwa karindwi kuko tuba turi mu biruhuko, tudahemba.

Abakinnyi ntabahari, natwe turi mu ngo, tuzabiganiraho nibagaruka kuko ntituzi igihe bizamara. Nta mpinduka bigize ku ngengabihe ya Shampiyona, birashoboka ko nta mpinduka byagira ku mishahara yabo.

Umunyamabanga wa Bugesera FC, Karenzi Sam, asanga ntacyo Coronavirus izahungabanya kuri Bugesera FC mu gihe itangira ingaruka ku ngengabihe ya Shampiyona

Umunyamabanga Mukuru wa APR FC; Lt Col Sekaramba Sylvestre

Njye numva ibyo byaba iby’i Burayi kuko bo imihembere yabo iba iri hejuru ku buryo nubwo umukinnyi yamara amezi abiri adahembwa ashobora gukomeza kubaho. Ariko ukurikije ibyo mu Rwanda, ubakase umushahara, ntabwo babaho kuko batungwa n’uwo mushahara.

Tureke n’abakinnyi, ufashe n’abakozi ba Leta, uvuze ngo ubakate umushahara byaba bigoye. Biratandukanye. Usanga umushahara w’umuntu nawo uba udahagije, uvuze ngo urawugabanya, byaba bikomeye. Kumvikana n’abakinnyi birashoboka, ariko ntabwo bikuraho ko bizagora abakinnyi.

Nko muri APR abakinnyi batunzwe n’umushahara kuko nta kindi bakora, bakaswe umushahara ntabwo babaho. Ku bwanjye numva bakomeza kubahemba.

Umunyamabanga mukuru wa APR FC, Lt Col Sekaramba Sylvestre na we asanga abakinnyi bakwiye guhembwa kugira ngo babeho

Perezida akaba na nyiri Gasogi United, KNC

Iki ni igihe gikomeye cyane gisaba kumvikana. Amasezerano ni ubwumvikane bw’abantu babiri, ashobora guhinduka binyuze mu biganiro kandi na none ntekereza ko ari ibihe bidashobora kuramba. Ni ibihe bidasanzwe. Buri masezerano agira iyo ngingo.

Hariho n’amakipe avanaho umushahara burundu, urebye nka Lyon hari n’andi makipe ari kubyigaho nko mu cyiciro cya kabiri mu Bwongereza, ariko na none ntabwo ari ibihe bigomba kureba amakipe gusa, n’ubuyobozi bw’umupira bukwiye kureba icyakorwa kugira ngo ibibazo bizavuka nyuma y’ibi bihe, bizakemurwe mu buryo bwumvikana.

Kugeza uyu munsi, amasezerano ashobora guseswa cyangwa akavugururwa. Umukinnyi yakenera amafaranga abona ava he? Ubuzima bwahagaze. Biramutse bifashe nk’amezi abiri, amasezerano ashobora guhagarara burundu n’ayo make yabonekaga ntibayabone.

Kumvikana kugira ngo hashakwe igisubizo ni ngombwa. Ntabwo ari umupira w’amaguru gusa, nkeka na we aho ukora birengeje amezi atatu waba utizeye ko uzabona umushahara wawe wuzuye.

Ntabwo ari mu Rwanda gusa, niba ikipe nka FC Barcelone yagabanyije umushahara, ntabwo ari ibintu byoroshye. Siporo ni ukwishimisha ariko ubu ni ukurinda ubuzima bw’abantu. Nibyo abakinnyi bakeneye kurya, ariko se niba ahava amafaranga byanze, biragenda gute?

Abakinnyi nabagira inama yo kudasesagura amafaranga make bafite, abayariye nabi bishobora kubagiraho ingaruka. Uburyo bwo kwizigamira bugomba guhinduka muri iki gihe kidasanzwe.

Singombwa ibiganiro n’abakinnyi, ni ukubabwira uko duhagaze. N’abakinnyi ubwabo hagize uzana amananiza yaba afite ikibazo. Niba hari n’abaduteraga inkunga ari uko twakinnye bakagaragara, nta mafaranga bari gutanga ndetse n’ibindi byose byarahagaze, urumva amafaranga yava he?

Na FIFA ubwayo byayicanze kuko niba itangiye kuvuga ngo isoko ry’abakinnyi ryo mu mpeshyi rijye muri Mutarama, ni uko ibona ko bigoye.

Niyiri Gasogi United, KNC, asanga amakipe akwiye kubwira abakinnyi uko ahagaze kandi nabo bakabyumva kuko iki ari igihe kidasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza