Uyu mukino w’Umunsi wa 28 wa Shampiyona wabereye mu Bugesera, wahagaze ku munota wa 52 ubwo Bugesera FC yari ifite ibitego 2-0.

Ni nyuma ya penaliti itavugwaho rumwe yahawe iyi kipe yari mu rugo, mu gihe na Rayon Sports yagaragazaga ko hari penaliti itahawe ku buryo bwabanjirije ubwo.

Umukino wabanje guhagarara iminota irenga 15, abawuyoboye bemeza ko usubikwa kubera ko abafana bateraga amabuye mu kibuga aho amwe yafashe abasifuzi.

Mu butumwa yashyize ku rubuga rwa X, Minisitiri wa Siporo, Nelly Mukazayire, yavuze ko amakuru y’ibyabaye bayamenye ndetse bagiye gukurikirana iki kibazo.

Ati “Mwiriwe neza! Hari amakuru twakomeje kubona ajyanye n’umukino wahuje Rayon Sports na Bugesera FC, cyane cyane imvururu zahabaye, tukaba twibutsa abakunzi ba ruhago ndetse n’Abanyarwanda bose ko imyitwarire irimo imvururu mu bikorwa bya siporo itemewe kandi ihanwa n’amategeko.”

Yongeyeho ati “Ibijyanye n’uko umukino wagenze n’ibyo amakipe yaba afiteho ingingimira, hari inzego ziteganywa n’amategeko bigomba kunyuramo muri FERWAFA no muri Rwanda Premier League bigahabwa umurongo. Natwe nka Minisiteri ya Siporo mu nshingano dufite no mu buryo dukorana n’ izindi nzego tuzabikurikirana.”

Ibijyanye n'uko umukino wagenze n'ibyo amakipe yaba afiteho ingingimira hari inzego ziteganywa n'amategeko bigomba kunyuramo muri @FERWAFA no muri @RwandaLeague bigahabwa umurongo. Natwe nka @Rwanda_Sports mu nshingano dufite no mu buryo dukorana n' izindi nzego tuzabikurikirana

— Nelly Mukazayire (@nmukazayire) May 17, 2025

Urwego rutegura Shampiyona y’Icyiciro cya Mbere “Rwanda Premier League” rwatangaje ko “impamvu zatumye umukino utarangira ababishinzwe bari kuzigaho”, bityo umwanzuro uzamenyekana mu gihe kitarambiranye.

Inkuru bifitanye isano: Imvururu z’umukino wa Bugesera FC na Rayon Sports zatumye bamwe bajyanwa mu bitaro (Amafoto & Video)

Umukino wa Bugesera FC na Rayon Sports wahagaze ku munota wa 52 kubera imvururu

Minisitiri Nelly Mukazayire yijeje gukurikirana ikibazo cy'imvururu cyagaragaye kuri uyu mukino wa Shampiyona wabereye mu Bugesera