Mu mukino utanogeye ijisho, Mukura VS yakoze amateka isezerera Free State Stars

Yanditswe na Ngabo Roben
Kuya 5 Ukuboza 2018 saa 06:31
Yasuwe :
0 0

Ikipe ihagarariye u Rwanda muri CAF Confederation Cup yakomeje mu ijonjora rya kabiri nyuma yo gutsinda 1-0 Free State Stars yakinishije benshi mu bakinnyi badasanzwe babanza mu kibuga ntiyanagaragaza inyota yo gushaka intsinzi.

Umutoza Francis Haringingo bita Mbaye utoza Mukura VS yagiye muri uyu mukino ashaka intsinzi byanze bikunze bituma abanza mu kibuga abakinnyi benshi basatira barimo Christopher Ndayishimiye, Onesme Twizerimana na Iradukunda Bertrand.

Bahanganaga na Free State Stars yaje mu Rwanda izanye abakinnyi 14 gusa baniganjemo abadasanzwe babanza mu kibuga. Bivugwa ko iyi kipe itashyize imbaraga muri aya marushanwa ya CAF.

Mu gice cya mbere Mukura VS yashoboraga kuba yatsinze ibitego birenga bine ariko imipira ba rutahizamu bayo babonye ntibashobora kuyinjiza mu izamu rya Free State Stars ryari ririnzwe n’umunyezamu wa gatatu Mbambo Samkelo.

Igice cya mbere cyarangiye amakipe yombi anganya 0-0 bituma Haringingo atangira igice cya kabiri asimbuza aho Onesme Twizerimana wari wahushije ibitego byinshi yatanze umwanya kuri Lomami Frank.

Iminota 12 y’igice cya kabiri yari ihagije ngo Mukura VS ifungure amazamu kuri koruneri yatewe na Ciza Hussein Mugabo, umupira urenga ba myugariro bose ba Free State Stars ugera kuri Nshimirimana David atsindisha umutwe.

Iminota yakurikiye ho ntabwo yanogeye abari kuri Stade Huye kuko abakinnyi ba Free State Stars ntibongeye kugaragaza ubushake bwo gushaka igitego cyo kwishyura ahubwo batindaga bahererekanya bakanasubiza inyuma.

Mukura yakoze impinduka ishaka ikindi gitego, Iddy Said Djuma na Asman Iddy bajya mu kibuga basimbuye Bertrand Iradukunda na Ciza Hussein Mugabo ariko ntibyagira icyo bihindura umukino urangira ari 1-0.

Nyuma y’umukino umutoza Vilakaze David yabwiye IGIHE ko yahuye n’ikipe ikomeye ariyo ntandaro yo gukina badasatira.

Ati "Si ugukina tutabishaka nkuko benshi babikeka kuko twatangiye dukoresha ba rutahizamu batatu. Ahubwo inshuro zose abakinnyi banjye bageragezaga gusatira bahuraga na ba myugariro bahagaze neza."

Yakomeje avuga ko impamvu yazanye abakinnyi bake biganjemo abadasanzwe babanza mu kibuga ari uko ikipe ya mbere ifite ibibazo by’imvune ku bakinnyi benshi.

Mukura VS yabonye itike izahangana na Al Hilal Obayed yo muri Sudani.

Abakinnyi ba Mukura bishimira igitego cyatumye basezerera Free States Stars
Byari ibyishimo n'amateka kuri Mukura VS
Kwizera Olivier wa Free State Stars yinjira mu kibuga asimbuye
N'iyonka ntiyasigaye
Abafana ba Mukura VS bari babukereye
Perezida wa Mukura, Nizeyimana Olivier, ahora hafi iyi kipe
Nubwo Mukura yitwaraga neza bamwe mu bafana bari bafite impungenge mbere yo gutsinda igitego
Abafana ba Kiyovu Sports bagiye gutera ingabo mu bitugu Mukura VS
Olivier Kwizera ntiyatinze gufata ishoti rya Mukura VS
Free State Stars yacishagamo igakina neza
Free State Stars yageze aho isimbuza n'abanyezamu

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza