00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni 22£ mu yaguzwe Mudryk yatanzwe nk’inkunga mu ntambara yo muri Ukraine

Yanditswe na Byiringiro Osée Elvis
Kuya 17 Mutarama 2023 saa 01:58
Yasuwe :

Perezida wa Shakhtar Donetsk, Rinat Akhmetov, yatanze inkunga ya miliyoni 22£ ku miryango y’abasirikare baguye mu ntambara ya Ukraine n’u Burusiya. Ayo yakuwe muri miliyoni 89£ Chelsea yaguze umukinnyi we, Mykhailo Mudryk.

Tariki 15 Mutarama 2023 ni bwo Chelsea FC yemeje ko yaguze Mykhailo Mudryk miliyoni 89£ avuye muri Shakhtar Donetsk y’iwabo muri Ukraine.

Uyu musore yahise aca agahigo ko kuba ari we mukinnyi waguzwe amafaranga menshi mu mupira w’amaguru muri Ukraine.

Nyuma yo kubona ako kayabo, Perezida wa Shakhtar Donetsk, Rinat Akhmetov, yavuze ko yifuje kugira uruhare mu mushinga wo gufasha imiryango y’abasirikare baguye mu ntambara ya Ukraine n’u Burusiya.

Ati “Turashima igisirikare cya Ukraine kuko uyu munsi turi kuvuga umupira wacu kubera bo.”

Yakomeje avuga ko atifuzaga kugurisha Mudryk kuko yifuza gutwara kimwe mu bikombe byo ku Mugabane w’u Burayi.

Ati “Ntabwo ari ibanga ko inzozi zanjye ari ukuzatwara igikombe cy’u Burayi. Rero ibi bivuze ko twagombye kugumana abakinnyi beza nka Mudryk muri shampiyona yacu. Ariko ntabwo byakunze kubera ibihe turimo.”

Aya mafaranga yatanzwe azifashishwa mu buvuzi, gufasha abagize ihungabana ndetse n’ibindi bishobora gufasha abasirikare n’imiryango y’abaguye mu ntambara muri Mariupol.

Uyu muyobozi yongeyeho ko ikipe ye ya Shakhtar izakina umukino wa gicuti na Chelsea muri Ukraine kuri Donbass Arena.

Mudryk yifujwe cyane na Arsenal ariko birangira Chelsea ari yo imwegukanye ndetse imusinyisha amasezerano y’imyaka umunani n’igice.

Uyu musore usatira aca mu mpande, yigaragaje cyane muri Champions League ubwo yatsindaga ibitego bitatu mu mikino itandatu y’amatsinda ari kumwe na Shakhtar Donetsk.

Mudryk yabaye umukinnyi wa gatanu Chelsea isinyishije muri iri soko ryo muri Mutarama, nyuma ya João Félix, Benoît Badiashile, David Datro Fofana na Andrey Santos.

Biteganyjwe ko uyu musore azakina umukino we wa mbere muri iyi kipe yambara ubururu n’umweru ku wa Gatandatu ihura na Liverpool.

Mykhailo Mudryk werekeje muri Chelsea, ni we mukinnyi waguzwe menshi muri Shampiyona ya Ukraine. Yatanzweho miliyoni 89£
Mykhailo Mudryk yigaragaje cyane mu mikino ya UEFA Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .