Michael Sarpong yatsindiye Yanga SC mu mukino wa mbere, Harmonize agendera ku mugozi nka ‘Commando’

Yanditswe na Eric Tony Ukurikiyimfura
Kuya 30 Kanama 2020 saa 10:30
Yasuwe :
0 0

Mu mukino we wa mbere, Michael Sarpong yatsindiye Yanga SC igitego kimwe muri 2-0 iyi kipe yatsinze Aigle Noir yo mu Burundi mu mukino wa gicuti wo gusoza icyumweru cy’umunyagihugu “Wiki ya Mwananchi”.

Uyu mukino wabereye kuri Benjamin Mkapa Stadium kuri iki Cyumweru, werekaniwemo abakinnyi bashya n’umutoza mushya, ba Yanga SC yari ifite abafana buzuye iyi Stade ifite ubushobozi bwo kwakira abantu ibihumbi 60.

Imbere ya Jakaya Mrisho Kikwete wigeze kuba Perezida wa Tanzania, Yanga SC yafunguye amazamu ku gitego cyatsinzwe na Tuisila Kisinda ku munota wa 39, arobye umunyezamu Erick Johola nyuma yo guherezwa na Feisal Salum ‘Fei Toto’.

Yanga SC yatsinze iki gitego mu gihe hari hashize iminota 10 Aigle Noir ikina ari abakinnyi 10 mu kibuga kubera ikarita ya kabiri y’umuhondo yahawe Umunya-Ghana Koffi Kouassi.

Rutahizamu mushya ukomoka muri Ghana, Michael Sarpong wavuye muri Rayon Sports yirukanywe, yatsindiye Yanga SC igitego cya kabiri ku munota wa 52, ku mupira yateye n’umutwe ari muri metero esheshatu nyuma yo guhindurwa na Ditram Nchimbi.

Mu gice cya kabiri, umutoza mushya wa Yanga SC; Umunya-Serbia Zlatko Krmpotić, yahinduye ikipe yose yari mu kibuga.

Michael Sarpong yasimbuwe ku munota wa 67 na Abdulaziz Makame mu gihe Haruna Niyonzima, we yari yinjiye mu kibuga ku munota wa 54 asimbura Feisal Salum ‘Fei Toto’.

Uyu mukino wabanjirijwe n’ibirori, aho abari kuri Benjamin Mkapa Stadium basusurukijwe n’umuhanzi Rajab Abdul Kahali ‘Harmonize’ winjiye muri Stade amanukiye ku mugozi nk’umu-Commando.

Abakinnyi bitabajwe ku mpande zombi:

Yanga SC: Metacha Mnata, Kibwana Shomari, Yassin Mustafa, Abdallah Shaibu ‘Ninja’, Bakari Mwamnyeto, Mukoko Tonombe, Tuisila Kisinda, Feisal Salum ‘Fei Toto’, Michael Sarpong, Ditram Nchimbi na Deus Kaseke.

Aigle Noir: Erick Johola, Ndikumana Désiré, Hitimana Hamza, Yanick Nkurunziza, Masoud Marcsse, Koffi Kouassi, Ndikumana Asman, Ngabonziza Blanchare, Christ Attegbe na Nzojibwami Frank.

Michael Sarpong yatsindiye Yanga SC mu mukino wa mbere yayikiniye
Yanga SC yatsinze Aigle Noir mu mukino wa gicuti wabaye kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .